ಎಲ್‌ಪಿಜಿ ಸಿಲಿಂಡರ್ ಗ್ರಾಹಕರಿಗೆ ಗುಡ್‌ ನ್ಯೂಸ್‌ : ಹಣವಿಲ್ಲದಿದ್ದರೂ ಸಿಗುತ್ತೆ ಗ್ಯಾಸ್‌.. ಹೇಗೆ ಗೊತ್ತೆ?

ನವದೆಹಲಿ: ದೇಶಾದ್ಯಂತ ಸದಾ ಏರಿಕೆಯಾಗುತ್ತಿರುವ ಎಲ್‌ಪಿಜಿ ಸಿಲಿಂಡರ್ ಬೆಲೆಯಿಂದಾಗಿ ಕಂಗಾಲಾಗಿರುವ ಹಾಗೂ ಸಿಲಿಂಡರ್ ಬುಕಿಂಗ್ ಮಾಡುವ ಸಂದರ್ಭದಲ್ಲಿ ಒಟ್ಟಾರೆಯಾಗಿ ಪೂರ್ಣ ಹಣವನ್ನು ಪಾವತಿಸಲು ತೊಂದರೆ ಅನುಭವಿಸುತ್ತಿರುವ ಗೃಹಬಳಕೆಯ ಗ್ರಾಹಕರಿಗೆ ಭಾರತ್ ಗ್ಯಾಸ್ (Bharat Gas) ಸಂಸ್ಥೆಯು ಭಾರಿ ಸಿಹಿ ಸುದ್ದಿಯೊಂದನ್ನು ನೀಡಿದೆ.

ಹೌದು.. ಗ್ರಾಹಕರ ಆರ್ಥಿಕ ಹೊರೆಯನ್ನು ತಗ್ಗಿಸುವ ನಿಟ್ಟಿನಲ್ಲಿ ಎಲ್‌ಪಿಜಿ ಸಿಲಿಂಡರ್ ಮರುಪೂರಣಕ್ಕಾಗಿ ಬಡ್ಡಿರಹಿತ ಮೈಕ್ರೋ-ಸಾಲ ಸೌಲಭ್ಯವನ್ನು (Interest-free micro-loan facility) ಕಂಪನಿಯು ಅಧಿಕೃತವಾಗಿ ಘೋಷಿಸಿದೆ. ಈ ಕುರಿತ ಸಂಪೂರ್ಣ ಮಾಹಿತಿ ಈ ಕೆಳಗೆ ನೀಡಲಾಗಿದೆ.

ಸದ್ಯದ ಮಾರುಕಟ್ಟೆ ಪರಿಸ್ಥಿತಿಯಲ್ಲಿ 14.2 ಕೆಜಿ ತೂಕದ ಗೃಹಬಳಕೆಯ ಎಲ್‌ಪಿಜಿ ಸಿಲಿಂಡರ್ ಬೆಲೆಯು ಸುಮಾರು 950 ರೂಪಾಯಿಗಳಷ್ಟಿದ್ದು, ಕೆಳ ಮತ್ತು ಮಧ್ಯಮ ವರ್ಗದ ಕುಟುಂಬಗಳಿಗೆ ತಕ್ಷಣಕ್ಕೆ ಈ ಮೊತ್ತವನ್ನು ಒದಗಿಸುವುದು ಕಷ್ಟಕರವಾಗುತ್ತಿದೆ. ಈ ಸಮಸ್ಯೆಗೆ ಪರಿಹಾರವಾಗಿ ಭಾರತ್ ಗ್ಯಾಸ್ ಸಂಸ್ಥೆಯು 'ವನ್‌ಗ್ರೋ ಫಿನ್‌ಟೆಕ್' (1Grow Fintech) ಕಂಪನಿಯ ಸಹಯೋಗದೊಂದಿಗೆ ಈ ವಿನೂತನ ಯೋಜನೆಯನ್ನು ಜಾರಿಗೆ ತಂದಿದೆ.

ಯೋಜನೆಯ ಮುಖ್ಯ ವಿವರಗಳು ಹಾಗೂ ಕಾರ್ಯ ವಿಧಾನ
ಈ ಯೋಜನೆಯ ಅಡಿಯಲ್ಲಿ ಗ್ರಾಹಕರು ತಮ್ಮ ಎಲ್‌ಪಿಜಿ ಸಿಲಿಂಡರ್ ರೀಫಿಲ್ ಮಾಡಲು ಗರಿಷ್ಠ 600 ರೂಪಾಯಿಗಳವರೆಗೆ ಬಡ್ಡಿರಹಿತ ಸಾಲವನ್ನು ಪಡೆದುಕೊಳ್ಳಬಹುದು. ಸಾಲ ಪಡೆದ ಮೊತ್ತವನ್ನು ಗ್ರಾಹಕರು ಒಟ್ಟಾರೆಯಾಗಿ ಪಾವತಿಸುವ ಅಗತ್ಯವಿಲ್ಲ. ಬದಲಿಗೆ, ಪ್ರತಿ ವಾರಕ್ಕೆ 100 ರೂಪಾಯಿಯಂತೆ ಒಟ್ಟು 6 ಕಂತುಗಳಲ್ಲಿ (EMI) ಸುಲಭವಾಗಿ ಹಣವನ್ನು ಮರುಪಾವತಿಸಬಹುದು.

ಶೂನ್ಯ ಬಡ್ಡಿ ದರ: ಈ ಮೈಕ್ರೋ-ಸಾಲದ ಮೇಲೆ ಕಂಪನಿಯು ಯಾವುದೇ ರೀತಿಯ ಹೆಚ್ಚುವರಿ ಶುಲ್ಕ ಅಥವಾ ಬಡ್ಡಿಯನ್ನು ವಿಧಿಸುವುದಿಲ್ಲ. ಅಂದರೆ ಗ್ರಾಹಕರು ಕೇವಲ ಅಸಲು ಮೊತ್ತವನ್ನು ಮಾತ್ರ ಸಣ್ಣ ಕಂತುಗಳಲ್ಲಿ ಮರುಪಾವತಿಸಿದರೆ ಸಾಕಾಗುತ್ತದೆ.

ಈ ಸೌಲಭ್ಯದ ಕುರಿತು ಭಾರತ್ ಗ್ಯಾಸ್ ತನ್ನ ಅಧಿಕೃತ 'ಎಕ್ಸ್' (ಟ್ವಿಟರ್) ಖಾತೆಯಲ್ಲಿ ಮಾಹಿತಿ ಹಂಚಿಕೊಂಡಿದ್ದು, ಸಾರ್ವಜನಿಕರು ತಕ್ಷಣಕ್ಕೆ ಹಣವಿಲ್ಲದಿದ್ದರೂ ಸಹ ಮುಂಚಿತವಾಗಿಯೇ ಸಿಲಿಂಡರ್ ಪಡೆದುಕೊಂಡು, ನಂತರ ಕಂತುಗಳಲ್ಲಿ ಹಣ ಪಾವತಿಸಬಹುದು ಎಂದು ತಿಳಿಸಿದೆ.

ಸೌಲಭ್ಯ ಪಡೆಯುವುದು ಹೇಗೆ?
ಈ ಸಾಲ ಸೌಲಭ್ಯದ ಪ್ರಯೋಜನವನ್ನು ಪಡೆಯಲು ಬಯಸುವ ಗ್ರಾಹಕರು ತಮ್ಮ ಸಮೀಪದ ಭಾರತ್ ಗ್ಯಾಸ್ ವಿತರಕರನ್ನು (Gas Agency) ನೇರವಾಗಿ ಸಂಪರ್ಕಿಸಬೇಕಾಗುತ್ತದೆ. ಏಜೆನ್ಸಿಗೆ ಅಗತ್ಯವಿರುವ ಸರಳ ದಾಖಲೆಗಳನ್ನು ಸಲ್ಲಿಸುವ ಮೂಲಕ ಈ ಮೈಕ್ರೋ-ಸಾಲ ಯೋಜನೆಗೆ ನೋಂದಾಯಿಸಿಕೊಳ್ಳಬಹುದು. ಗ್ಯಾಸ್ ಏಜೆನ್ಸಿಯ ಸಿಬ್ಬಂದಿ ಈ ಯೋಜನೆಯ ಸಂಪೂರ್ಣ ಪ್ರಕ್ರಿಯೆ ಮತ್ತು ಅರ್ಜಿ ಸಲ್ಲಿಸುವ ವಿಧಾನದ ಕುರಿತು ಗ್ರಾಹಕರಿಗೆ ಮಾರ್ಗದರ್ಶನ ನೀಡಲಿದ್ದಾರೆ.