ಬೆಂಗಳೂರಿನ ರಸ್ತೆಗಳಲ್ಲಿ ಕತ್ತಲೆ! 2,290 ಬೀದಿದೀಪಗಳು ಹಾಳು; ಗುತ್ತಿಗೆದಾರರಿಗೆ ₹16.03 ಲಕ್ಷ ದಂಡ

Bengaluru Street Lights: ಸಿಲಿಕಾನ್‌ ಸಿಟಿ ಬೆಂಗಳೂರಿನ ಪ್ರಮುಖ ರಸ್ತೆಗಳಲ್ಲಿ ಬೀದಿದೀಪಗಳ ನಿರ್ವಹಣೆಯಲ್ಲಿ ಲೋಪ ಕಂಡುಬಂದ ಹಿನ್ನೆಲೆಯಲ್ಲಿ ಬೆಂಗಳೂರು ಉತ್ತರ ನಗರ ಪಾಲಿಕೆ ವ್ಯಾಪ್ತಿಯಲ್ಲಿ ಸಂಬಂಧಿಸಿದ ಗುತ್ತಿಗೆದಾರರಿಗೆ ಒಟ್ಟು ₹16.03 ಲಕ್ಷ ದಂಡ ವಿಧಿಸಲಾಗಿದೆ. ಇದೇ ಸೆಪ್ಟೆಂಬರ್ 10 ಮತ್ತು 11 ರಂದು ನಡೆದ ರಾತ್ರಿ ತಪಾಸಣೆಯಲ್ಲಿ ಒಟ್ಟು 2,290 ಹಾಳಾದ ವಿದ್ಯುತ್ ಬೀದಿದೀಪಗಳು ಪತ್ತೆಯಾಗಿವೆ. ಈ ಕುರಿತು ನೀಡಿರುವ ಅಧಿಕೃತ ಪ್ರಕಟಣೆಯಲ್ಲಿ 2,290 ದೋಷಪೂರಿತ ಬೀದಿದೀಪಗಳಿಗೆ ಒಟ್ಟು ₹16,03,000 ದಂಡ ವಿಧಿಸಿರುವ ಮಾಹಿತಿ ಇದೆ.

ನಗರದ ಅರ್ಟೀರಿಯಲ್ (Arterial) ಮತ್ತು ಸಬ್-ಅರ್ಟೀರಿಯಲ್ (Sub-Arterial) ರಸ್ತೆಗಳಲ್ಲಿನ ಬೀದಿದೀಪಗಳ ಕಾರ್ಯನಿರ್ವಹಣೆ ಹಾಗೂ ನಿರ್ವಹಣೆಯನ್ನ ಪರಿಶೀಲಿಸುವ ಉದ್ದೇಶದಿಂದ ಈ ರಾತ್ರಿ ತಪಾಸಣೆ ನಡೆಸಲಾಗಿದೆ. ಗುತ್ತಿಗೆದಾರರು ನಿಯಮಿತವಾಗಿ ಬೀದಿದೀಪಗಳ ಪರಿಶೀಲನೆ ಮತ್ತು ನಿರ್ವಹಣೆ ಮಾಡುತ್ತಿದ್ದಾರೆಯೇ ಎಂಬುದನ್ನೂ ಅಧಿಕಾರಿಗಳು ಪರಿಶೀಲಿಸಿದ್ದಾರೆ.

156 ಪ್ರಮುಖ ರಸ್ತೆಗಳಲ್ಲಿ ತಪಾಸಣೆ

ಬೆಂಗಳೂರು ಉತ್ತರ ನಗರ ಪಾಲಿಕೆ ಆಯುಕ್ತ ಪೊಮ್ಮಲ ಸುನಿಲ್ ಕುಮಾರ್ ಅವರ ನೇತೃತ್ವದಲ್ಲಿ ನಡೆದ ಈ ತಪಾಸಣೆಯಲ್ಲಿ ಪಾಲಿಕೆಯ ಹಿರಿಯ ಅಧಿಕಾರಿಗಳು ಹಾಗೂ ಅಭಿಯಂತರರ ತಂಡ ಭಾಗವಹಿಸಿತ್ತು. ಯಲಹಂಕ, ಬ್ಯಾಟರಾಯನಪುರ, ಪುಲಕೇಶಿನಗರ, ದಾಸರಹಳ್ಳಿ, ಸರ್ವಜ್ಞನಗರ, ಹೆಬ್ಬಾಳ ಹಾಗೂ ರಾಜರಾಜೇಶ್ವರಿನಗರ ವ್ಯಾಪ್ತಿಯ ಮೂರು ವಾರ್ಡ್‌ಗಳನ್ನ ಒಳಗೊಂಡಂತೆ ಒಟ್ಟು 156 ಪ್ರಮುಖ ಅರ್ಟೀರಿಯಲ್ ಮತ್ತು ಸಬ್-ಅರ್ಟೀರಿಯಲ್ ರಸ್ತೆಗಳನ್ನ ಜಂಟಿಯಾಗಿ ಪರಿಶೀಲಿಸಲಾಯಿತು. ರಾತ್ರಿ ವೇಳೆ ನಡೆಸಿದ ಪರಿಶೀಲನೆಯ ಸಂದರ್ಭದಲ್ಲಿ ಹಲವು ಪ್ರದೇಶಗಳಲ್ಲಿ ಬೀದಿದೀಪಗಳು ಕಾರ್ಯನಿರ್ವಹಿಸದಿರುವುದು ಕಂಡುಬಂದಿದೆ. ಇದರಿಂದ ಸಾರ್ವಜನಿಕರ ಸುರಕ್ಷತೆಗೆ ಸಂಬಂಧಿಸಿದಂತೆ ಕತ್ತಲೆ ಪ್ರದೇಶಗಳು ಅಥವಾ ‘Dark Spots’ ಉಂಟಾಗಿರುವುದು ಅಧಿಕಾರಿಗಳ ಗಮನಕ್ಕೆ ಬಂದಿದೆ.

ಬ್ಯಾಟರಾಯನಪುರದಲ್ಲಿ 905 ದೀಪಗಳು ಹಾಳು

ತಪಾಸಣೆಯಲ್ಲಿ ಕ್ಷೇತ್ರವಾರು ಗಮನಾರ್ಹ ಪ್ರಮಾಣದಲ್ಲಿ ದೋಷಪೂರಿತ ಬೀದಿದೀಪಗಳು ಪತ್ತೆಯಾಗಿವೆ. ಯಲಹಂಕ ಕ್ಷೇತ್ರದಲ್ಲಿ 26 ಹಾಗೂ ಬ್ಯಾಟರಾಯನಪುರ ಕ್ಷೇತ್ರದಲ್ಲಿ 905 ಹಾಳಾದ ಬೀದಿದೀಪಗಳನ್ನ ಗುರುತಿಸಲಾಗಿದೆ. ಈ ಎರಡೂ ಕ್ಷೇತ್ರಗಳ ನಿರ್ವಹಣೆಗೆ ಸಂಬಂಧಿಸಿದ eSmart Energy Solutions Limited ಸಂಸ್ಥೆಗೆ ಒಟ್ಟು ₹6,51,700 ದಂಡ ವಿಧಿಸಲಾಗಿದೆ. ಬ್ಯಾಟರಾಯನಪುರದಲ್ಲಿ ಮಾತ್ರ 905 ಬೀದಿದೀಪಗಳು ಕಾರ್ಯನಿರ್ವಹಿಸದಿರುವುದು ಪತ್ತೆಯಾಗಿರುವುದು ತಪಾಸಣೆಯ ಪ್ರಮುಖ ಅಂಶವಾಗಿದೆ. ಸಾರ್ವಜನಿಕರು ಹೆಚ್ಚಿನ ಪ್ರಮಾಣದಲ್ಲಿ ಸಂಚರಿಸುವ ಪ್ರಮುಖ ರಸ್ತೆಗಳಲ್ಲಿ ಬೀದಿದೀಪಗಳ ನಿರ್ವಹಣೆ ಸಮರ್ಪಕವಾಗಿರಬೇಕಾದ ಅಗತ್ಯವನ್ನ ಈ ಪರಿಶೀಲನೆ ಒತ್ತಿಹೇಳಿದೆ.

ಸರ್ವಜ್ಞನಗರದಲ್ಲಿ 1,075 ದೋಷಪೂರಿತ ದೀಪ

ಇನ್ನು ಪುಲಕೇಶಿನಗರದಲ್ಲಿ 82, ಸರ್ವಜ್ಞನಗರದಲ್ಲಿ 1,075 ಹಾಗೂ ಹೆಬ್ಬಾಳದಲ್ಲಿ 79 ಹಾಳಾದ ಬೀದಿದೀಪಗಳನ್ನ ಅಧಿಕಾರಿಗಳು ಗುರುತಿಸಿದ್ದಾರೆ. ಈ ಮೂರು ಕ್ಷೇತ್ರಗಳ ಬೀದಿದೀಪ ನಿರ್ವಹಣೆಗೆ ಸಂಬಂಧಿಸಿದ M/s. Effilume Private Limited ಸಂಸ್ಥೆಗೆ ₹8,65,200 ದಂಡ ವಿಧಿಸಲಾಗಿದೆ. ಈ ಪೈಕಿ ಸರ್ವಜ್ಞನಗರ ಕ್ಷೇತ್ರದಲ್ಲಿ 1,075 ಬೀದಿದೀಪಗಳು ಕಾರ್ಯನಿರ್ವಹಿಸದಿರುವುದು ದಾಖಲೆಯಲ್ಲಿನ ಅತಿ ಹೆಚ್ಚು ಕ್ಷೇತ್ರವಾರು ಸಂಖ್ಯೆ ಆಗಿದೆ. ಪ್ರಮುಖ ರಸ್ತೆಗಳಲ್ಲಿ ಇಂತಹ ದೋಷಗಳು ಕಂಡುಬಂದ ಹಿನ್ನೆಲೆಯಲ್ಲಿ ನಿರ್ವಹಣಾ ಒಪ್ಪಂದದ ನಿಯಮಗಳು ಮತ್ತು ಷರತ್ತುಗಳ ಅನ್ವಯ ದಂಡ ವಿಧಿಸಲಾಗಿದೆ.

ದಾಸರಹಳ್ಳಿ, ರಾಜರಾಜೇಶ್ವರಿನಗರದಲ್ಲೂ ದಂಡ

ದಾಸರಹಳ್ಳಿ ಕ್ಷೇತ್ರದಲ್ಲಿ 96 ಹಾಳಾದ ಬೀದಿದೀಪಗಳು ಪತ್ತೆಯಾಗಿದ್ದು, ಈ ವ್ಯಾಪ್ತಿಯ ಗುತ್ತಿಗೆದಾರ M/s. Trans Global Power Limited ಸಂಸ್ಥೆಗೆ ₹67,200 ದಂಡ ವಿಧಿಸಲಾಗಿದೆ. ಅದೇ ರೀತಿ ರಾಜರಾಜೇಶ್ವರಿನಗರ ಕ್ಷೇತ್ರದಲ್ಲಿ 27 ದೋಷಪೂರಿತ ಬೀದಿದೀಪಗಳನ್ನ ಗುರುತಿಸಲಾಗಿದ್ದು, ಸಂಬಂಧಿಸಿದ ಗುತ್ತಿಗೆದಾರರಿಗೆ ₹18,900 ದಂಡ ವಿಧಿಸಲಾಗಿದೆ. ಹೀಗೆ ಯಲಹಂಕದಿಂದ ರಾಜರಾಜೇಶ್ವರಿನಗರದವರೆಗೆ ಹಲವು ಕ್ಷೇತ್ರಗಳಲ್ಲಿ ನಡೆದ ರಾತ್ರಿ ಪರಿಶೀಲನೆಯಲ್ಲಿ ಒಟ್ಟು 2,290 ಬೀದಿದೀಪಗಳು ಕಾರ್ಯನಿರ್ವಹಿಸದಿರುವುದು ಕಂಡುಬಂದಿದೆ.

O&M ಒಪ್ಪಂದದಡಿ ದಂಡ

ಬೀದಿದೀಪಗಳ ನಿರ್ವಹಣೆಯನ್ನ ಕೈಗೊಂಡಿರುವ ಗುತ್ತಿಗೆದಾರರು ನಿರ್ದಿಷ್ಟ ನಿಯಮಗಳು ಮತ್ತು ಷರತ್ತುಗಳಂತೆ ನಿರ್ವಹಣೆ ಮಾಡಬೇಕಾಗುತ್ತದೆ. ಈ ಸಂದರ್ಭದಲ್ಲಿ ನಡೆದ ತಪಾಸಣೆಯಲ್ಲಿ ದೋಷಪೂರಿತ ದೀಪಗಳು ಪತ್ತೆಯಾದ ಹಿನ್ನೆಲೆಯಲ್ಲಿ ಸಂಬಂಧಿಸಿದ O&M (Operation & Maintenance) Agreement ನಿಯಮಗಳ ಪ್ರಕಾರ ಗುತ್ತಿಗೆದಾರರಿಗೆ ಆರ್ಥಿಕ ದಂಡ ವಿಧಿಸಲಾಗಿದೆ. ಅಧಿಕೃತ ದಾಖಲೆಯಲ್ಲಿರುವ ಪಟ್ಟಿಯ ಪ್ರಕಾರ, ಒಟ್ಟು 2,290 ದೋಷಪೂರಿತ ಬೀದಿದೀಪಗಳಿಗೆ ₹16,03,000 ದಂಡ ವಿಧಿಸಲಾಗಿದೆ.

ತಕ್ಷಣವೇ ದುರಸ್ತಿಗೆ ಸೂಚನೆ

ಇದರ ಬೆನ್ನಲ್ಲೇ ಹಾಳಾದ ಬೀದಿದೀಪಗಳನ್ನ ತಕ್ಷಣವೇ ದುರಸ್ತಿ ಪಡಿಸುವಂತೆ ಪಾಲಿಕೆ ಆಯುಕ್ತರು ಅಧಿಕಾರಿಗಳಿಗೆ ಹಾಗೂ ಸಂಬಂಧಿಸಿದ ನಿರ್ವಹಣಾ ಸಿಬ್ಬಂದಿಗೆ ಸೂಚನೆ ನೀಡಿದ್ದಾರೆ. ಸಾರ್ವಜನಿಕರ ಸುರಕ್ಷತೆ ಹಾಗೂ ರಾತ್ರಿ ಸಂಚಾರದ ದೃಷ್ಟಿಯಿಂದ ಪ್ರಮುಖ ರಸ್ತೆಗಳಲ್ಲಿ ಬೀದಿದೀಪಗಳು ಸಮರ್ಪಕವಾಗಿ ಕಾರ್ಯನಿರ್ವಹಿಸುವುದು ಅಗತ್ಯವಾಗಿರುವ ಹಿನ್ನೆಲೆಯಲ್ಲಿ ದುರಸ್ತಿ ಕಾರ್ಯಕ್ಕೆ ಆದ್ಯತೆ ನೀಡುವಂತೆ ಸೂಚಿಸಲಾಗಿದೆ.

ಬೀದಿದೀಪಗಳು ಕಾರ್ಯನಿರ್ವಹಿಸದಿರುವುದರಿಂದ ರಸ್ತೆಯ ಕೆಲವು ಭಾಗಗಳಲ್ಲಿ ಕತ್ತಲೆ ಪ್ರದೇಶಗಳು ನಿರ್ಮಾಣವಾಗುವ ಸಾಧ್ಯತೆ ಇದೆ. ಹೀಗಾಗಿ ಇಂತಹ ದೋಷಗಳನ್ನ ನಿಯಮಿತವಾಗಿ ಪತ್ತೆಹಚ್ಚಿ, ಸಮಯಕ್ಕೆ ಸರಿಯಾಗಿ ದುರಸ್ತಿ ಮಾಡುವ ವ್ಯವಸ್ಥೆ ಬಲಪಡಿಸುವ ಅಗತ್ಯವಿದೆ. ರಾತ್ರಿ ತಪಾಸಣೆಯ ಮೂಲಕ ಪತ್ತೆಯಾದ ದೋಷಗಳಿಗೆ ದಂಡ ವಿಧಿಸಿರುವುದರ ಜೊತೆಗೆ, ಹಾಳಾದ ದೀಪಗಳನ್ನ ಶೀಘ್ರವಾಗಿ ಸರಿಪಡಿಸುವ ಕ್ರಮಕ್ಕೂ ಒತ್ತು ನೀಡಲಾಗಿದೆ.

ಒಟ್ಟಾರೆ ₹16.03 ಲಕ್ಷ ದಂಡ

ಒಟ್ನಲ್ಲಿ ಬೆಂಗಳೂರು ಉತ್ತರ ನಗರ ಪಾಲಿಕೆ ವ್ಯಾಪ್ತಿಯ ಪ್ರಮುಖ ರಸ್ತೆಗಳಲ್ಲಿ ನಡೆದ ರಾತ್ರಿ ತಪಾಸಣೆಯಲ್ಲಿ 2,290 ಬೀದಿದೀಪಗಳು ಹಾಳಾಗಿರುವುದು ಪತ್ತೆಯಾಗಿದೆ. ನಿರ್ವಹಣಾ ಒಪ್ಪಂದದ ನಿಯಮಗಳ ಅನ್ವಯ ಸಂಬಂಧಿಸಿದ ಗುತ್ತಿಗೆದಾರರಿಗೆ ₹16,03,000 ಆರ್ಥಿಕ ದಂಡ ವಿಧಿಸಲಾಗಿದೆ. ಇದೀಗ ಹಾಳಾದ ಬೀದಿದೀಪಗಳನ್ನ ತಕ್ಷಣ ದುರಸ್ತಿ ಮಾಡಿ, ಸಾರ್ವಜನಿಕರಿಗೆ ಸುರಕ್ಷಿತ ಹಾಗೂ ಸಮರ್ಪಕ ಬೆಳಕಿನ ವ್ಯವಸ್ಥೆ ಕಲ್ಪಿಸುವುದು ಪಾಲಿಕೆಯ ಮುಂದಿನ ಕ್ರಮವಾಗಿದೆ.