Asian Games 2026: ಟೀಮ್‌ ಇಂಡಿಯಾ ಜಯಭೇರಿ.. ಗೋಲು ಮೇಲೆ ಗೋಲು ಬಾರಿಸಿ ದಾಖಲೆ ಬರೆದ ದೀಪಿಕಾ

ಏಷ್ಯನ್ ಗೇಮ್ಸ್ 2026ರಲ್ಲಿ ವುಮೆನ್ಸ್‌ ಟೀಮ್‌ ಇಂಡಿಯಾ ಇಂದು ತನ್ನ ಅಭಿಯಾನವನ್ನು ಅದ್ಭುತವಾಗಿ ಪ್ರಾರಂಭಿಸಿದ್ದು ಜಯಭೇರಿ ಬಾರಿಸಿದೆ. ಭಾರತದ ಮಹಿಳಾ ಹಾಕಿ ತಂಡವು ತನ್ನ ಮೊದಲ ಪಂದ್ಯದಲ್ಲಿ ಉಜ್ಬೇಕಿಸ್ತಾನ್ ಅನ್ನು 19-0 ಅಂತರದಿಂದ ಸೋಲಿಸುವ ಮೂಲಕ ದೊಡ್ಡ ವಿಜಯ ಸಾಧಿಸಿದೆ. ಈ ಮಹತ್ವದ ಪಂದ್ಯದಲ್ಲಿ ದೀಪಿಕಾ ಒಬ್ಬಂಟಿಯಾಗಿ 8 ಗೋಲುಗಳನ್ನು ಗಳಿಸುವ ಮೂಲಕ ದೊಡ್ಡ ದಾಖಲೆ ಬರೆದಿದ್ದಾರೆ. ಮತ್ತೊಂದೆಡೆ, ಭಾರತೀಯ ಮಹಿಳಾ ಶೂಟಿಂಗ್ ತಂಡವು 10 ಮೀಟರ್ ಏರ್ ರೈಫಲ್ ತಂಡ ಸ್ಪರ್ಧೆಯಲ್ಲಿ ಬೆಳ್ಳಿ ಪದಕವನ್ನು ಗೆಲ್ಲುವ ಮೂಲಕ ಭಾರತದ ಪದಕ ಖಾತೆಯನ್ನು ಓಪನ್‌ ಮಾಡಿದೆ ಎನ್ನಬಹುದು.

ಪಂದ್ಯದ ಆರಂಭದಿಂದಲೂ ಭಾರತದ ಮಹಿಳಾ ಹಾಕಿ ತಂಡವು ಉಜ್ಬೇಕಿಸ್ತಾನ್ ಮಹಿಳಾ ತಂಡದ ಮೇಲೆ ಭಾರೀ ಒತ್ತಡ ಹೇರುತ್ತಲೇ ಇತ್ತು. ಆರನೇ ನಿಮಿಷದಲ್ಲಿ ಲಾಲ್ರೆಮ್ಸಿಯಾಮಿ ಭಾರತದ ಪರವಾಗಿ ಮೊದಲ ಗೋಲು ಗಳಿಸಿದರು. ನವನೀತ್ ಕೌರ್ ಅವರ ಆರಂಭಿಕ ಪ್ರಯತ್ನವನ್ನು ಗೋಲ್‌ಕೀಪರ್ ಉಳಿಸಿಕೊಂಡರು, ಆದರೆ ಭಾರತವು ಚೆಂಡನ್ನು ರಿಬೌಂಡ್‌ನಲ್ಲಿ ಪಡೆದುಕೊಂಡಿತು ಮತ್ತು ಲಾಲ್ರೆಮ್ಸಿಯಾಮಿ ಗೋಲು ಗಳಿಸಿ ಯಶಸ್ವಿಯಾದರು.

ನಂತರ ದೀಪಿಕಾ ಬಲಭಾಗದಿಂದ ಅದ್ಭುತ ಸ್ಟ್ರೈಕ್ ಮೂಲಕ ಭಾರತದ ಮುನ್ನಡೆಯನ್ನು 2-0ಕ್ಕೆ ಏರಿಸಿದರು. ಸ್ವಲ್ಪ ಸಮಯದ ನಂತರ, ಸುನೆಲಿಟಾ ನೀಡಿದ ಅದ್ಭುತ ಪಾಸ್‌ನಲ್ಲಿ ಇಶಿಕಾ ಮೊದಲ ಬಾರಿಗೆ ಶಾಟ್ ಗಳಿಸಿಕೊಂಡು ಮೂರನೇ ಗೋಲು ಗಳಿಸಿದರು. ಮೊದಲ ಕ್ವಾರ್ಟರ್ ಮುಗಿಯುವ ಮೊದಲು, ಬಲ್ಜೀತ್ ರಿಬೌಂಡ್ ಮೂಲಕ ಗೋಲು ಗಳಿಸಿ ಸ್ಕೋರ್ ಅನ್ನು 4-0 ಕ್ಕೆ ತಂದು ನಿಲ್ಲಿಸಿದರು. ಎರಡನೇ ಕ್ವಾರ್ಟರ್‌ನಲ್ಲಿಯೂ ಭಾರತದ ಆಕ್ರಮಣಕಾರಿ ಆಟ ಮುಂದುವರೆಯಿತು. ನೇಹಾ ರಿವರ್ಸ್ ಹಿಟ್‌ನಲ್ಲಿ ಅದ್ಭುತ ಗೋಲು ಗಳಿಸಿ ಭಾರತದ ಮುನ್ನಡೆಯನ್ನು 5-0 ಕ್ಕೆ ತಂದರು.

ಇದರ ನಂತರ, ದೀಪಿಕಾ ಪೆನಾಲ್ಟಿ ಕಾರ್ನರ್ ಅನ್ನು ಗೋಲಾಗಿ ಪರಿವರ್ತಿಸಿ ತನ್ನ ಎರಡನೇ ಗೋಲು ಗಳಿಸಿದರು. ರಿತುಜಾ ರಿಬೌಂಡ್ ಮೂಲಕ ಗೋಲು ಗಳಿಸಿ ಸ್ಕೋರ್ ಅನ್ನು 7-0 ಕ್ಕೆ ತಂದು ಮುನ್ನಡೆಯನ್ನು ಕಾಯ್ದುಕೊಂಡರು. ಇದಾದ ಮೇಲೆ ದೀಪಿಕಾ ಮತ್ತೊಂದು ಪೆನಾಲ್ಟಿ ಕಾರ್ನರ್ ಅನ್ನು ಗೋಲಾಗಿ ಪರಿವರ್ತಿಸುವ ಮೂಲಕ ತನ್ನ ಹ್ಯಾಟ್ರಿಕ್ ಪೂರ್ಣಗೊಳಿಸಿದರು. ಅರ್ಧಾವಧಿಯ ಹೊತ್ತಿಗೆ, ಭಾರತ 8-0 ಸ್ಕೋರ್‌ ಮೂಲಕ ಬೃಹತ್ ಮುನ್ನಡೆಯನ್ನು ಗಳಿಸಿತ್ತು.

ಮೂರನೇ ಕ್ವಾರ್ಟರ್‌ನಲ್ಲಿ, ದೀಪಿಕಾ ಗೋಲುಗಳ ಸುರಿಮಳೆಗೈದರು ಎನ್ನಬಹುದು. ದೀಪಿಕಾ ಅವರು ಸತತ ನಾಲ್ಕು ಗೋಲುಗಳನ್ನು ಗಳಿಸುವ ಮೂಲಕ ಎದುರಾಳಿಗೆ ಸಿಂಹಸ್ವಪ್ನವಾದರು. ವಿಶೇಷ ಎಂದರೆ ಈ ಎಲ್ಲಾ ಗೋಲುಗಳು ಪೆನಾಲ್ಟಿ ಕಾರ್ನರ್‌ಗಳಿಂದ ಬಂದಿದ್ದವು. ಈ ರೀತಿಯಾಗಿ, ಅವರ ವೈಯಕ್ತಿಕ ಸ್ಕೋರ್ ಏಳು ಗೋಲುಗಳನ್ನು ತಲುಪಿತು. ಈ ಸಮಯದಲ್ಲಿ, ಇಶಿಕಾ, ಸಾಕ್ಷಿ ರಾಣಾ ಮತ್ತು ಲಾಲ್ತಾಂಟ್ಲುವಾಂಗಿ ಕೂಡ ಗೋಲುಗಳನ್ನು ಗಳಿಸಿದರು. ಮೂರನೇ ಕ್ವಾರ್ಟರ್ ಅಂತ್ಯದ ವೇಳೆಗೆ ಭಾರತ ತಂಡವು 15-0 ಮುನ್ನಡೆ ಸಾಧಿಸಿತ್ತು.

ನಾಲ್ಕನೇ ಕ್ವಾರ್ಟರ್‌ನಲ್ಲೂ ಭಾರತೀಯ ಆಟಗಾರ್ತಿಯರು ಎದುರಾಳಿಯ ಮೇಲೆ ದಾಳಿಯ ವೇಗ ಕಡಿಮೆಯಾಗದಂತೆ ನೋಡಿಕೊಂಡರು. ನವನೀತ್ ಕೌರ್ ಒಂದು ಗೋಲು ಗಳಿಸಿ ತಂಡದ ಮುನ್ನಡೆಯನ್ನು ಮತ್ತಷ್ಟು ಬಲಪಡಿಸಿದರು. ದೀಪಿಕಾ ತಮ್ಮ ಎಂಟನೇ ಗೋಲು ಗಳಿಸಿದರೆ, ಇಶಿಕಾ ಕೂಡ ಹ್ಯಾಟ್ರಿಕ್ ಗಳಿಸಿದರು. ಲಾಲ್ತಾಂಟ್ಲುವಾಂಗಿ ಮತ್ತು ನೇಹಾ ಕೂಡ ಗೋಲು ಬಾರಿಸಿದರು. ಅಂತಿಮವಾಗಿ, ಭಾರತ ಪಂದ್ಯವನ್ನು 19-0 ಅಂತರದಿಂದ ಬೃಹತ್‌ ಗೆಲುವು ಪಡೆಯಿತು.

ಭಾರತದ ಮಹಿಳಾ ಹಾಕಿದ ತಂಡದ ದೊಡ್ಡ ಗೆಲುವಿನಲ್ಲಿ ದೀಪಿಕಾ ಅವರ ಅತಿ ದೊಡ್ಡ ಪಾಲು ಇದೆ ಎನ್ನಬಹುದು. ಒಬ್ಬರೇ ಎಂಟು ಗೋಲು ಬಾರಿಸುವುದು ಎಂದರೆ ಅಷ್ಟೊಂದು ಸಾಮಾನ್ಯವಲ್ಲ. ದಿಪೀಕಾ ಅವರು ಒಟ್ಟು 8 ಗೋಲುಗಳನ್ನು ಗಳಿಸಿದರು, ಇದರಲ್ಲಿ ಪೆನಾಲ್ಟಿ ಕಾರ್ನರ್‌ಗಳಿಂದ ಗಳಿಸಿದ ಹಲವು ಗೋಲುಗಳು ಸೇರಿವೆ. ಇಶಿಕಾ 3 ಗೋಲುಗಳನ್ನು ಗಳಿಸಿದರು. ನೇಹಾ ಮತ್ತು ಲಾಲ್ತಾಂಟ್ಲುವಾಂಗಿ ತಲಾ 2 ಗೋಲುಗಳನ್ನು ಗಳಿಸಿದರೆ, ಲಾಲ್ರೆಮ್ಸಿಯಾಮಿ, ಬಲ್ಜೀತ್, ಸಾಕ್ಷಿ ರಾಣಾ ಮತ್ತು ನವನೀತ್ ಕೌರ್ ತಲಾ 1 ಗೋಲು ಗಳಿಸಿ ಭಾರತದ ಗೆಲುವಿಗೆ ಕಾರಣರಾದರು.

ಹಾಕಿ ಜೊತೆಗೆ ಭಾರತೀಯ ಮಹಿಳಾ ಟೇಬಲ್ ಟೆನಿಸ್ ತಂಡ ಕೂಡ ಉತ್ತಮ ಆರಂಭವನ್ನು ಪಡೆದುಕೊಂಡಿದೆ. ಗ್ರೂಪ್ ಎಫ್ ಪಂದ್ಯದಲ್ಲಿ ಭಾರತ ಇಂಡೋನೇಷ್ಯಾವನ್ನು 3-0 ಅಂತರದಿಂದ ಸೋಲಿಸಿತು. ಶ್ರೀಜಾ ಅಕುಲಾ, ಇಯಾ ಚಿಟಾಲೆ ಮತ್ತು ಯಶಸ್ವಿನಿ ಘೋರ್ಪಡೆ ತಮ್ಮ ತಮ್ಮ ಪಂದ್ಯಗಳನ್ನು ಗೆದ್ದು ಭಾರತಕ್ಕೆ ಸುಲಭ ಗೆಲುವು ತಂದುಕೊಟ್ಟರು. ಇದರಿಂದ ಇನ್ನಷ್ಟು ಪದಕಗಳ ನಿರೀಕ್ಷೆಯನ್ನು ಟೀಮ್‌ ಇಂಡಿಯಾ ಮಾಡುತ್ತಿದೆ.

ಶೂಟಿಂಗ್‌ನಲ್ಲಿ ಭಾರತಕ್ಕೆ ಸ್ವಿಲ್ವರ್‌ ಮೆಡಲ್;‌ ಶೂಟಿಂಗ್‌ನಲ್ಲಿಯೂ ಭಾರತ ಉತ್ತಮ ಆರಂಭವನ್ನು ಪಡೆದುಕೊಂಡಿದೆ. ಮಹಿಳೆಯರ 10 ಮೀಟರ್ ಏರ್ ರೈಫಲ್ ತಂಡ ಸ್ಪರ್ಧೆಯಲ್ಲಿ, ಎಲವೆನಿಲ್ ವಲರಿವನ್, ಸೋನಮ್ ಮಸ್ಕರ್ ಮತ್ತು ವಿದರ್ಶನ ವಿನೋದ್ ಅವರ ಭಾರತೀಯ ತ್ರಿಮೂರ್ತಿಗಳು ಬೆಳ್ಳಿ ಪದಕ ಗೆದ್ದರು. ಭಾರತೀಯ ತಂಡವು ಒಟ್ಟು 1,898 ಅಂಕಗಳನ್ನು ಗಳಿಸಿ ಎರಡನೇ ಸ್ಥಾನ ಗಳಿಸಿತು. ಈ ಸ್ಪರ್ಧೆಯಲ್ಲಿ ಚೀನಾ ಭಾರತಕ್ಕಿಂತ ಮುಂದಕ್ಕೆ ಬಂದು ಮೊದಲ ಸ್ಥಾನವನ್ನು ಗಳಿಸಿತು.

ಎಲವೆನಿಲ್ ವಲರಿವನ್ ಅದ್ಭುತ ಪ್ರದರ್ಶನ ನೀಡಿ 633.5 ಅಂಕಗಳನ್ನು ಗಳಿಸಿ ವೈಯಕ್ತಿಕ ಫೈನಲ್‌ನಲ್ಲಿ ಸ್ಥಾನ ಪಡೆದರು. ಸೋನಮ್ ಮುಸ್ಕರ್ ಕೂಡ ವೈಯಕ್ತಿಕ ಫೈನಲ್‌ಗೆ ಅರ್ಹತೆ ಪಡೆದರು. ಹೀಗಾಗಿ, ಭಾರತವು 2026 ರ ಏಷ್ಯನ್ ಗೇಮ್ಸ್‌ನಲ್ಲಿ ಹಾಕಿ, ಟೇಬಲ್ ಟೆನಿಸ್ ಮತ್ತು ಶೂಟಿಂಗ್‌ನಲ್ಲಿ ಒಂದೇ ದಿನದಲ್ಲಿ ಅದ್ಭುತ ಪ್ರದರ್ಶನ ನೀಡುವ ಮೂಲಕ ತನ್ನ ಅಭಿಯಾನವನ್ನು ಬಲವಾಗಿ ಪ್ರಾರಂಭಿಸಿದೆ.