ಕೆಪಿಎಸ್​ಸಿ ಪಶು ವೈದ್ಯಾಧಿಕಾರಿಗಳ ನೇಮಕಾತಿ ಅಕ್ರಮ: ಬಸವರಾಜ್‌ ಕನ್ನಾಳೆ ಡೈರಿಯಲ್ಲಿ ಸಿಕ್ತು ಸ್ಫೋಟಕ ಮಾಹಿತಿ!

KPSC Recruitment Fraud Case: ಕರ್ನಾಟಕ ಲೋಕಸೇವಾ ಆಯೋಗದ (KPSC) ಪರೀಕ್ಷಾ ಅಕ್ರಮ ಪ್ರಕರಣಕ್ಕೆ ಸಂಬಂಧಿಸಿದಂತೆ ಆರೋಪಿ ಬಸವರಾಜ್ ಕನ್ನಾಳೆ ಹಣಕಾಸಿನ ವ್ಯವಹಾರಗಳ ಕುರಿತು ಬರೆದಿದ್ದಾರೆ ಎನ್ನಲಾದ ಡೈರಿಯ ವಿವರಗಳು ಇದೀಗ ಗಮನ ಸೆಳೆದಿವೆ. ಅಭ್ಯರ್ಥಿಗಳಿಂದ ಸ್ವೀಕರಿಸಿದ ಹಣ ಹಾಗೂ ಇನ್ನೂ ಬರಬೇಕಿರುವ ಮೊತ್ತದ ಲೆಕ್ಕವನ್ನ ಡೈರಿಯಲ್ಲಿ ದಾಖಲಿಸಿರುವುದಾಗಿ ವರದಿಯಾಗಿದೆ. ಈ ಡೈರಿಯ ಕೆಲವು ಪುಟಗಳು ತನಿಖೆಯ ವೇಳೆ ಲಭ್ಯವಾಗಿದ್ದು, ಪ್ರಕರಣದ ಹಣಕಾಸಿನ ವ್ಯವಹಾರಗಳ ಕುರಿತು ಮತ್ತಷ್ಟು ಮಾಹಿತಿ ಹೊರಬರುವ ಸಾಧ್ಯತೆಯಿದೆ.  

ಆರೋಪಿ ಬಸವರಾಜ್ ಕನ್ನಾಳೆ ಹಣದ ಲೆಕ್ಕ ಬರೆದಿದ್ದ ಡೈರಿ ಜೀ ಕನ್ನಡ ನ್ಯೂಸ್‌ಗೆ ಲಭ್ಯವಾಗಿದೆ. ಡೈರಿ ವಿವರಗಳ ಪ್ರಕಾರ, ಅಭ್ಯರ್ಥಿಗಳ ಹೆಸರು, ಅವರಿಂದ ಬರಬೇಕಿರುವ ಹಣದ ಮೊತ್ತ ಹಾಗೂ ಬ್ಯಾಂಕ್ ಖಾತೆಗಳಿಗೆ ಸಂಬಂಧಿಸಿದ ಮಾಹಿತಿಗಳನ್ನ ದಾಖಲಿಸಲಾಗಿದೆ. ಕೆಲವು ಕಡೆಗಳಲ್ಲಿ 'ಬರಬೇಕಾಗಿರುವುದು' ಎಂಬ ಕನ್ನಡ ಪದವನ್ನೇ ಬಳಸಿ ಬಾಕಿ ಹಣದ ಲೆಕ್ಕವನ್ನ ಬರೆದಿರುವುದು ಕಂಡುಬಂದಿದೆ ಎಂದು ವರದಿಯಾಗಿದೆ. ಅಕ್ರಮವಾಗಿ ಪರೀಕ್ಷೆ ಬರೆದಿದ್ದವರ ಹಣ ಪಾವತಿಯ ಲಿಸ್ಟ್‌ ಬಗ್ಗೆಯೂ ಜೀ ಕನ್ನಡ ನ್ಯೂಸ್‌ಗೆ ಇಂಚಿಚು ಮಾಹಿತಿ ಲಭ್ಯವಾಗಿದೆ.  

ಎಂಟು ಅಭ್ಯರ್ಥಿಗಳಿಂದ ಬರಬೇಕಿದ್ದ ಹಣದ ಲೆಕ್ಕ

ಬಸವರಾಜ್ ಕನ್ನಾಳೆ ಬರೆದಿದ್ದಾರೆ ಎನ್ನಲಾದ ಡೈರಿಯ ಹಾಳೆಯಲ್ಲಿ ಎಂಟು ಅಭ್ಯರ್ಥಿಗಳಿಂದ ಬರಬೇಕಿದ್ದ ಹಣದ ಮೊತ್ತ ನಮೂದಾಗಿದೆ ಎಂದು ತಿಳಿದುಬಂದಿದೆ. ಲಭ್ಯವಾಗಿರುವ ಮಾಹಿತಿಯ ಪ್ರಕಾರ, ಅಭ್ಯರ್ಥಿಗಳ ಹೆಸರು ಮತ್ತು ಅವರ ಹೆಸರಿನ ಎದುರು ಬರಬೇಕಿರುವ ಮೊತ್ತವನ್ನ ಈ ಕೆಳಗಿನಂತೆ ದಾಖಲಿಸಲಾಗಿದೆ.

* ಮಂಜುನಾಥ್ – 10 ಲಕ್ಷ ರೂ.
* ಪೂಜಾ – 10 ಲಕ್ಷ ರೂ.
* ಅಶ್ವಿನಿ ಕುಮಾರ್ – 10 ಲಕ್ಷ ರೂ.
* ಮೋಹನ್ ಕುಮಾರ್ – 5 ಲಕ್ಷ ರೂ.
* ಸಂಗಮೇಶ್ – 10 ಲಕ್ಷ ರೂ.
* ಪದ್ಮಾವತಿ – 10 ಲಕ್ಷ ರೂ.
* ಹರೀಶ್ – 10 ಲಕ್ಷ ರೂ.

ಈ ಏಳು ಹೆಸರುಗಳ ಎದುರು ನಮೂದಿಸಿರುವ ಮೊತ್ತದ ಒಟ್ಟು 65 ಲಕ್ಷ ರೂ. ಆಗುತ್ತದೆ. ಅಭ್ಯರ್ಥಿಗಳಿಂದ ಹಣ ಸ್ವೀಕರಿಸಿರುವುದು ಹಾಗೂ ಬಾಕಿ ಉಳಿದಿರುವುದನ್ನ ಡೈರಿಯಲ್ಲಿ ಬರೆದಿಟ್ಟಿರುವುದು ತಿಳಿದುಬಂದಿದೆ. ಡೈರಿಯಲ್ಲಿ ಉಲ್ಲೇಖವಾಗಿರುವ ಈ ಹಣದ ಸ್ವರೂಪ, ಯಾವ ಉದ್ದೇಶಕ್ಕೆ ಪಡೆಯಲಾಗಿತ್ತು ಮತ್ತು ವಾಸ್ತವವಾಗಿ ಹಣ ಪಾವತಿಯಾಗಿದೆಯೇ ಎಂಬುದನ್ನ ತನಿಖಾಧಿಕಾರಿಗಳು ಪರಿಶೀಲಿಸಬೇಕಿದೆ.

ಇಡಿ ಪರಿಶೀಲನೆ ವೇಳೆ ಸಿಕ್ಕಿತೇ ಬಾಕಿ ಲೆಕ್ಕದ ಹಾಳೆ?

ಜಾರಿ ನಿರ್ದೇಶನಾಲಯದ (ED) ಅಧಿಕಾರಿಗಳು ಬಸವರಾಜ್ ಕನ್ನಾಳೆ ಮನೆ ಪರಿಶೀಲನೆ ನಡೆಸಿದ ಸಂದರ್ಭದಲ್ಲಿ ಬಾಕಿ ಹಣದ ಲೆಕ್ಕವಿರುವ ಡೈರಿಯ ಹಾಳೆ ಸಿಕ್ಕಿದೆ ಎಂದು ವರದಿಯಾಗಿದೆ. ಈ ಹಾಳೆಯಲ್ಲಿ ಅಭ್ಯರ್ಥಿಗಳಿಂದ ಬರಬೇಕಿರುವ ಹಣದ ಮೊತ್ತವನ್ನ ಪ್ರತ್ಯೇಕವಾಗಿ ದಾಖಲಿಸಲಾಗಿದೆ ಎನ್ನಲಾಗಿದೆ. ಬ್ಯಾಂಕ್ ಖಾತೆ ಸಂಖ್ಯೆಗಳು, ಹಣದ ಮೊತ್ತಗಳು ಹಾಗೂ ಜಲಸಂಪನ್ಮೂಲ ಇಲಾಖೆಗೆ ಸಂಬಂಧಿಸಿದ ಉಲ್ಲೇಖಗಳೂ ಡೈರಿಯಲ್ಲಿ ಕಂಡುಬಂದಿವೆ ಎಂದು ವರದಿಗಳು ತಿಳಿಸಿವೆ. ಈ ವಿವರಗಳು ಪ್ರಕರಣದ ಹಣಕಾಸಿನ ವಹಿವಾಟುಗಳ ತನಿಖೆಯಲ್ಲಿ ಮಹತ್ವ ಪಡೆಯುವ ಸಾಧ್ಯತೆಯಿದೆ. ಆದರೆ ಡೈರಿಯಲ್ಲಿರುವ ಪ್ರತಿಯೊಂದು ನಮೂದಿನ ಹಿನ್ನೆಲೆ, ಹಣದ ಮೂಲ ಹಾಗೂ ಅದರೊಂದಿಗೆ ಸಂಬಂಧಿಸಿದ ವ್ಯಕ್ತಿಗಳ ಪಾತ್ರದ ಬಗ್ಗೆ ಅಧಿಕೃತ ತನಿಖೆಯ ಫಲಿತಾಂಶವೇ ಅಂತಿಮವಾಗಲಿದೆ.

ಅಭ್ಯರ್ಥಿಗಳಿಗೆ ವಿಲ್ಲಾಗಳಲ್ಲಿ ತರಬೇತಿ ನೀಡಿದ ಆರೋಪ

ಕೆಪಿಎಸ್‌ಸಿ ನೇಮಕಾತಿ ಪರೀಕ್ಷಾ ಅಕ್ರಮ ಪ್ರಕರಣದಲ್ಲಿ ಸುಮಾರು 20ಕ್ಕೂ ಅಧಿಕ ಅಭ್ಯರ್ಥಿಗಳಿಗೆ ತರಬೇತಿ ನೀಡಲು ಬಸವರಾಜ್ ಕನ್ನಾಳೆ ಮೂರು ವಿಲ್ಲಾಗಳನ್ನ ಬುಕ್ ಮಾಡಿದ್ದನೆಂಬ ಆರೋಪವೂ ಕೇಳಿಬಂದಿದೆ. ಪಶುವೈದ್ಯಾಧಿಕಾರಿಗಳ ನೇಮಕಾತಿ ಪರೀಕ್ಷೆಗೆ ಸಂಬಂಧಿಸಿದ ಅಕ್ರಮಗಳ ತನಿಖೆಯಲ್ಲಿ ಅಭ್ಯರ್ಥಿಗಳಿಗೆ ಪ್ರಶ್ನೆಪತ್ರಿಕೆ ಸೋರಿಕೆ ಹಾಗೂ ಪರೀಕ್ಷೆಗೆ ಮುನ್ನ ತರಬೇತಿ ನೀಡಿದ ಆರೋಪಗಳು ಬೆಳಕಿಗೆ ಬಂದಿವೆ. ಈ ಸಂಬಂಧ ಅಪರಾಧ ತನಿಖಾ ಇಲಾಖೆ (CID) ಮತ್ತು ಜಾರಿ ನಿರ್ದೇಶನಾಲಯ (ED) ಪ್ರತ್ಯೇಕವಾಗಿ ತನಿಖೆ ನಡೆಸುತ್ತಿವೆ. ವರದಿಯ ಪ್ರಕಾರ, ದೇವನಹಳ್ಳಿ ಸಮೀಪದ ವಿಲ್ಲಾಗಳಲ್ಲಿ ಅಭ್ಯರ್ಥಿಗಳಿಗೆ ವಸತಿ ವ್ಯವಸ್ಥೆ ಮಾಡಲಾಗಿತ್ತು ಎಂಬ ಆರೋಪದ ಬಗ್ಗೆಯೂ ತನಿಖೆ ನಡೆಯುತ್ತಿದೆ.  

ಹಣಕಾಸಿನ ವ್ಯವಹಾರಗಳ ಬಗ್ಗೆ ತನಿಖೆ

ಕೆಪಿಎಸ್‌ಸಿ ಪರೀಕ್ಷಾ ಅಕ್ರಮ ಪ್ರಕರಣದಲ್ಲಿ ಅಭ್ಯರ್ಥಿಗಳಿಂದ ಹಣ ಸಂಗ್ರಹಣೆ, ಬ್ಯಾಂಕ್ ವಹಿವಾಟುಗಳು ಮತ್ತು ಪ್ರಶ್ನೆಪತ್ರಿಕೆ ಸೋರಿಕೆಯ ಆರೋಪಗಳ ಕುರಿತು ತನಿಖಾ ಸಂಸ್ಥೆಗಳು ದಾಖಲೆಗಳನ್ನ ಪರಿಶೀಲಿಸುತ್ತಿವೆ. ಈ ಹಿನ್ನೆಲೆಯಲ್ಲಿ ಕನ್ನಾಳೆ ಡೈರಿಯಲ್ಲಿ ಉಲ್ಲೇಖವಾಗಿರುವ ಹಣದ ಲೆಕ್ಕಾಚಾರವೂ ತನಿಖೆಯ ಭಾಗವಾಗುವ ಸಾಧ್ಯತೆಯಿದೆ. ಡೈರಿಯಲ್ಲಿ ನಮೂದಾಗಿರುವ ಮೊತ್ತಗಳು ನಿಜವಾಗಿಯೂ ಪಾವತಿಯಾಗಿವೆಯೇ, ಯಾವ ಖಾತೆಗಳಿಗೆ ಹಣ ವರ್ಗಾವಣೆಯಾಗಿದೆ ಹಾಗೂ ಈ ವ್ಯವಹಾರಗಳಿಗೆ ಸಂಬಂಧಿಸಿದವರ ಪಾತ್ರವೇನು ಎಂಬುದು ತನಿಖೆಯಿಂದ ಸ್ಪಷ್ಟವಾಗಬೇಕಿದೆ.

ಒಟ್ನಲ್ಲಿ ಕೆಪಿಎಸ್‌ಸಿ ನೇಮಕಾತಿ ಅಕ್ರಮ ಪ್ರಕರಣದಲ್ಲಿ ಡೈರಿಯಲ್ಲಿನ ಬಾಕಿ ಹಣದ ಲೆಕ್ಕಗಳು ಹೊಸ ಚರ್ಚೆಗೆ ಕಾರಣವಾಗಿವೆ. ಆದರೆ ಡೈರಿಯಲ್ಲಿರುವ ವಿವರಗಳು ಆರೋಪಗಳ ಭಾಗವಾಗಿದ್ದು, ಹಣಕಾಸಿನ ವ್ಯವಹಾರಗಳ ನೈಜ ಸ್ವರೂಪವನ್ನ ತನಿಖಾ ಸಂಸ್ಥೆಗಳ ಅಧಿಕೃತ ಪರಿಶೀಲನೆ ಮತ್ತು ನ್ಯಾಯಾಲಯದ ಪ್ರಕ್ರಿಯೆಗಳು ನಿರ್ಧರಿಸಲಿವೆ.