KRIDL ಅಧಿಕಾರಿ ಪರ್ವೇಜ್ ನಾಪತ್ತೆ ಪ್ರಕರಣ : ಉಜ್ಜಯಿನಿ, ಅಜ್ಮೀರ್‌ನಲ್ಲಿ ಪೊಲೀಸರ ತೀವ್ರ ಶೋಧ

ಗದಗ: ಗದಗ ಕರ್ನಾಟಕ ಗ್ರಾಮೀಣ ಮೂಲಸೌಕರ್ಯ ಅಭಿವೃದ್ಧಿ ನಿಯಮಿತ (KRIDL) ಉಪವಿಭಾಗದ ಸಹಾಯಕ ಕಾರ್ಯನಿರ್ವಾಹಕ ಅಭಿಯಂತರ (AEE) ಪರ್ವೇಜ್ ಧಾರವಾಡ ಅವರ ನಾಪತ್ತೆ ಪ್ರಕರಣ ರಾಜ್ಯಾದ್ಯಂತ ತೀವ್ರ ಸಂಚಲನ ಮೂಡಿಸಿದೆ. ಕಳೆದ 18 ದಿನಗಳಿಂದ ಯಾವುದೇ ಸುಳಿವಿಲ್ಲದೆ ನಾಪತ್ತೆಯಾಗಿರುವ ಪರ್ವೇಜ್ ಅವರ ಪತ್ತೆಗಾಗಿ ಪೊಲೀಸರು ಕಾರ್ಯಾಚರಣೆಯನ್ನು ಮತ್ತಷ್ಟು ಚುರುಕುಗೊಳಿಸಿದ್ದಾರೆ.  

ಕಾಮಗಾರಿಗಳ ಬಾಕಿ ಬಿಲ್ ಪಾವತಿಯ ಅನುದಾನ ಕೊರತೆ, ಗುತ್ತಿಗೆದಾರರ ಒತ್ತಡ ಹಾಗೂ ಮಾನಸಿಕ ಕಿರುಕುಳಕ್ಕೆ ಬೇಸತ್ತು ಡೆತ್ ನೋಟ್ ಬರೆದಿಟ್ಟು ಪರ್ವೇಜ್ ನಾಪತ್ತೆಯಾಗಿದ್ದರು. ಪ್ರಕರಣ ದಾಖಲಿಸಿಕೊಂಡಿರುವ ಬೆಟಗೇರಿ ಬಡಾವಣೆ ಠಾಣೆಯ ಪೊಲೀಸರು, ಇತ್ತೀಚೆಗೆ ಗದಗ KRIDL ಕಚೇರಿಯ ಸಿಬ್ಬಂದಿ ಹಾಗೂ ಅಧಿಕಾರಿಗಳನ್ನು ಠಾಣೆಗೆ ಕರೆಸಿ ತೀವ್ರ ವಿಚಾರಣೆ ನಡೆಸಿದ್ದಾರೆ. ಕಚೇರಿಯ ವಾತಾವರಣ, ಗುತ್ತಿಗೆದಾರರ ವ್ಯವಹಾರ ಮತ್ತು ಪರ್ವೇಜ್ ಅವರೊಂದಿಗಿನ ಕೊನೆಯ ಸಂಭಾಷಣೆಗಳ ಕುರಿತು ಮಹತ್ವದ ಮಾಹಿತಿ ಕಲೆಹಾಕಿದ್ದಾರೆ.  

ಉಜ್ಜಯಿನಿ, ಅಜ್ಮೀರ್‌ಗೆ ತೆರಳಿರುವ ಶಂಕೆ
ಪೊಲೀಸರ ಶೋಧ ಕಾರ್ಯಾಚರಣೆಯ ವೇಳೆ ಪರ್ವೇಜ್ ಮಧ್ಯಪ್ರದೇಶದ ಉಜ್ಜಯಿನಿಯತ್ತ ಪ್ರಯಾಣಿಸಿರುವ ಸುಳಿವು ದೊರೆತಿದೆ. ಉಜ್ಜಯಿನಿಯ ಪ್ರಸಿದ್ಧ ಶಾಹಿ ಮಸೀದಿಗೆ ಅಥವಾ ಮಹಾಕಾಳೇಶ್ವರ ದೇಗುಲದ ದರ್ಶನಕ್ಕೆ ಅವರು ತೆರಳಿರಬಹುದು ಎಂಬ ಶಂಕೆಯಿದ್ದು, ತನಿಖಾ ತಂಡದ ಗಮನ ಈಗ ಉಜ್ಜಯಿನಿಯತ್ತ ನೆಟ್ಟಿದೆ. ಅಷ್ಟೇ ಅಲ್ಲದೆ, ಉಜ್ಜಯಿನಿಯಿಂದ ರಾಜಸ್ಥಾನದ ಅಜ್ಮೀರ್ ದರ್ಗಾಕ್ಕೂ ಅವರು ಪ್ರಯಾಣ ಬೆಳೆಸಿರುವ ಸಾಧ್ಯತೆಗಳನ್ನು ಪೊಲೀಸರು ಗಂಭೀರವಾಗಿ ಪರಿಶೀಲಿಸುತ್ತಿದ್ದಾರೆ.

ಆತಂಕದಲ್ಲಿ ಕುಟುಂಬಸ್ಥರ ಮನವಿ
ಮಗ ನಾಪತ್ತೆಯಾಗಿ 18 ದಿನಗಳು ಕಳೆದರೂ ಇನ್ನು ಕೈಗೆ ಸಿಗದಿರುವುದು ಕುಟುಂಬಸ್ಥರನ್ನು ತೀವ್ರ ಆತಂಕಕ್ಕೀಡುಮಾಡಿದೆ. "ತನಿಖೆಯನ್ನು ಇನ್ನುಷ್ಟು ಚುರುಕುಗೊಳಿಸಿ, ಶತಾಯಗತಾಯ ಪರ್ವೇಜ್ ಅವರನ್ನು ಸುರಕ್ಷಿತವಾಗಿ ಹುಡುಕಿಕೊಡಿ" ಎಂದು ಕುಟುಂಬಸ್ಥರು ಗೃಹ ಸಚಿವರು ಹಾಗೂ ಹಿರಿಯ ಪೊಲೀಸ್ ಅಧಿಕಾರಿಗಳಲ್ಲಿ ಕಣ್ಣೀರು ಹಾಕುತ್ತಾ ಮನವಿ ಮಾಡಿದ್ದಾರೆ. ಪ್ರಸ್ತುತ ವಿಶೇಷ ಪೊಲೀಸ್ ತಂಡಗಳು ವಿವಿಧ ರಾಜ್ಯಗಳಲ್ಲಿ ಸರ್ಚ್ ಆಪರೇಷನ್ ಮುಂದುವರಿಸಿವೆ.