ರಾಜಕೀಯ ಕೆಸರಾಟಕ್ಕೆ ಸಾಕ್ಷಿ ಆಗ್ತಿದೆ ಮನ್ಮುಲ್ ಹಗರಣ!

ಮನ್ಮುಲ್ ಹಗರಣ ವಿಚಾರ ಇದೀಗ ಶಾಸಕ ಹಾಗೂ ನಿರ್ದೇಶಕರ ನಡುವಿನ ಆರೋಪ-ಪ್ರತ್ಯಾರೋಪಕ್ಕೆ ಕಾರಣವಾಗಿದೆ. ಮಹಿಳಾ ಅಧಿಕಾರಿಗೆ ಬೆದರಿಕೆ ಆರೋಪದ ಬಗ್ಗೆ ತನಿಖೆಗೆ ಶಾಸಕ ಹೆಚ್.ಟಿ. ಮಂಜು ಆಗ್ರಹಿಸಿದ್ದಾರೆ. ಇತ್ತ, ಆರೋಪ ನಿರಾಕರಿಸಿರುವ ಮನ್ಮುಲ್ ನಿರ್ದೇಶಕ ಡಾಲು ರವಿ, ಇದು ರಾಜಕೀಯ ಪಿತೂರಿ ಎಂದು ತಿರುಗೇಟು ನೀಡಿದ್ದಾರೆ.

ಹೌದು, ಮನ್ಮುಲ್ ನಿರ್ದೇಶಕ ಡಾಲು ರವಿ ವಿರುದ್ಧ ಮಹಿಳಾ ಅಧಿಕಾರಿಗೆ ಬೆದರಿಕೆ ಹಾಕಿದ ಆರೋಪ ಕೇಳಿಬಂದಿದೆ. ಈ ಬಗ್ಗೆ ಮಹಿಳಾ ಅಧಿಕಾರಿ ತಮ್ಮ ನೋವನ್ನು ಶಾಸಕ ಹೆಚ್.ಟಿ.ಮಂಜು ಬಳಿ ತೋಡಿಕೊಂಡಿದ್ದು, ಜಿಲ್ಲಾಧಿಕಾರಿಗಳಿಗೆ ದೂರು ನೀಡುವಂತೆ ಸೂಚಿಸಿದ್ದಾಗಿ ಶಾಸಕರು ಹೇಳಿದ್ದಾರೆ. ಸಹಕಾರ ಕ್ಷೇತ್ರದಲ್ಲಿ ಅಧಿಕಾರದ ದುರುಪಯೋಗ ಹಾಗೂ ಗುಣಮಟ್ಟದ ಹಾಲನ್ನು ಫೇಲ್ ಮಾಡಲಾಗುತ್ತಿದೆ ಎಂಬ ಆರೋಪಗಳ ಬಗ್ಗೆಯೂ ಸಮಗ್ರ ತನಿಖೆಗೆ ಶಾಸಕ ಮಂಜು ಆಗ್ರಹಿಸಿದ್ದಾರೆ.

ಶಾಸಕರ ಆರೋಪ ತಳ್ಳಿ ಹಾಕಿದ ಡಾಲು ರವಿ:
ಆದ್ರೆ, ಶಾಸಕ ಹೆಚ್.ಟಿ.ಮಂಜು ಆರೋಪಗಳನ್ನು ಡಾಲು ರವಿ ತಳ್ಳಿಹಾಕಿದ್ದಾರೆ. ಯಾವುದೇ ಅಧಿಕಾರಿಗೆ ಬೆದರಿಕೆ ಹಾಕಿಲ್ಲ, ಕರ್ತವ್ಯದಲ್ಲಿ ನಿರ್ಲಕ್ಷ್ಯ ತೋರಿದ್ದಕ್ಕಾಗಿ ಗದರಿಸಿ ಕೆಲಸ ಮಾಡಿಸಿದ್ದಷ್ಟೇ ಎಂದು ಸ್ಪಷ್ಟನೆ ನೀಡಿದ್ದಾರೆ. ಆತ ನನ್ನ ವಿರುದ್ದ ಮನ್ಮುಲ್ ಚುನಾವಣೆಯಲ್ಲಿ ಹತಾಶನಾಗಿದ್ದಾನೆ. ನಾನು 2028 ಕ್ಕೆ ಕೆ.ಆರ್.ಪೇಟೆ ಕ್ಷೇತ್ರದ ಜೆಡಿಎಸ್ ಅಭ್ಯರ್ಥಿ ಅಗ್ತಿನಿ ಅಂತಾ. ನನ್ನನ್ನು ಈ ರೀತಿ ರಾಜಕೀಯವಾಗಿ ಮುಗಿಸಲು ಹುನ್ನಾರ ನಡೆಸಿದ್ದು ಈ ರೀತಿ ಆರೋಪ ಮಾಡುತ್ತಿದ್ದಾರೆ. ಆಕೆ ಭ್ರಷ್ಟ  ಅಧಿಕಾರಿಯಾಗಿದ್ದು ಕಮೀಷನ್ ದಂಧೆಯಲ್ಲಿದ್ದಾಳೆ. ಅಂತಹ  ಭ್ರಷ್ಟ ಅಧಿಕಾರಿಗೆ ಗದರಿ ನಮ್ಮ ತಾಲೂಕಿನ ಡೈರಿಗಳ ಕೆಲಸ ಮಾಡಿದ್ದೇನೆ. ಈಗ ಈತ ತನ್ನ ಅಸ್ತಿತ್ವ ಉಳಿಸಿಕೊಳ್ಳಲು ಆ ಮಹಿಳಾ ಅಧಿಕಾರಿ ಎತ್ತಿ ಕಟ್ಟಿದ್ದಾರೆ. ಈತ ಕ್ಷೇತ್ರದಲ್ಲಿ ಶಾಸಕನಾಗಿ ಅಕ್ರಮ ಗಣಿಗಾರಿಕೆ ಕಮಿಷನ್ ಧಂಧೆ ಮಾಡ್ತಿದ್ದಾನೆ. ನನ್ನನ್ನು ರಾಜಕೀಯವಾಗಿ ಮುಗಿಸಲು ಬಂದ್ರೆ ಈತನ ಎಲ್ಲಾ ದಂಧೆ ಅಕ್ರಮಗಳನ್ನು ಬಿಚ್ಚಿಡುವುದಾಗಿ ಮನ್ಮುಲ್ ನಿರ್ದೇಶಕ ಡಾಲು ರವಿ ಎಚ್ಚರಿಕೆ ನೀಡಿದ್ದಾರೆ.

ಒಟ್ಟಾರೆ  ಮನ್ಮುಲ್ ವಿಚಾರ ಇದೀಗ ರಾಜಕೀಯ ಆರೋಪ-ಪ್ರತ್ಯಾರೋಪಕ್ಕೆ ಸಾಕ್ಷಿಯಾಗಿದ್ದು. ಶಾಸಕ ಹೆಚ್. ಟಿ.ಮಂಜು V/S ಡಾಲು ರವಿ ನಡೂವೆ ರಾಜಕೀಯ ವೈಷಮ್ಯ ಎದುರಾಗಿದೆ. ಬೆದರಿಕೆ ಆರೋಪ ಹಾಗೂ ಹಾಲಿನ ಗುಣಮಟ್ಟದ ವಿವಾದದ ಸತ್ಯಾಸತ್ಯತೆ ತನಿಖೆಯಿಂದಷ್ಟೇ ಸ್ಪಷ್ಟವಾಗಬೇಕಿದೆ.

ಮನ್ಮುಲ್ ಹಾಲಿನ ಪುಡಿ ಕಲಬೆರಕೆ ಪ್ರಕರಣ ಖಂಡಿಸಿ ಪ್ರೊಟೆಸ್ಟ್.:
ಇನ್ನು ಮನ್ಮುಲ್‌ ಹಾಲಿನ ಪುಡಿ ಕಲಬೆರಕೆ ಪ್ರಕರಣವನ್ನು ಖಂಡಿಸಿ ಕರ್ನಾಟಕ ಪ್ರಾಂತ ರೈತ ಸಂಘ, ಹಾಲು ಉತ್ಪಾದಕರ ಹೋರಾಟ ಸಮಿತಿಯಿಂದ ಮಂಡ್ಯದ ಡಿಸಿ ಕಚೇರಿ ಬಳಿ ಪ್ರತಿಭಟನೆ ನಡೆಸಲಾಯಿತು. ಡಿಸಿ ಕಚೇರಿಗೆ ಮುತ್ತಿಗೆ ಹಾಕಿ ರಾಜ್ಯ ಸರ್ಕಾರದ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ ರೈತರು, ಜಿಲ್ಲೆಯ ರೈತರು ಹೈನುಗಾರಿಕೆಯನ್ನೇ ನಂಬಿ ಜೀವನ ನಡೆಸುತ್ತಿದ್ದಾರೆ. ಮನ್ಮುಲ್ ನಲ್ಲಿ ಹಗರಣದ ಮೇಲೆ ಹಗರಣ ನಡೆಯುತ್ತಿವೆ. ಹಾಲಿನ ಪುಡಿ ಕಲಬೆರಕೆ ಪ್ರಕರಣದ ಹಿಂದೆ ಕಾಣದ ಕೈವಾಡ ಇದೆ. ತಪ್ಪಿತಸ್ಥರ ವಿರುದ್ಧ ಕ್ರಿಮಿನಲ್ ಮೊಕದ್ದಮೆ ದಾಖಲಿಸಿ. ರೈತರಿಗೆ 2 ರೂ. ಪ್ರೋತ್ಸಾಹ ಧನ ನೀಡಲು ಆಗಲ್ಲ ಕೋಟ್ಯಾಂತರ ರೂ. ಹಗರಣ ಮಾಡ್ತಾರೆ. ಈ ಪ್ರಕರಣವನ್ನು ಹೈಕೋರ್ಟ್ ನಿವೃತ್ತ ನ್ಯಾಯಮೂರ್ತಿಗಳಿಂದ ಸಮಗ್ರ ತನಿಖೆ ನಡೆಸಬೇಕು ಎಂದು ಆಗ್ರಹಿಸಿದ್ದಾರೆ.