3,383 ಕೋಟಿ ರೂ. ಒಡೆಯ ಭಿಕ್ಷುಕನಾದಾಗ: ಬಿಜೆಪಿ ಶಾಸಕ ಪರಾಗ್ ಷಾ ಅವರ ವಿಶಿಷ್ಟ ಆಧ್ಯಾತ್ಮಿಕ ಪ್ರಯೋಗ!

ಘಾಟ್‌ಕೋಪರ್‌ನ ಬೀದಿಗಳಲ್ಲಿ ಹರಿದ ಬಟ್ಟೆ ಧರಿಸಿ, ಮುಖಕ್ಕೆ ಮೇಕಪ್ ಹಾಕಿಕೊಂಡು, ಅಪರಿಚಿತರ ಬಳಿ ಕೈಯೊಡ್ಡಿ ನಿಂತಿದ್ದ ಆ ವ್ಯಕ್ತಿಯನ್ನು ಕಂಡರೆ ಯಾರಾದರೂ 'ಅಯ್ಯೋ ಪಾಪ' ಎನ್ನಬೇಕಿತ್ತು. ಯಾರೋ ಒಬ್ಬ ಮಾమూಲು ಭಿಕ್ಷುಕ, ಹಸಿವಿನಿಂದ ಅಲೆಯುತ್ತಿದ್ದಾನೆ ಎಂದೇ ಎಲ್ಲರೂ ಭಾವಿಸಿದ್ದರು. ಸಮೋಸಾ ಮಾರಾಟಗಾರನೊಬ್ಬ ಆತನ ಬಡತನ ಕಂಡು, ಒಂದು ಪೈಸೆ ಅಸಲಿ ಹಣ ಪಡೆಯದೆ ಪ್ರೀತಿಯಿಂದ ತಿನ್ನಲು ಆಹಾರ ನೀಡಿದ್ದ. ಇನ್ನೊಬ್ಬ ವ್ಯಕ್ತಿ 20 ರೂಪಾಯಿ ನೀಡಿ, "ಹೋಗು ಬಾಬಾ, ಮೊದಲು ಊಟ ಮಾಡು" ಎಂದು ಬೆನ್ನು ತಟ್ಟಿದ್ದ.

ಆದರೆ, ಆ ಹರಿದ ಬಟ್ಟೆಯ ಹಿಂದೆ ಅಡಗಿದ್ದ ಸತ್ಯ ತಿಳಿಯುತ್ತಿದ್ದಂತೆ ಘಾಟ್‌ಕೋಪರ್ ಜನತೆಯೇ ಆಶ್ಚರ್ಯಚಕಿತರಾಗಿದ್ದಾರೆ! ಏಕೆಂದರೆ, ಭಿಕ್ಷುಕನಂತೆ ನಟಿಸಿ ಬೀದಿಯಲ್ಲಿ ನಿಂತಿದ್ದ ಆ ವ್ಯಕ್ತಿ ಸಾಮಾನ್ಯನಾಗಿರಲಿಲ್ಲ. ಅವರು ಸುಮಾರು 3,383 ಕೋಟಿ ರೂಪಾಯಿಗಳಿಗೂ ಅಧಿಕ ಮೌಲ್ಯದ ಆಸ್ತಿ ಹೊಂದಿರುವ, ಇಡೀ ದೇಶದಲ್ಲೇ ಅತ್ಯಂತ ಶ್ರೀಮಂತ ಶಾಸಕ ಎನಿಸಿಕೊಂಡಿರುವ ಘಾಟ್‌ಕೋಪರ್ ಪೂರ್ವ ಕ್ಷೇತ್ರದ ಬಿಜೆಪಿ ಶಾಸಕ ಪರಾಗ್ ಷಾ!

ಅಷ್ಟಕ್ಕೂ ದೇಶದ ಅತಿ ಶ್ರೀಮಂತ ಜನಪ್ರತಿನಿಧಿಯೊಬ್ಬರು ಹೀಗೆ ಭಿಕ್ಷುಕನ ಅವತಾರ ತಾಳಲು ಕಾರಣವೇನು? ಇದರ ಹಿಂದೆ ಯಾವುದೇ ರಾಜಕೀಯ ನಾಟಕವಿರಲಿಲ್ಲ, ಬದಲಿಗೆ ಒಂದು ಆಧ್ಯಾತ್ಮಿಕ ಶೋಧನೆ ಇತ್ತು. ಜೈನ ಆಧ್ಯಾತ್ಮಿಕ ಗುರು ನಮ್ರಮುನಿ ಮಹಾರಾಜ್ ಅವರು ನೀಡಿದ ಆಧ್ಯಾತ್ಮಿಕ ಅಭ್ಯಾಸ ಹಾಗೂ ಆತ್ಮಾವಲೋಕನದ ಭಾಗವಾಗಿ ಶಾಸಕ ಪರಾಗ್ ಷಾ ಈ ಹೆಜ್ಜೆ ಇಟ್ಟಿದ್ದರು.

ತಮ್ಮ ಗನ್‌ಮ್ಯಾನ್, ಭದ್ರತಾ ಸಿಬ್ಬಂದಿ, ಐಷಾರಾಮಿ ಕಾರುಗಳು ಮತ್ತು ದುಬಾರಿ ವಾಚ್, ಫೋನ್‌ಗಳನ್ನು ಬದಿಗಿಟ್ಟು, ಗುರುತು ಸಿಗದಂತೆ ಮೇಕಪ್ ಮಾಡಿಕೊಂಡು ಹಳೆಯ ಸವೆದ ಬಟ್ಟೆಗಳನ್ನು ತೊಟ್ಟು ಅವರು ಬೀದಿಗೆ ಇಳಿದಿದ್ದರು. ಆಶ್ಚರ್ಯವೆಂದರೆ, ಅವರ ಸ್ವಂತ ಕುಟುಂಬದವರು ಹಾಗೂ ಜೊತೆಯಲ್ಲೇ ಇರುತ್ತಿದ್ದ ಭದ್ರತಾ ಸಿಬ್ಬಂದಿಯೂ ಅವರನ್ನು ಈ ವೇಷದಲ್ಲಿ ಗುರುತಿಸಲು ಸಾಧ್ಯವಾಗಲಿಲ್ಲ.

ಮಾನವೀಯತೆ ಮೆರೆದ ಮುಂಬೈ ಬೀದಿ ವ್ಯಾಪಾರಿಗಳು

ತಮ್ಮದೇ ಕ್ಷೇತ್ರದಲ್ಲಿ ಸಾಧಾರಣ ಭಿಕ್ಷುಕನಂತೆ ಅಲೆದಾಡಿದ ಷಾ ಅವರಿಗೆ ಮುಂಬೈನ ಜನತೆ ನೀಡಿದ ಅನುಭವ ಅಚ್ಚರಿ ತಂದಿದೆ. ಹಸಿವಾಗಿದೆ ಎಂದಾಗ ಹಲವರು ಅವರಿಗೆ ಬೇಳೆ, ಅನ್ನ ಮತ್ತು ಕುಡಿಯಲು ನೀರು ನೀಡಿದರು. ಅದರಲ್ಲೂ ವಿಶೇಷವಾಗಿ, ಬೀದಿಬದಿಯ ಸಮೋಸಾ ಮಾರಾಟಗಾರನೊಬ್ಬ ಆತನ ಬಳಿ ಹಣವಿಲ್ಲ ಎಂದು ಗೊತ್ತಿದ್ದರೂ ಉಚಿತವಾಗಿ ಬಿಸಿಯಾದ ಸಮೋಸಾ ಕೊಟ್ಟಿದ್ದ.

ಈ ಅನುಭವವನ್ನು ಹಂಚಿಕೊಂಡ ಶಾಸಕರು, "ನಾನು ಈ ಪ್ರಯೋಗದಿಂದ ಒಂದನ್ನು ಸ್ಪಷ್ಟವಾಗಿ ಗ್ರಹಿಸಿದೆ. ಮುಂಬೈ ಎಷ್ಟೇ ವೇಗವಾಗಿ ಓಡುತ್ತಿದ್ದರೂ, ಇಲ್ಲಿನ ಜನರ ಹೃದಯದಲ್ಲಿ ಇಂದಿಗೂ ಅಪರಿಚಿತರಿಗೆ ಸಹಾಯ ಮಾಡುವ ಅತಿ ದೊಡ್ಡ ಗುಣವಿದೆ" ಎಂದು ಭಾವನಾತ್ಮಕವಾಗಿ ನುಡಿದರು.

ಈ ವೇಷದ ಮೂಲಕ ಶಾಸಕರಿಗೆ ಸಮಾಜದ ಇನ್ನೊಂದು ಕಟು ಸತ್ಯವೂ ದರ್ಶನವಾಯಿತು. "ಸಾಮಾನ್ಯ ದಿನಗಳಲ್ಲಿ ಶಾಸಕನಾಗಿ ನಾನು ಹೋದಾಗ ಜನರು ಗೌರವದಿಂದ ಸಾಲಿನಲ್ಲಿ ನಿಂತು ಭೇಟಿಯಾಗುತ್ತಾರೆ. ಆದರೆ, ಅದೇ ಜನರು ನನ್ನನ್ನು ಭಿಕ್ಷುಕನ ರೂಪದಲ್ಲಿ ನೋಡಿದಾಗ ತಮ್ಮ ಎತ್ತರವನ್ನು ಹೆಚ್ಚಿಸಿಕೊಂಡು ನನ್ನನ್ನು ಕೆಳಗಿನಿಂದ ನೋಡಿದರು. ಅಧಿಕಾರ, ಹಣ ಮತ್ತು ವೇಷಭೂಷಣಗಳು ಬದಲಾದಾಗ ಜನರ ವ್ಯಾವಹಾರಿಕ ನಡವಳಿಕೆ ಹೇಗೆ ಬದಲಾಗುತ್ತದೆ ಎಂಬುದಕ್ಕೆ ಇದು ಉದಾಹರಣೆ. ಇದೇ ಜೀವನದ ಅಸಲಿ ವಾಸ್ತವ" ಎಂದು ಷಾ ತಮ್ಮ ಅನುಭವವನ್ನು ಹಂಚಿಕೊಂಡಿದ್ದಾರೆ.

ನಂತರ, ಅವರು ತಮ್ಮ ಮೇಕಪ್ ತೆಗೆದು, ಮಾಮೂಲಿ ಶಾಸಕರಾಗಿ ತಮಗೆ ಸಹಾಯ ಮಾಡಿದ ಅದೇ ಬೀದಿ ವ್ಯಾಪಾರಿಗಳು ಮತ್ತು ವ್ಯಕ್ತಿಗಳನ್ನು ಖುದ್ದಾಗಿ ಭೇಟಿ ಮಾಡಿ ಧನ್ಯವಾದ ಅರ್ಪಿಸಿದರು. ಪ್ರಸ್ತುತ, ಪರಾಗ್ ಷಾ ಭಿಕ್ಷುಕನಂತೆ ಅಲೆದಾಡುತ್ತಿರುವ ವೀಡಿಯೊಗಳು ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ವೈರಲ್ ಆಗುತ್ತಿವೆ.

ದೇಶದ ಅತ್ಯಂತ ಶ್ರೀಮಂತ ಶಾಸಕ!

ಎಡಿಆರ್ ವರದಿಯ ಪ್ರಕಾರ, ಪರಾಗ್ ಷಾ ಅವರು ದೇಶದಲ್ಲೇ ಅತಿ ಹೆಚ್ಚು ಆಸ್ತಿ ಹೊಂದಿರುವ ಹಾಲಿ ಶಾಸಕರಾಗಿದ್ದಾರೆ. 2024ರ ಮಹಾರಾಷ್ಟ್ರ ವಿಧಾನಸಭಾ ಚುನಾವಣೆಯ ಸಂದರ್ಭದಲ್ಲಿ ಅವರು ಸಲ್ಲಿಸಿದ ಅಫಿಡವಿಟ್‌ನಲ್ಲಿ ಬರೋಬ್ಬರಿ 3,383.06 ಕೋಟಿ ರೂಪಾಯಿ ಮೌಲ್ಯದ ಆಸ್ತಿಯನ್ನು ಘೋಷಿಸಿಕೊಂಡಿದ್ದಾರೆ.

ಅವರ ಬಳಿ 3,315.52 ಕೋಟಿ ರೂ. ಚರ ಆಸ್ತಿ ಹಾಗೂ 67.53 ಕೋಟಿ ರೂ. ಸ್ಥಿರ ಆಸ್ತಿಯಿದೆ. 2019 ರ ಚುನಾವಣೆಯಲ್ಲಿ ಅವರ ಆಸ್ತಿ 500 ಕೋಟಿ ರೂ. ಆಗಿತ್ತು. ಪ್ರಮುಖ ಉದ್ಯಮಿಯೂ ಆಗಿರುವ ಷಾ, 2024 ರ ಚುನಾವಣೆಯಲ್ಲಿ ಘಾಟ್‌ಕೋಪರ್ ಪೂರ್ವ ಕ್ಷೇತ್ರದಿಂದ ಎರಡನೇ ಬಾರಿಗೆ ಶಾಸಕರಾಗಿ ಆಯ್ಕೆಯಾಗಿದ್ದಾರೆ.

ಕೋಟಿ ಕೋಟಿ ಆಸ್ತಿಯೊಡೆಯನಾಗಿದ್ದರೂ, ಅಹಂಕಾರವನ್ನು ಕಳೆದುಕೊಂಡು ಜೀವನದ ವಾಸ್ತವಿಕತೆಯನ್ನು ಅರಿಯಲು ಅವರು ನಡೆಸಿದ ಈ ಸರಳ ಪ್ರಯತ್ನೀಗ ದೇಶಾದ್ಯಂತ ದೊಡ್ಡ ಚರ್ಚೆಗೆ ಮತ್ತು ಮೆಚ್ಚುಗೆಗೆ ಕಾರಣವಾಗಿದೆ.