ಪತಿಯ ಹ*ಲ್ಲೆಗೆ ಗರ್ಭಿಣಿ ಬ*ಲಿ : 6 ದಿನದ ಹಸುಗೂಸಿನೊಂದಿಗೆ ಗಂಡ ಪರಾರಿ

ದಾವಣಗೆರೆ: ತಾಲೂಕಿನ ಬೇತೂರು ಗ್ರಾಮದಲ್ಲಿ ಹೃದಯವಿದ್ರಾವಕ ಘಟನೆಯೊಂದು ನಡೆದಿದ್ದು, ಹೆರಿಗೆಗೂ ಮುನ್ನ ಪತಿಯಿಂದ ಹಲ್ಲೆಗೊಳಗಾಗಿದ್ದ 25 ವರ್ಷದ ಬಸಮ್ಮ ಎಂಬ ಮಹಿಳೆ ಚಿಕಿತ್ಸೆ ಫಲಿಸದೇ ಮೃತಪಟ್ಟಿದ್ದಾರೆ. ಪತ್ನಿ ಮೃತಪಡುತ್ತಿದ್ದಂತೆ ಆಕೆಯ ಪತಿ ನಿಂಗರಾಜ್ (30), ಆರು ದಿನದ ಹಸುಗೂಸು ಹಾಗೂ ಮೂರು ವರ್ಷದ ಮಗಳನ್ನು ಕರೆದುಕೊಂಡು ನಾಪತ್ತೆಯಾಗಿದ್ದಾನೆ.

ಪ್ರೀತಿಸಿ ಮದುವೆಯಾಗಿದ್ದ ಜೋಡಿ
ಬಸಮ್ಮ ಹಾಗೂ ನಿಂಗರಾಜ್ ಪ್ರೀತಿಸಿ ಅಂತರ್ಜಾತಿ ವಿವಾಹವಾಗಿದ್ದರು. ಈ ದಂಪತಿಗೆ ಈಗಾಗಲೇ 3 ವರ್ಷದ ಹೆಣ್ಣು ಮಗಳಿದ್ದಳು. ಇತ್ತೀಚೆಗೆ ಬಸಮ್ಮ ಮತ್ತೆ ಗರ್ಭಿಣಿಯಾಗಿದ್ದಾಗ, ಪತಿ ನಿಂಗರಾಜ್ ಆಕೆಯ ಮೇಲೆ ತೀವ್ರವಾಗಿ ಹಲ್ಲೆ ನಡೆಸಿದ್ದ ಎನ್ನಲಾಗಿದೆ. ಈ ವೇಳೆ ಬಸಮ್ಮ ಅವರ ತಲೆಗೆ ಗಂಭೀರ ಪೆಟ್ಟಾಗಿತ್ತು.

ಆಸ್ಪತ್ರೆಯಲ್ಲಿ ಮಗುವಿಗೆ ಜನ್ಮ ನೀಡಿ ಕೊನೆಯುಸಿರೆಳೆದ ತಾಯಿ
ತಲೆಯ ಗಾಯದಿಂದ ಸ್ಥಿತಿ ಗಂಭೀರವಾಗಿದ್ದ ಬಸಮ್ಮ ಅವರನ್ನು ದಾವಣಗೆರೆ ಜಿಲ್ಲಾ ಆಸ್ಪತ್ರೆಯಿಂದ ಹುಬ್ಬಳ್ಳಿಯ ಕಿಮ್ಸ್ (KIMS) ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಐಸಿಯುನಲ್ಲಿ ಪ್ರಜ್ಞಾಹೀನ ಸ್ಥಿತಿಯಲ್ಲಿದ್ದ ಬಸಮ್ಮ, 6 ದಿನಗಳ ಹಿಂದೆ ಗಂಡು ಮಗುವಿಗೆ ಜನ್ಮ ನೀಡಿದ್ದರು. ಆದರೆ, ಹೆರಿಗೆಯಾದ ಎರಡನೇ ದಿನವೇ ಚಿಕಿತ್ಸೆ ಫಲಿಸದೇ ಕೊನೆಯುಸಿರೆಳೆದಿದ್ದಾರೆ.

ಅಂತ್ಯಸಂಸ್ಕಾರಕ್ಕೂ ಮುನ್ನವೇ ಮಗುವಿನೊಂದಿಗೆ ಪತಿ ಪಲಾಯನ
ಪತ್ನಿ ಮೃತಪಟ್ಟ ಬಳಿಕ ಮೃತದೇಹವನ್ನು ಕುಟುಂಬಸ್ಥರಿಗೆ ಸರಿಯಾಗಿ ಹಸ್ತಾಂತರಿಸದ ನಿಂಗರಾಜ್, ದಾರಿಮಧ್ಯದಲ್ಲೇ ಬಿಟ್ಟು, ಆರು ದಿನದ ಹಸುಗೂಸು ಹಾಗೂ ಮೂರು ವರ್ಷದ ಮಗಳೊಂದಿಗೆ ಪರಾರಿಯಾಗಿದ್ದಾನೆ ಎಂದು ಬಸಮ್ಮ ಅವರ ಕುಟುಂಬಸ್ಥರು ಆರೋಪಿಸಿದ್ದಾರೆ.

ಮೃತದೇಹವಿಟ್ಟು ತಾಯಿ ಮನೆಯವರ ಪ್ರತಿಭಟನೆ
ಮಕ್ಕಳು ಹಾಗೂ ಪತಿ ನಾಪತ್ತೆಯಾದ ಹಿನ್ನೆಲೆಯಲ್ಲಿ, ದಾವಣಗೆರೆಯ ಇಂದಿರಾನಗರದಲ್ಲಿರುವ ಬಸಮ್ಮ ಅವರ ತಾಯಿ ಮನೆಯವರು ಅಂತ್ಯಸಂಸ್ಕಾರ ನಡೆಸಲು ನಿರಾಕರಿಸಿದರು. ಮೂರು ದಿನಗಳ ಕಾಲ ದೂರು ನೀಡಲು ಅಲೆದಾಡಿದ ನಂತರ, ತಾಯಿ ನೀಡಿದ ದೂರಿನನ್ವಯ ಆಜಾದ್ ನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಮಕ್ಕಳು ವಾಪಸ್ ಬರುವವರೆಗೂ ಅಂತ್ಯಸಂಸ್ಕಾರ ಮಾಡುವುದಿಲ್ಲ ಎಂದು ಮೃತರ ಸಂಬಂಧಿಕರು ಪಟ್ಟು ಹಿಡಿದಿದ್ದರು. ಕೊನೆಗೆ ಪೊಲೀಸರ ಮಧ್ಯಪ್ರವೇಶದ ಬಳಿಕ, ತಡರಾತ್ರಿ ಮೃತದೇಹವನ್ನು ದಾವಣಗೆರೆ ಜಿಲ್ಲಾ ಆಸ್ಪತ್ರೆಯ ಶವಾಗಾರಕ್ಕೆ ಸ್ಥಳಾಂತರಿಸಲಾಗಿದ್ದು, ಶವಪರೀಕ್ಷೆಗೆ ರವಾನಿಸಲಾಗಿದೆ.

ಒಂದೆಡೆ ಮಗಳ ಮೃತದೇಹ ಶವಾಗಾರದಲ್ಲಿದ್ದರೆ, ಇನ್ನೊಂದೆಡೆ ಆರು ದಿನದ ಹಸುಗೂಸು ಸೇರಿದಂತೆ ಇಬ್ಬರು ಮಕ್ಕಳೊಂದಿಗೆ ಪತಿ ನಾಪತ್ತೆಯಾಗಿರುವುದು ಹೆತ್ತವರ ಆತಂಕವನ್ನು ಹೆಚ್ಚಿಸಿದೆ. ಪೊಲೀಸರ ತನಿಖೆಯಿಂದಷ್ಟೇ ಈ ಸಾವು ಹಾಗೂ ನಾಪತ್ತೆಯ ಹಿಂದಿನ ಪೂರ್ಣ ಸತ್ಯ ಹೊರಬರಬೇಕಿದೆ.