KPSC ಪಶುವೈದ್ಯಾಧಿಕಾರಿ ನೇಮಕಾತಿ ಅಕ್ರಮ : ಇಡಿ ದಾಳಿಯಲ್ಲಿ ಸಿಕ್ಕ 'ಸೀಕ್ರೆಟ್ ಡೈರಿ'ಯಲ್ಲಿ ಏನಿತ್ತು ಗೊತ್ತೆ..!

KPSC Scam updates : ಕೆಪಿಎಸ್‌ಸಿ ಕರ್ಮಕಾಂಡ ರಾಜ್ಯದಲ್ಲಿ ಸಂಚಲನ ಸೃಷ್ಟಿಸಿತ್ತು. ಐಎಎಸ್ ಅಧಿಕಾರಿ ಸೇರಿದಂತೆ ಮಧ್ಯವರ್ತಿಗಳ ಬಂಧನವೂ ಆಗಿದೆ. ಸದ್ಯ ಅದೇ ಕೇಸ್‌ನ ಮತ್ತೊಂದು ಸ್ಫೋಟಕ ಸಾಕ್ಷ್ಯ ಸಿಐಡಿಗೆ ಸಿಕ್ಕಿದೆ. ಅದುವೇ ಬ್ರೋಕರ್ ಬಸವರಾಜ್ ಕನ್ನಾಳೆ ಡೈರಿ. ಹಾಗಾದ್ರೆ ಆ ಡೈರಿಯ ಸೀಕ್ರೆಟ್ ಏನು..? ಕಂಪ್ಲೀಟ್‌ ಮಾಹಿತಿ ಇಲ್ಲಿದೆ..

ಕೆಪಿಎಸ್‌ಸಿ ಪಶು ವೈದ್ಯಾಧಿಕಾರಿ ನೇಮಕಾತಿ ಪರೀಕ್ಷೆಯಲ್ಲಿ ಅಕ್ರಮ ನಡೆದಿರೋದು ಎಲ್ಲರಿಗೂ ಗೊತ್ತೇ ಇದೆ. ಒಬ್ಬೊಬ್ಬ ಅಭ್ಯರ್ಥಿಗಳಿಂದ ಕೋಟಿ ಕೋಟಿ ಹಣ ಸಂಗ್ರಹಿಸಲಾಗಿತ್ತು. ಅವ್ರಿಗೆ ಖಾಸಗಿ ರೆಸಾರ್ಟ್‌ನಲ್ಲಿ ತರಬೇತಿ ನೀಡಿ ಪರೀಕ್ಷೆ ಬರೆಸಲಾಗ್ತಿತ್ತು. ಇದೇ ಹಗರಣಕ್ಕೆ ಸಂಬಂಧಿಸಿದಂತೆ ಐಎಎಸ್ ಅಧಿಕಾರಿ ಗ್ಯಾನೇಂದ್ರ ಸೇರಿದಂತೆ ಮಧ್ಯವರ್ತಿ ಬಸವರಾಜ್ ಕನ್ನಾಳೆಯನ್ನ ಬಂಧಿಸಿದ್ದ ಸಿಐಡಿ ಪೊಲೀಸರು ಜೈಲಿಗೆ ಅಟ್ಟದ್ರು. ಅದೇ ಕೇಸ್‌ನ‌ ತನಿಖೆ ನಡೆಸ್ತಿರುವ ಇಡಿ ಬಾಡಿ ವಾರಂಟ್ ಮೇಲೆ ವಶಕ್ಕೆ ಪಡೆದು ವಿಚಾರಣೆ ನಡೆಸ್ತಿದೆ.. ಈ ಮಧ್ಯೆ ಬಸವರಾಜ್ ಕನ್ನಾಳೆ ಡೈರಿಯೊಂದು ಪತ್ತೆಯಾಗಿದ್ದು, ಹಣಕಾಸಿನ ಸೀಕ್ರೆಟ್ ರಿವೀಲ್ ಆಗಿದೆ..

ಹೌದು.. ಕೆಪಿಎಸ್ಸಿ ಹಗರಣಕ್ಕೆ ಸಂಬಂಧಿಸಿದಂತೆ ಆರೋಪಿ ಬಸವರಾಜ್ ಕನ್ನಾಳೆಯೇ ಮೇನ್ ಕಿಂಗ್ ಪಿನ್. ಮಧ್ಯವರ್ತಿಯಾಗಿದ್ದ ಈತ ಅಭ್ಯರ್ಥಿಗಳು ಮತ್ತು ಅಧಿಕಾರಿಗಳ ಮಧ್ಯೆ ಸೇತುವೆಯಾಗಿದ್ದ. ಅಭ್ಯರ್ಥಿಗಳಿಂದ ಹಣ ಪಡೆದು ಅಧಿಕಾರಿಗಳಿಗೆ ತಲುಪಿಸೊ ಕೆಲಸ ಮಾಡ್ತಿದ್ದ. ಸದ್ಯ ಇಬ್ಬರ ವಿಚಾರಣೆಯನ್ನ ಇಡಿ ನಡೆಸ್ತಿದ್ದು, ಮನೆ ಪರಿಶೀಲನೆ ವೇಳೆ ಇಡಿ ಅಧಿಕಾರಿಗಳಿಗೆ ಡೈರಿಯೊಂದು ಸಿಕ್ಕಿದೆ. ಅದ್ರಲ್ಲಿ ಹಣಕಾಸಿನ ಸೀಕ್ರೆಟ್ ರಿವೀಲ್ ಆಗಿದೆ‌.

ಬಸವರಾಜ್ ಕನ್ನಾಳೆ ಡೈರಿ ಇಡಿ ಅಧಿಕಾರಿಗಳಿಗೆ ಸಿಕ್ಕಿದ್ದು, ಅದ್ರಲ್ಲಿ ಅಕ್ರಮದಲ್ಲಿ ಪರೀಕ್ಷೆ ಬರೆದಿದ್ದವರ ಲಿಸ್ಟ್, ಯಾರ್ಯಾರಿಂದ ಎಷ್ಟೆಷ್ಟು ಹಣ ಬರಬೇಕು ಎಂಬ ಲೆಕ್ಕ ಪತ್ತೆ ಆಗಿದೆ. ಅಲ್ಲದೇ ಬ್ಯಾಂಕ್ ಖಾತೆ ನಂಬರ್ ಕೂಡ ನಮೂದಿಸಲಾಗಿದೆ. ಹಾಗಾದ್ರೆ ಆ ಡೈರಿಯಲ್ಲಿ ಏನೆಲ್ಲ ಉಲ್ಲೇಖ ಆಗಿದೆ ಅನ್ನೋದನ್ನ ನೋಡೋದಾದ್ರೆ, ಸುಮಾರು 20 ಕ್ಕೂ ಹೆಚ್ಚು ಜನರಿಗೆ ರೆಸಾರ್ಟ್‌ನಲ್ಲಿ ತರಬೇತಿ ನೀಡಿರುವ ಕನ್ನಾಳೆ, ಅಭ್ಯರ್ಥಿಗಳಿಂದ ಹಣ ಸ್ವೀಕರಿಸಿರುವುದು ಹಾಗೂ ಬಾಕಿ ಉಳಿದಿರುವುದನ್ನ ಡೈರಿಯಲ್ಲಿ ಬರೆದಿಟ್ಟುಕೊಂಡಿದ್ದ..

ಅದ್ರಲ್ಲಿ 8 ಜನರ ಹೆಸರು ಬರೆಯಲಾಗಿದ್ದು, ಮಂಜುನಾಥ್ 10 ಲಕ್ಷ, ಪೂಜಾ 10 ಲಕ್ಷ, ಅಶ್ವಿನಿ ಕುಮಾರ್ 10 ಲಕ್ಷ, ಮೋಹನ್ ಕುಮಾರ್ 5 ಲಕ್ಷ, ಸಂಗಮೇಶ್ 10 ಲಕ್ಷ, ಪದ್ಮಾವತಿ 10 ಲಕ್ಷ, ಹರೀಶ್ ಅವರಿಂದ 10 ಲಕ್ಷ ಹಣ ಬರಬೇಕಿದೆ ಎಂದು ಬರೆದಿಟ್ಟುಕೊಂಡಿದ್ದ. ಸದ್ಯ ಡೈರಿಯನ್ನು ವಶಕ್ಕೆ ಪಡೆದಿರುವ ಇಡಿ ಅಧಿಕಾರಿಗಳು, ಯಾರ್ಯಾರ ಹೆಸರು ಉಲ್ಲೇಖ ಆಗಿದೆ ಅವರ ವಿಚಾರಣೆ ಕೂಡ ನಡೆಸಿ ಹೇಳಿಕೆ ದಾಖಲಿಸಿಕೊಂಡಿದ್ದಾರೆ.