ಧೋನಿ 21 ವರ್ಷಗಳ ದಾಖಲೆ ಉಡೀಸ್‌! ಶುಭಮನ್ ಗಿಲ್‌ ಐತಿಹಾಸಿಕ ದ್ವಿಶತಕಕ್ಕೆ ಕ್ರಿಕೆಟ್‌ ಜಗತ್ತೇ ಬೆರಗು!

Shubman Gill Record: ವೆಸ್ಟ್ ಇಂಡೀಸ್ ವಿರುದ್ಧದ 2ನೇ ಏಕದಿನ ಪಂದ್ಯದಲ್ಲಿ ಟೀಂ ಇಂಡಿಯಾ ನಾಯಕ ಶುಭಮನ್ ಗಿಲ್ ಬ್ಯಾಟ್‌ ಬೀಸಿದ ರೀತಿ ಕ್ರಿಕೆಟ್‌ ಇತಿಹಾಸದಲ್ಲಿ ಹೊಸ ದಾಖಲೆಗಳನ್ನೇ ಬರೆದಿದೆ. ಕೇವಲ 133 ಎಸೆತಗಳಲ್ಲಿ ಅಜೇಯ 223 ರನ್‌ ಸಿಡಿಸಿದ ಗಿಲ್, ಭಾರತದ ಪರ ಏಕದಿನ ಚೇಸ್‌ನಲ್ಲಿ ಅತಿಹೆಚ್ಚು ವೈಯಕ್ತಿಕ ರನ್‌ ಗಳಿಸಿದ ಎಂ.ಎಸ್‌.ಧೋನಿ ಅವರ 21 ವರ್ಷಗಳ ಹಳೆಯ ದಾಖಲೆಯನ್ನ ಮುರಿದಿದ್ದಾರೆ. ಧೋನಿ 2005ರಲ್ಲಿ ಶ್ರೀಲಂಕಾ ವಿರುದ್ಧ ಅಜೇಯ 183 ರನ್‌ ಗಳಿಸಿದ್ದರು. ಇದೀಗ ಗಿಲ್‌ರ 223 ರನ್ ಆ ದಾಖಲೆಯನ್ನ ಹಿಂದಿಕ್ಕಿದೆ.  

ವೆಸ್ಟ್ ಇಂಡೀಸ್ ನೀಡಿದ್ದ ಬರೋಬ್ಬರಿ 406 ರನ್‌ಗಳ ಗುರಿ ಬೆನ್ನಟ್ಟಿದ ಭಾರತ, ಕೇವಲ 43.3 ಓವರ್‌ಗಳಲ್ಲಿ 406/2 ದಾಖಲಿಸಿ ಎಂಟು ವಿಕೆಟ್‌ಗಳ ಭರ್ಜರಿ ಗೆಲುವು ಸಾಧಿಸಿತು. ಇದರೊಂದಿಗೆ ಮೂರು ಪಂದ್ಯಗಳ ಸರಣಿಯನ್ನೂ ಭಾರತ 2-0 ಅಂತರದಲ್ಲಿ ತನ್ನದಾಗಿಸಿಕೊಂಡಿತು. ಭಾರತದ ಏಕದಿನ ಇತಿಹಾಸದಲ್ಲೇ ಇದು ಅತ್ಯಂತ ದೊಡ್ಡ ಯಶಸ್ವಿ ಚೇಸ್ ಆಗಿದ್ದು, ವಿಶ್ವದ ಎರಡನೇ ಅತಿದೊಡ್ಡ ಯಶಸ್ವಿ ಏಕದಿನ ಚೇಸ್ ಎಂಬ ದಾಖಲೆಗೂ ಪಾತ್ರವಾಗಿದೆ.  

117 ಎಸೆತಗಳಲ್ಲಿ ದ್ವಿಶತಕ!

The man of the moment 🙌🫡#TeamIndia Captain Shubman Gill is the Player of the Match for his record shattering knock 🌟

RELIVE his knock ▶️ https://t.co/erDe5T7xvQ#INDvWI | @mflone_ | @ShubmanGill pic.twitter.com/0vQmEH5ak3

— BCCI (@BCCI) September 30, 2026

 ಗಿಲ್ ಅವರ ಇನ್ನಿಂಗ್ಸ್‌ನ ಅತ್ಯಂತ ವಿಶೇಷ ಸಾಧನೆ ಎಂದರೆ ಅವರ ದ್ವಿಶತಕ. ಅವರು ಕೇವಲ 117 ಎಸೆತಗಳಲ್ಲಿ 200 ರನ್ ಪೂರೈಸಿ, ಏಕದಿನ ಕ್ರಿಕೆಟ್‌ನಲ್ಲಿ ಅತಿ ವೇಗವಾಗಿ ದ್ವಿಶತಕ ಬಾರಿಸಿದ ಬ್ಯಾಟರ್ ಎನಿಸಿಕೊಂಡರು. ಇದಕ್ಕೂ ಮೊದಲು ಈ ದಾಖಲೆ ಇಶಾನ್ ಕಿಶನ್ ಹೆಸರಿನಲ್ಲಿತ್ತು. ಕಿಶನ್ 2022ರಲ್ಲಿ ಬಾಂಗ್ಲಾದೇಶ ವಿರುದ್ಧ 126 ಎಸೆತಗಳಲ್ಲಿ ದ್ವಿಶತಕ ಗಳಿಸಿದ್ದರು. ಗಿಲ್ ಇದೀಗ ಆ ದಾಖಲೆಯನ್ನ 9 ಎಸೆತಗಳ ಅಂತರದಿಂದ ಹಿಂದಿಕ್ಕಿದ್ದಾರೆ. ಗಿಲ್ ಅಂತಿಮವಾಗಿ 133 ಎಸೆತಗಳಲ್ಲಿ 223 ರನ್‌ಗಳ ಅಜೇಯ ಇನ್ನಿಂಗ್ಸ್ ಆಡಿದರು. ಅವರ ಸ್ಫೋಟಕ ಬ್ಯಾಟಿಂಗ್‌ನಲ್ಲಿ 28 ಬೌಂಡರಿ ಮತ್ತು 8 ಸಿಕ್ಸರ್‌ಗಳು ಸೇರಿದ್ದವು. ಈ 223 ರನ್ ಅವರ ಏಕದಿನ ವೃತ್ತಿಜೀವನದ ಗರಿಷ್ಠ ವೈಯಕ್ತಿಕ ಸ್ಕೋರ್ ಕೂಡ ಆಗಿದೆ.

ಧೋನಿ ದಾಖಲೆ 21 ವರ್ಷಗಳ ಬಳಿಕ ಪತನ

2005ರಲ್ಲಿ ಶ್ರೀಲಂಕಾ ವಿರುದ್ಧ ಜೈಪುರದಲ್ಲಿ ಎಂ.ಎಸ್‌.ಧೋನಿ ಅಜೇಯ 183 ರನ್‌ ಗಳಿಸಿದ್ದರು. ದೀರ್ಘಕಾಲ ಭಾರತದ ಪರ ಏಕದಿನ ಚೇಸ್‌ನಲ್ಲಿ ಗರಿಷ್ಠ ವೈಯಕ್ತಿಕ ಸ್ಕೋರ್ ಆಗಿದ್ದ ಈ ದಾಖಲೆ ಇದೀಗ ಗಿಲ್ ಹೆಸರಿಗೆ ವರ್ಗಾವಣೆಯಾಗಿದೆ. ಗಿಲ್ ಅವರ 223* ಕೇವಲ ಧೋನಿ ದಾಖಲೆಯನ್ನಷ್ಟೇ ಅಲ್ಲದೆ, ಏಕದಿನ ಚೇಸ್‌ನಲ್ಲಿ ಯಾವುದೇ ಬ್ಯಾಟರ್ ಗಳಿಸಿದ ಅತಿಹೆಚ್ಚು ವೈಯಕ್ತಿಕ ಸ್ಕೋರ್ ಆಗಿದೆ. ಇದಕ್ಕೂ ಮೊದಲು ಗ್ಲೆನ್ ಮ್ಯಾಕ್ಸ್‌ವೆಲ್ ಅವರ ಅಜೇಯ 201 ರನ್ ಈ ದಾಖಲೆಯಲ್ಲಿತ್ತು.

ಕೊಹ್ಲಿಗೂ ಸಾಧ್ಯವಾಗದ ಸಾಧನೆ

ಗಿಲ್ ಅವರ ಈ ಸಾಧನೆಯ ಮತ್ತೊಂದು ವಿಶೇಷವೆಂದರೆ, ಅವರು ಏಕದಿನ ಕ್ರಿಕೆಟ್‌ನಲ್ಲಿ ಎರಡನೇ ದ್ವಿಶತಕ ದಾಖಲಿಸಿದ ಬ್ಯಾಟರ್ ಆಗಿದ್ದಾರೆ. ಇದಕ್ಕೂ ಮೊದಲು ರೋಹಿತ್ ಶರ್ಮಾ ಮಾತ್ರ ಒಂದಕ್ಕಿಂತ ಹೆಚ್ಚು ಏಕದಿನ ದ್ವಿಶತಕಗಳನ್ನ ಗಳಿಸಿದ್ದರು. ರೋಹಿತ್ ಹೆಸರಿನಲ್ಲಿ ಮೂರು ಏಕದಿನ ದ್ವಿಶತಕಗಳಿವೆ. ಗಿಲ್ ಇದೀಗ ಎರಡನೇ ಆಟಗಾರನಾಗಿ ಈ ಪಟ್ಟಿಗೆ ಸೇರ್ಪಡೆಯಾಗಿದ್ದಾರೆ. ವಿರಾಟ್ ಕೊಹ್ಲಿ ಸೇರಿದಂತೆ ಭಾರತದ ಹಲವು ದಿಗ್ಗಜ ಬ್ಯಾಟರ್‌ಗಳು ಏಕದಿನಲ್ಲಿ ದ್ವಿಶತಕ ಗಳಿಸಿಲ್ಲ. ಇದರ ಜೊತೆಗೆ ಗಿಲ್ ಮತ್ತೊಂದು ಅಪರೂಪದ ದಾಖಲೆ ಬರೆದಿದ್ದಾರೆ. ಟೆಸ್ಟ್ ಮತ್ತು ಏಕದಿನ ಎರಡೂ ಮಾದರಿಗಳಲ್ಲಿ ದ್ವಿಶತಕ ಗಳಿಸಿದ ಮೊದಲ ನಾಯಕ ಎಂಬ ಸಾಧನೆಯನ್ನೂ ಅವರು ಮಾಡಿದ್ದಾರೆ. ಟೆಸ್ಟ್‌ನಲ್ಲಿ ಇಂಗ್ಲೆಂಡ್ ವಿರುದ್ಧ 269 ರನ್‌ಗಳ ಇನ್ನಿಂಗ್ಸ್ ಆಡಿದ್ದ ಗಿಲ್, ಇದೀಗ ಏಕದಿನದಲ್ಲೂ 200ರ ಗಡಿ ದಾಟಿದ್ದಾರೆ. 

ರೋಹಿತ್ ಶರ್ಮಾ ಕೂಡ ಶತಕದ ಅಬ್ಬರ!

Record-Breaking opening stand for the ages ✅

Rate that mammoth partnership 🔽 #TeamIndia | #INDvWI | @mflone_ | @ShubmanGill | @ImRo45 pic.twitter.com/Np6PLNrfqd

— BCCI (@BCCI) September 30, 2026

 ಗಿಲ್‌ರ ದಾಖಲೆಯ ಇನ್ನಿಂಗ್ಸ್‌ಗೆ ರೋಹಿತ್ ಶರ್ಮಾ ಕೂಡ ಅದ್ಭುತ ಸಾಥ್ ನೀಡಿದರು. ಆರಂಭಿಕರಾಗಿ ಕಣಕ್ಕಿಳಿದ ರೋಹಿತ್ ಕೇವಲ 75 ಎಸೆತಗಳಲ್ಲಿ 101 ರನ್ ಗಳಿಸಿದರು. ಇದು ಅವರ ಏಕದಿನ ವೃತ್ತಿಜೀವನದ 35ನೇ ಶತಕ. ಈ ಶತಕದೊಂದಿಗೆ ರೋಹಿತ್ 12,000 ಏಕದಿನ ರನ್‌ಗಳ ಮೈಲಿಗಲ್ಲನ್ನೂ ದಾಟಿದರು. ಅವರು ಈ ಸಾಧನೆ ಮಾಡಿದ ಭಾರತದ ಮೂರನೇ ಬ್ಯಾಟರ್; ಸಚಿನ್ ತೆಂಡೂಲ್ಕರ್ ಮತ್ತು ವಿರಾಟ್ ಕೊಹ್ಲಿ ಈಗಾಗಲೇ ಈ ಪಟ್ಟಿಯಲ್ಲಿದ್ದಾರೆ. 
ಗಿಲ್ ಮತ್ತು ರೋಹಿತ್ ಜೋಡಿ ಮೊದಲ ವಿಕೆಟ್‌ಗೆ ಬರೋಬ್ಬರಿ 255 ರನ್‌ಗಳ ಜೊತೆಯಾಟ ನೀಡಿತು. ಭಾರತದ ತವರಿನಲ್ಲಿ ಏಕದಿನದಲ್ಲಿ ಇದು ಅತ್ಯಧಿಕ ಆರಂಭಿಕ ಜೊತೆಯಾಟವಾಗಿದೆ ಎಂದು ICC ವರದಿ ಮಾಡಿದೆ. ರೋಹಿತ್ ಔಟಾದ ಬಳಿಕ ವಿರಾಟ್ ಕೊಹ್ಲಿ 29 ರನ್ ಗಳಿಸಿ ವಿಕೆಟ್ ಒಪ್ಪಿಸಿದರು. ಬಳಿಕ ರುತುರಾಜ್ ಗಾಯಕ್ವಾಡ್ ಅವರೊಂದಿಗೆ ಗಿಲ್ ಚೇಸ್ ಪೂರ್ಣಗೊಳಿಸಿದರು. 

ವೆಸ್ಟ್ ಇಂಡೀಸ್ ಕೂಡ ದಾಖಲೆ ಬರೆದಿತ್ತು

ಈ ಪಂದ್ಯದಲ್ಲಿ ವೆಸ್ಟ್ ಇಂಡೀಸ್ ಕೂಡ ಭರ್ಜರಿ ಬ್ಯಾಟಿಂಗ್ ಪ್ರದರ್ಶಿಸಿತ್ತು. ತಂಡ 50 ಓವರ್‌ಗಳಲ್ಲಿ 7 ವಿಕೆಟ್‌ಗೆ 405 ರನ್‌ ಗಳಿಸಿತು. ಜಾನ್ ಕ್ಯಾಂಪ್ಬೆಲ್, ಶೈ ಹೋಪ್ ಮತ್ತು ಅಮೀರ್ ಜಾಂಗೂ ಭರ್ಜರಿ ಶತಕ ಗಳಿಸಿದ್ದರು. ಒಂದೇ ಏಕದಿನ ಇನ್ನಿಂಗ್ಸ್‌ನಲ್ಲಿ ಮೂವರು ಬ್ಯಾಟರ್‌ಗಳು ಶತಕ ಗಳಿಸಿದ್ದು ಇದು ಕ್ರಿಕೆಟ್ ಇತಿಹಾಸದಲ್ಲಿ ಕೇವಲ ಆರನೇ ಬಾರಿ. ಆದರೆ ವೆಸ್ಟ್ ಇಂಡೀಸ್‌ನ ಬೃಹತ್ ಮೊತ್ತವನ್ನೂ ಭಾರತ ಗಿಲ್ ಮತ್ತು ರೋಹಿತ್‌ರ ಸ್ಫೋಟಕ ಬ್ಯಾಟಿಂಗ್‌ನ ನೆರವಿನಿಂದ ಸುಲಭವಾಗಿ ಬೆನ್ನಟ್ಟಿತು. ಅಂತಿಮವಾಗಿ 39 ಎಸೆತಗಳು ಬಾಕಿ ಇರುವಾಗಲೇ ಭಾರತ ಗುರಿ ತಲುಪಿತು. 

ಒಟ್ನಲ್ಲಿ ಗುವಾಹಟಿಯ ಈ ಪಂದ್ಯ ಶುಭಮನ್ ಗಿಲ್ ಅವರ ವೃತ್ತಿಜೀವನದ ಅತ್ಯಂತ ಸ್ಮರಣೀಯ ಇನ್ನಿಂಗ್ಸ್‌ಗಳಲ್ಲಿ ಒಂದಾಗಿ ದಾಖಲಾಗಿದೆ. ಧೋನಿ ಅವರ 21 ವರ್ಷಗಳ ದಾಖಲೆ ಮುರಿದಿರುವುದು, ವೇಗದ ಏಕದಿನ ದ್ವಿಶತಕ, 223* ರನ್ ಹಾಗೂ 406 ರನ್‌ಗಳ ಯಶಸ್ವಿ ಚೇಸ್—ಒಂದೇ ಪಂದ್ಯದಲ್ಲಿ ಹಲವು ದಾಖಲೆಗಳು ಭಾರತದ ಪಾಲಾಗಿವೆ.