ತಿರುಪತಿ–ವಿಜಯಪುರ ವಿಶೇಷ ರೈಲು: ವೇಳಾಪಟ್ಟಿ ಪ್ರಕಟ, ಕರ್ನಾಟಕದ ಹಲವು ಜಿಲ್ಲೆಗಳ ಪ್ರಯಾಣಿಕರಿಗೆ ಅನುಕೂಲ!

Tirupati Vijayapura Special Train 2026: ದುರ್ಗಾ ಪೂಜೆ ಹಾಗೂ ನವರಾತ್ರಿ ಹಬ್ಬದ ಸಂದರ್ಭದಲ್ಲಿ ಪ್ರಯಾಣಿಕರ ಹೆಚ್ಚುವರಿ ದಟ್ಟಣೆಯನ್ನ ನಿಯಂತ್ರಿಸಲು ರೈಲ್ವೆ ಇಲಾಖೆ ತಿರುಪತಿ ಮತ್ತು ವಿಜಯಪುರ ನಡುವೆ ವಿಶೇಷ ರೈಲುಗಳನ್ನ ಓಡಿಸಲು ನಿರ್ಧರಿಸಿದೆ. ಅಕ್ಟೋಬರ್‌ 4ರಿಂದ 25ರವರೆಗೆ ಈ ವಿಶೇಷ ರೈಲುಗಳು ಸಂಚರಿಸಲಿದ್ದು, ಎರಡೂ ದಿಕ್ಕುಗಳಲ್ಲಿ ತಲಾ ನಾಲ್ಕು ಟ್ರಿಪ್‌ಗಳನ್ನ ನಿರ್ವಹಿಸಲಿವೆ. ಕರ್ನಾಟಕ ಮತ್ತು ಆಂಧ್ರಪ್ರದೇಶದ ಪ್ರಮುಖ ನಗರಗಳು ಹಾಗೂ ಪಟ್ಟಣಗಳನ್ನ ಸಂಪರ್ಕಿಸುವ ಈ ರೈಲು ಸೇವೆಯಿಂದ ಹಬ್ಬದ ಸಂದರ್ಭದಲ್ಲಿ ಪ್ರಯಾಣಿಸುವವರಿಗೆ ಅನುಕೂಲವಾಗಲಿದೆ.  

ತಿರುಪತಿ–ವಿಜಯಪುರ ರೈಲಿನ ವೇಳಾಪಟ್ಟಿ ಇಲ್ಲಿದೆ

ರೈಲು ಸಂಖ್ಯೆ 07419 ತಿರುಪತಿ–ವಿಜಯಪುರ ಸಾಪ್ತಾಹಿಕ ವಿಶೇಷ ಎಕ್ಸ್‌ಪ್ರೆಸ್‌ ಅಕ್ಟೋಬರ್‌ 4ರಿಂದ 25ರವರೆಗೆ ಪ್ರತಿ ಭಾನುವಾರ ಸಂಚರಿಸಲಿದೆ. ಈ ರೈಲು ತಿರುಪತಿಯಿಂದ ಬೆಳಗ್ಗೆ 8:15ಕ್ಕೆ ಹೊರಟು, ಅದೇ ದಿನ ರಾತ್ರಿ 10:25ಕ್ಕೆ ವಿಜಯಪುರ ತಲುಪಲಿದೆ.

ಇನ್ನೊಂದೆಡೆ ರೈಲು ಸಂಖ್ಯೆ 07420 ವಿಜಯಪುರ–ತಿರುಪತಿ ಸಾಪ್ತಾಹಿಕ ವಿಶೇಷ ಎಕ್ಸ್‌ಪ್ರೆಸ್‌ ಪ್ರತಿ ಭಾನುವಾರ ರಾತ್ರಿ 11:35ಕ್ಕೆ ವಿಜಯಪುರದಿಂದ ಹೊರಡಲಿದೆ. ಮರುದಿನ ಸೋಮವಾರ ಮಧ್ಯಾಹ್ನ 2:15ಕ್ಕೆ ತಿರುಪತಿ ತಲುಪಲಿದೆ. ಹಬ್ಬದ ಅವಧಿಯಲ್ಲಿ ಪ್ರಯಾಣಿಕರ ದಟ್ಟಣೆಯನ್ನ ಕಡಿಮೆ ಮಾಡುವ ಉದ್ದೇಶದಿಂದ ಈ ವಿಶೇಷ ಸೇವೆಯನ್ನ ಪರಿಚಯಿಸಲಾಗಿದೆ.  

ಯಾವೆಲ್ಲ ನಿಲ್ದಾಣಗಳಲ್ಲಿ ರೈಲು ನಿಲ್ಲಲಿದೆ?

ತಿರುಪತಿ ಮತ್ತು ವಿಜಯಪುರ ನಡುವೆ ಸಂಚರಿಸುವ ಈ ವಿಶೇಷ ರೈಲು ಆಂಧ್ರಪ್ರದೇಶ ಹಾಗೂ ಕರ್ನಾಟಕದ ಹಲವು ಪ್ರಮುಖ ನಿಲ್ದಾಣಗಳಲ್ಲಿ ನಿಲುಗಡೆ ಹೊಂದಿರಲಿದೆ. ಪ್ರಯಾಣಿಕರು ತಮ್ಮ ಪ್ರಯಾಣದ ಯೋಜನೆ ರೂಪಿಸಿಕೊಳ್ಳಲು ಈ ನಿಲ್ದಾಣಗಳ ವಿವರ ಸಹಕಾರಿಯಾಗಲಿದೆ.

ರೈಲು ನಿಲುಗಡೆ ಹೊಂದಲಿರುವ ಪ್ರಮುಖ ನಿಲ್ದಾಣಗಳು:

* ರೇಣಿಗುಂಟ
* ಕೋಡೂರು
* ರಾಜಂಪೇಟೆ
* ಕಡಪ
* ಯರ್ರಗುಂಟ್ಲ
* ತಾಡಿಪತ್ರಿ
* ಗುತ್ತಿ
* ಗುಂತಕಲ್
* ಬಳ್ಳಾರಿ
* ತೋರಣಗಲ್ಲು
* ಹೊಸಪೇಟೆ
* ಕೊಪ್ಪಳ
* ಗದಗ
* ಹೊಳೆ ಆಲೂರು
* ಬದಾಮಿ
* ಬಾಗಲಕೋಟೆ
* ಆಲಮಟ್ಟಿ
* ಬಸವನ ಬಾಗೇವಾಡಿ ರೋಡ್‌.

ಈ ನಿಲ್ದಾಣಗಳ ಮೂಲಕ ಸಂಚರಿಸುವುದರಿಂದ ವಿಜಯಪುರದ ಜೊತೆಗೆ ಬಾಗಲಕೋಟೆ, ಬದಾಮಿ, ಗದಗ, ಕೊಪ್ಪಳ, ಹೊಸಪೇಟೆ ಮತ್ತು ಬಳ್ಳಾರಿ ಭಾಗದ ಪ್ರಯಾಣಿಕರಿಗೂ ಅನುಕೂಲವಾಗಲಿದೆ. ತಿರುಪತಿಗೆ ತೆರಳುವ ಭಕ್ತರು ಹಾಗೂ ಹಬ್ಬದ ಸಂದರ್ಭದಲ್ಲಿ ಊರಿಗೆ ಪ್ರಯಾಣಿಸುವವರು ಈ ರೈಲು ಸೇವೆಯನ್ನ ಬಳಸಿಕೊಳ್ಳಬಹುದು.