ರಿಲಯನ್ಸ್ ಜಿಯೋ ಮೆಗಾ IPOಗೆ ಜೀ ಮೀಡಿಯಾದಿಂದ 14 ನೇರ ಪ್ರಶ್ನೆ! ₹30,000 ಕೋಟಿ ಸಂಗ್ರಹದ ಹಿಂದೆ ಏನಿದೆ?

Reliance Jio Mega IPO: ಟೆಲಿಕಾಂ ಕಂಪನಿ ರಿಲಯನ್ಸ್ ಜಿಯೋ ಪ್ಲಾಟ್‌ಫಾರ್ಮ್ಸ್ ಆರಂಭಿಕ ಸಾರ್ವಜನಿಕ ಕೊಡುಗೆ (IPO) ಬಿಡುಗಡೆಗೆ ಸಿದ್ಧತೆ ನಡೆಸುತ್ತಿದೆ. ಅಕ್ಟೋಬರ್ 21ರಿಂದ 23ರವರೆಗೆ ಸಾರ್ವಜನಿಕ ಚಂದಾದಾರಿಕೆಗೆ ತೆರೆಯಲಿದೆ ಎನ್ನಲಾದ ಈ ಮೆಗಾ ಐಪಿಒ ಮೂಲಕ ಕಂಪನಿಯು ₹30,000 ಕೋಟಿ ಸಂಗ್ರಹಿಸುವ ಗುರಿ ಹೊಂದಿದೆ. ಈ ಐಪಿಒ ಬಿಡುಗಡೆಗೂ ಮುನ್ನ ಗುರುವಾರ ಮುಂಬೈನಲ್ಲಿ ಪತ್ರಿಕಾಗೋಷ್ಠಿ ನಡೆಸಲಾಯಿತು. ಈ ವೇಳೆ ಜೀ ಮೀಡಿಯಾ, ರಿಲಯನ್ಸ್ ಜಿಯೋದ ಐಪಿಒಗೆ ಸಂಬಂಧಿಸಿದಂತೆ ಹಲವು ಪ್ರಶ್ನೆಗಳನ್ನು ಎತ್ತಿತು. ಇದಕ್ಕೆ ಪ್ರತಿಕ್ರಿಯಿಸಿದ ರಿಲಯನ್ಸ್ ಜಿಯೋ ಸಿಇಒ, “ದಯವಿಟ್ಟು ಈ ಪ್ರಶ್ನೆಗಳನ್ನು ನನಗೆ ಇಮೇಲ್ ಮಾಡಿ” ಎಂದು ತಿಳಿಸಿದ್ದಾರೆ. ಬಳಿಕ ಜೀ ಮೀಡಿಯಾ ಈ ಪ್ರಶ್ನೆಗಳನ್ನು ಸಿಇಒಗೆ ಇಮೇಲ್ ಮಾಡಿದೆ.

ಐಪಿಒಗೆ ಸಂಬಂಧಿಸಿದಂತೆ ಜೀ ಮೀಡಿಯಾ ಕೇಳಿರುವ 14 ಪ್ರಶ್ನೆಗಳು ಇಲ್ಲಿವೆ.

ಪ್ರಶ್ನೆ 1: ಹಳೆಯ ಸಾಲ ಮರುಪಾವತಿಗೆ ಐಪಿಒ ಹಣ ಏಕೆ?

ಐಪಿಒ ಮೂಲಕ ಸಂಗ್ರಹಿಸುವ ಹಣದ ಶೇ.90ಕ್ಕಿಂತ ಹೆಚ್ಚಿನ ಮೊತ್ತವನ್ನು ಹೊಸ ಸಾಮರ್ಥ್ಯ ವಿಸ್ತರಣೆಗೆ ಬಳಸುವ ಬದಲು ಹಳೆಯ ಸಾಲಗಳನ್ನು ಮರುಪಾವತಿಸಲು ಬಳಸಲಾಗುತ್ತಿದ್ದರೆ, ಭವಿಷ್ಯದ ಬೆಳವಣಿಗೆಯಲ್ಲಿ ಹೂಡಿಕೆ ಮಾಡುವ ಬದಲು ಕಂಪನಿಯ ಹಳೆಯ ಸಾಲ ತೀರಿಸಲು ಹೊಸ ಸಾರ್ವಜನಿಕ ಷೇರುದಾರರು ಏಕೆ ಹಣ ಹೂಡಿಕೆ ಮಾಡಬೇಕು?

ಪ್ರಶ್ನೆ 2: ನೇರ ಷೇರು ಹಂಚಿಕೆ ಆಯ್ಕೆ ಮಾಡಲಿಲ್ಲವೇಕೆ?

ಜಿಯೋ ಷೇರುಗಳನ್ನು ನೇರ ಮತ್ತು ತೆರಿಗೆ-ತಟಸ್ಥ ಲಂಬ ವಿಲೀನದ ಮೂಲಕ ಆರ್‌ಐಎಲ್ ಷೇರುದಾರರಿಗೆ ಹಂಚಿಕೆ ಮಾಡಬಹುದಾಗಿದ್ದರೆ, ಅಸ್ತಿತ್ವದಲ್ಲಿರುವ ಪಾಲನ್ನು ದುರ್ಬಲಗೊಳಿಸುವ ಮತ್ತು ಬಾಹ್ಯ ಬಂಡವಾಳವನ್ನು ತರುವ ಹೊಸ ವಿತರಣೆಯ ಮಾರ್ಗವನ್ನು ಮಂಡಳಿ ಏಕೆ ಆಯ್ಕೆ ಮಾಡಿಕೊಂಡಿತು?

ಪ್ರಶ್ನೆ 3: ಆರ್‌ಐಎಲ್ ಮೌಲ್ಯಮಾಪನದ ಮೇಲೆ ಪರಿಣಾಮ ಬೀರಲಿದೆಯೇ?

ಜಿಯೋ ಪ್ಲಾಟ್‌ಫಾರ್ಮ್ಸ್‌ನಲ್ಲಿ ಜಾಗತಿಕ ಮತ್ತು ದೇಶೀಯ ಸಂಸ್ಥೆಗಳು ನೇರವಾಗಿ ಹೂಡಿಕೆ ಮಾಡಲು ಅವಕಾಶವಿರುವಾಗ, ಈ ಪ್ರತ್ಯೇಕ ಪಟ್ಟಿಯಿಂದ ಆರ್‌ಐಎಲ್‌ಗೆ ಹೋಲ್ಡಿಂಗ್ ಕಂಪನಿ ರಿಯಾಯಿತಿ ಅನ್ವಯವಾಗುವ ಸಾಧ್ಯತೆಯಿದೆಯೇ? ಇದರಿಂದ ಪೋಷಕ ಕಂಪನಿಯ ಮೌಲ್ಯಮಾಪನ ದೀರ್ಘಕಾಲದವರೆಗೆ ಸೀಮಿತವಾಗಬಹುದೇ?

ಪ್ರಶ್ನೆ 4: ಐಪಿಒ ಬೆಲೆ ಉದ್ದೇಶಪೂರ್ವಕವಾಗಿ ಕಡಿಮೆ ನಿಗದಿಪಡಿಸಲಾಗಿದೆಯೇ?

ಜಿಯೋ ಪ್ಲಾಟ್‌ಫಾರ್ಮ್ಸ್‌ನಲ್ಲಿ ಆರ್‌ಐಎಲ್ ಸುಮಾರು ಶೇ.66.4ರಷ್ಟು ಪಾಲು ಹೊಂದಿದೆ. ಹೀಗಾಗಿ ಐಪಿಒ ಬೆಲೆಯಲ್ಲಿ ನೀಡುವ ರಿಯಾಯಿತಿಯು ದೀರ್ಘಕಾಲದ ಆರ್‌ಐಎಲ್ ಷೇರುದಾರರಿಂದ ಹೊಸ ಚಂದಾದಾರರಿಗೆ ಸಂಪತ್ತಿನ ವರ್ಗಾವಣೆಗೆ ಕಾರಣವಾಗಬಹುದೇ? ಮೊದಲ ದಿನದ ಷೇರು ಬೆಲೆ ಏರಿಕೆಗೆ ಅನುಕೂಲವಾಗುವಂತೆ ಬೆಲೆಯನ್ನು ಕಡಿಮೆ ನಿಗದಿಪಡಿಸಲಾಗಿದೆಯೇ ಅಥವಾ ಸಾಂಸ್ಥಿಕ ರೋಡ್‌ಶೋಗಳ ನಂತರ ಮೌಲ್ಯಮಾಪನ ಕಡಿಮೆಯಾಗಿದೆಯೇ?

ಪ್ರಶ್ನೆ 5: ಸೀಮಿತ ಷೇರು ಪೂರೈಕೆ ಬೆಲೆ ನಿರ್ಧಾರದ ಮೇಲೆ ಪರಿಣಾಮ ಬೀರುತ್ತದೆಯೇ?

ಕಂಪನಿಯ ಶೇ.3ಕ್ಕಿಂತ ಕಡಿಮೆ ಷೇರುಗಳು ಮಾತ್ರ ಮಾರುಕಟ್ಟೆಯಲ್ಲಿ ಲಭ್ಯವಿದ್ದರೆ, ಐಪಿಒ ನಂತರದ ಷೇರು ಬೆಲೆ ನಿಜವಾದ ಮೌಲ್ಯವನ್ನು ಪ್ರತಿಬಿಂಬಿಸುತ್ತದೆಯೇ? ಅಥವಾ ಸೀಮಿತ ಷೇರು ಪೂರೈಕೆ ಮತ್ತು ಸೂಚ್ಯಂಕ ಸೇರ್ಪಡೆಗೆ ಸಂಬಂಧಿಸಿದ ನಿರ್ಬಂಧಗಳು ಬೆಲೆ ನಿರ್ಧಾರದ ಮೇಲೆ ಪರಿಣಾಮ ಬೀರುತ್ತವೆಯೇ?

ಪ್ರಶ್ನೆ 6: ಹಿಂದಿನ ಹೂಡಿಕೆದಾರರ ಷೇರು ಮಾರಾಟ ಮತ್ತು ಲಾಕ್‌ಇನ್ ಅವಧಿ ಏನು?

2020ರಲ್ಲಿ ಹೂಡಿಕೆ ಮಾಡಿದ ಪೂರ್ವ-ಐಪಿಒ ಹೂಡಿಕೆದಾರರು ಅಥವಾ ಪ್ರವರ್ತಕರು ತಮ್ಮ ಷೇರುಗಳನ್ನು ಮಾರಾಟ ಮಾಡುವುದನ್ನು ಪ್ರಮುಖ ಮೌಲ್ಯಮಾಪನದ ಮಾನದಂಡವಾಗಿ ಏಕೆ ಪ್ರಚಾರ ಮಾಡಲಾಗುತ್ತಿಲ್ಲ? ಚಿಲ್ಲರೆ ಹೂಡಿಕೆದಾರರು ಗಮನಿಸಬೇಕಾದ ಲಾಕ್‌ಇನ್ ಅವಧಿಯ ದಿನಾಂಕಗಳು ಯಾವುವು?

ಪ್ರಶ್ನೆ 7: ಜಿಯೋ ಬ್ರ್ಯಾಂಡ್‌ಗೆ ಸಂಬಂಧಿಸಿದ ಕಾನೂನು ರಕ್ಷಣೆ ಏನು?

ಜಿಯೋ ಪ್ಲಾಟ್‌ಫಾರ್ಮ್ಸ್ ಸ್ವತಃ 'ಜಿಯೋ' ಪ್ರಮುಖ ಟ್ರೇಡ್‌ಮಾರ್ಕ್‌ನ ಮಾಲೀಕತ್ವ ಹೊಂದಿಲ್ಲದಿದ್ದರೆ, ಅದೇ ಬ್ರ್ಯಾಂಡ್ ಹೊಂದಿರುವ ಮತ್ತೊಂದು ಗುಂಪಿನ ಕಂಪನಿ ದೊಡ್ಡ ವೈಫಲ್ಯ ಎದುರಿಸಿದ ಸಂದರ್ಭದಲ್ಲಿ ಪಟ್ಟಿ ಮಾಡಲಾದ ಕಂಪನಿಯ ಷೇರುದಾರರನ್ನು ರಕ್ಷಿಸಲು ಯಾವ ಕಾನೂನು ಸುರಕ್ಷತಾ ಕ್ರಮಗಳಿವೆ? ಪಟ್ಟಿಯ ನಂತರ ಬ್ರ್ಯಾಂಡ್ ಬಳಕೆಗೆ ಪರವಾನಗಿ ಶುಲ್ಕ ವಿಧಿಸುವ ಸಾಧ್ಯತೆಯಿದೆಯೇ?

ಪ್ರಶ್ನೆ 8: ರಿಲಯನ್ಸ್ ರಿಟೇಲ್‌ನೊಂದಿಗಿನ ವ್ಯವಹಾರಗಳಲ್ಲಿ ಪಾರದರ್ಶಕತೆ ಇದೆಯೇ?

ಪ್ರವರ್ತಕರು ಎರಡೂ ಕಂಪನಿಗಳಲ್ಲಿರುವುದರಿಂದ, ರಿಲಯನ್ಸ್ ರಿಟೇಲ್‌ನೊಂದಿಗಿನ ಕಮಿಷನ್, ಗ್ರಾಹಕರನ್ನು ಸೆಳೆಯುವ ವೆಚ್ಚ ಮತ್ತು ಹಂಚಿಕೆಯ ನಿರ್ವಹಣಾ ವೆಚ್ಚಗಳನ್ನು ನ್ಯಾಯಸಮ್ಮತ ಮಾರುಕಟ್ಟೆ ನಿಯಮಗಳ ಆಧಾರದ ಮೇಲೆ ನಿರ್ಧರಿಸಲಾಗುತ್ತಿದೆ ಎಂಬುದನ್ನು ಖಚಿತಪಡಿಸಲು ಯಾವ ಸ್ವತಂತ್ರ ವ್ಯವಸ್ಥೆಗಳಿವೆ?

ಪ್ರಶ್ನೆ 9: ಲಾಭದಾಯಕ ಉದ್ಯಮಗಳ ಹಂಚಿಕೆಗೆ ಯಾವ ನೀತಿಯಿದೆ?

ಸಾರ್ವಜನಿಕ ಅಲ್ಪಸಂಖ್ಯಾತ ಹೂಡಿಕೆದಾರರು ಜಿಯೋ ಪ್ಲಾಟ್‌ಫಾರ್ಮ್ಸ್‌ನಲ್ಲಿ ಹೂಡಿಕೆ ಮಾಡುತ್ತಿರುವ ಸಂದರ್ಭದಲ್ಲಿ, ಹೆಚ್ಚಿನ ಲಾಭ ತರುವ ಉದ್ಯಮಗಳನ್ನು ಜಿಯೋದಲ್ಲಿಯೇ ಉಳಿಸಿಕೊಳ್ಳಬೇಕೇ ಅಥವಾ ನೇರವಾಗಿ ಆರ್‌ಐಎಲ್‌ನಲ್ಲಿಯೇ ಇರಿಸಬೇಕೇ ಎಂಬುದನ್ನು ನಿರ್ಧರಿಸುವ ಲಿಖಿತ ಕಾರ್ಪೊರೇಟ್ ಆಡಳಿತ ನೀತಿ ಯಾವುದು?

ಪ್ರಶ್ನೆ 10: ಬಂಡವಾಳದ ಮೇಲಿನ ಆದಾಯ ಸುಧಾರಿಸುವುದೇ?

ದಶಕದ ಬೃಹತ್ ಬಂಡವಾಳ ವೆಚ್ಚದ ಹೊರತಾಗಿಯೂ ಬಳಸಲಾದ ಬಂಡವಾಳದ ಮೇಲಿನ ಆದಾಯ (ROCE) ಸುಮಾರು ಶೇ.8ರಲ್ಲಿಯೇ ಉಳಿದಿದೆ. ಐಪಿಒ ನಂತರ ಬಂಡವಾಳದ ಬಳಕೆಯಲ್ಲಿ ಶಿಸ್ತು ಮತ್ತು ಷೇರುದಾರರಿಗೆ ನಗದು ಆದಾಯ ಸುಧಾರಿಸುತ್ತದೆ ಎಂದು ಸಾರ್ವಜನಿಕ ಮಾರುಕಟ್ಟೆಗಳು ಏಕೆ ನಂಬಬೇಕು?

ಪ್ರಶ್ನೆ 11: ಷೇರುದಾರರ ಸಂಪತ್ತಿನ ಕುಸಿತಕ್ಕೆ ಕಾರಣವೇನು?

ಕಳೆದ ಮೂರು ವರ್ಷಗಳಲ್ಲಿ ಆರ್‌ಐಎಲ್‌ನ ಷೇರು ಬೆಲೆ ತುಲನಾತ್ಮಕವಾಗಿ ಸ್ಥಿರವಾಗಿದ್ದರೂ, 2026ರಲ್ಲಿ ಮಾತ್ರ ಅದರ ಮಾರುಕಟ್ಟೆ ಬಂಡವಾಳೀಕರಣ ಸುಮಾರು ₹4 ಲಕ್ಷ ಕೋಟಿ ಕುಸಿದಿದೆ ಎಂದು ಪ್ರಶ್ನೆಯಲ್ಲಿ ಉಲ್ಲೇಖಿಸಲಾಗಿದೆ. ಗುಂಪಿನ ಬಂಡವಾಳದಲ್ಲಿ 125 ಶತಕೋಟಿ ಡಾಲರ್‌ಗಿಂತ ಹೆಚ್ಚು ಹಣ ಹೂಡಿಕೆ ಮಾಡಿದ ನಂತರ ಷೇರುದಾರರ ಸಂಪತ್ತಿನಲ್ಲಿನ ಈ ಕುಸಿತವನ್ನು ಹೇಗೆ ಸಮರ್ಥಿಸಲಾಗುತ್ತದೆ?

ಪ್ರಶ್ನೆ 12: ರಿಲಯನ್ಸ್ ರಿಟೇಲ್‌ನ ಐಪಿಒ ವಿಳಂಬಕ್ಕೆ ಕಾರಣವೇನು?

2019ರ ವಾರ್ಷಿಕ ಮಹಾಸಭೆಯಲ್ಲಿ ರಿಲಯನ್ಸ್ ರಿಟೇಲ್ ಅನ್ನು ಐದು ವರ್ಷಗಳಲ್ಲಿ ಷೇರುಪೇಟೆಯಲ್ಲಿ ಲಿಸ್ಟ್‌ ಮಾಡಲಾಗುವುದು ಎಂದು ಷೇರುದಾರರಿಗೆ ತಿಳಿಸಲಾಗಿತ್ತು. ಆದರೆ ಈಗ ಈ ಗುರಿ 2028ಕ್ಕೆ ಮುಂದೂಡಲ್ಪಟ್ಟಿದೆ ಎಂದು ವರದಿಯಾಗಿದೆ. ಈ ಪರಿಷ್ಕೃತ ಕಾಲಮಿತಿಯನ್ನು ಸಾರ್ವಜನಿಕ ಮಾರುಕಟ್ಟೆಗಳು ಏಕೆ ನಂಬಬೇಕು?

ಪ್ರಶ್ನೆ 13: ವಿವಿಧ ಉದ್ಯಮಗಳಿಗೆ ಬಂಡವಾಳ ಹಂಚಿಕೆ ಹೇಗೆ?

ಆಕಾಶ್, ಇಶಾ ಮತ್ತು ಅನಂತ್ ಕ್ರಮವಾಗಿ ಜಿಯೋ, ರಿಟೇಲ್ ಮತ್ತು ನ್ಯೂ ಎನರ್ಜಿ ವಿಭಾಗಗಳನ್ನು ಮುನ್ನಡೆಸುತ್ತಿದ್ದಾರೆ. ಈ ಮೂರು ಬಹುಶತಕೋಟಿ ಡಾಲರ್ ಉದ್ಯಮಗಳು ಪೋಷಕ ಕಂಪನಿಯ ಬಂಡವಾಳಕ್ಕಾಗಿ ಸ್ಪರ್ಧಿಸುತ್ತಿರುವಾಗ, ಅವುಗಳ ನಡುವೆ ಆಂತರಿಕ ಬಂಡವಾಳ ಹಂಚಿಕೆಯನ್ನು ನಿರ್ಧರಿಸಲು ಯಾವ ಚೌಕಟ್ಟನ್ನು ಅನುಸರಿಸಲಾಗುತ್ತದೆ?

ಪ್ರಶ್ನೆ 14: ಕಾರ್ಯನಿರ್ವಾಹಕರ ವೇತನ ಮತ್ತು ಕಾರ್ಯಕ್ಷಮತೆಗೆ ಯಾವ ಸಂಬಂಧವಿದೆ?

ಕಾರ್ಯನಿರ್ವಾಹಕರ ವೇತನ, ಕಾರ್ಯಕ್ಷಮತೆ ಆಧಾರಿತ ಪ್ರೋತ್ಸಾಹಕಗಳು ಮತ್ತು ನಾಯಕತ್ವದ ಉತ್ತರಾಧಿಕಾರಕ್ಕೆ ಸಂಬಂಧಿಸಿದ ಮಾನದಂಡಗಳು ಆರ್‌ಐಎಲ್‌ನ ಷೇರು ಬೆಲೆ ಕಾರ್ಯಕ್ಷಮತೆ ಹಾಗೂ ಒಟ್ಟು ROCEಗೆ ನೇರವಾಗಿ ಸಂಬಂಧಿಸಿವೆಯೇ? ಅಥವಾ ಕಂಪನಿಯ ಬ್ಯಾಲೆನ್ಸ್ ಶೀಟ್ ಮತ್ತು ಒಟ್ಟು ಆಸ್ತಿ ಗಾತ್ರವನ್ನು ಮಾತ್ರ ಆಧರಿಸಿವೆಯೇ?