ಹಾರಾಟದ ವೇಳೆ ದಿಢೀರ್‌ 9,000 ಅಡಿ ಕೆಳಗೆ ಇಳಿದ ವಿಮಾನ : ತಪ್ಪಿತು ಭೀಕರ ದುರಂತ.. ಅಸಲಿಗೆ ಆಗಸದಲ್ಲಿ ಆಗಿದ್ದೇನು?

ಬೆಂಗಳೂರು : ಲಂಡನ್‌ನಿಂದ ಚಿಕಾಗೋಗೆ ಹೊರಟಿದ್ದ ಬ್ರಿಟಿಷ್ ಏರ್‌ವೇಸ್‌ನ BA295 ವಿಮಾನ (ಬೋಯಿಂಗ್ 777) ಐರ್ಲೆಂಡ್ ಮೇಲೆ ಹಾರುತ್ತಿದ್ದಾಗ ಇದ್ದಕ್ಕಿದ್ದಂತೆ ತುರ್ತು ಪರಿಸ್ಥಿತಿಗೆ ಸಿಲುಕಿದೆ. ತಕ್ಷಣವೇ ವಿಮಾನದ ಸಿಬ್ಬಂದಿ ಸಾಮಾನ್ಯ ತುರ್ತು ಪರಿಸ್ಥಿತಿ ಸೂಚಿಸುವ ‘ಸ್ಕ್ವಾಕ್ 7700’ ಸಂಕೇತ ರವಾನಿಸಿ, ವಿಮಾನವನ್ನು ಮತ್ತೆ ಲಂಡನ್‌‌ ಕಡೆಗೆ ತಿರುಗಿಸಿದ್ದಾರೆ.

ಫ್ಲೈಟ್ ಟ್ರ್ಯಾಕರ್ ಪ್ರಕಾರ, ವಿಮಾನವು ಕೇವಲ ಕೆಲವೇ ನಿಮಿಷಗಳಲ್ಲಿ ಬರೋಬ್ಬರಿ 9,000 ಅಡಿ ಕೆಳಗೆ ಇಳಿದಿದೆ. ಸಾಮಾನ್ಯವಾಗಿ 10,000 ಅಡಿಗಿಂತ ಕೆಳಗೆ ಹೀಗೆ ದಿಢೀರ್ ಇಳಿಯುವುದು ಕ್ಯಾಬಿನ್‌ನಲ್ಲಿ ಗಾಳಿಯ ಒತ್ತಡ ಕಡಿಮೆಯಾದಾಗ (ಡಿಪ್ರೆಶರೈಸೇಶನ್) ಅನುಸರಿಸುವ ಪ್ರೋಟೋಕಾಲ್ ಆಗಿರುವುದರಿಂದ, ತಾಂತ್ರಿಕ ದೋಷವೇ ಇದಕ್ಕೆ ಕಾರಣ ಇರಬಹುದು ಎಂದು ಅಂದಾಜಿಸಲಾಗಿದೆ.

ಏನಿದು ಸ್ಕ್ವಾಕ್ 7700? : ವಿಮಾನದ ಟ್ರಾನ್ಸ್‌ಪಾಂಡರ್‌ನಿಂದ ಏರ್ ಟ್ರಾಫಿಕ್ ಕಂಟ್ರೋಲ್‌ಗೆ ರವಾನೆಯಾಗುವ 4 ಅಂಕಿಯ ಕೋಡ್‌ಗೆ 'ಸ್ಕ್ವಾಕ್' ಎನ್ನಲಾಗುತ್ತದೆ. ಇದರಲ್ಲಿ '7700' ಎಂದರೆ ವಿಮಾನ ತುರ್ತು ಪರಿಸ್ಥಿತಿಯಲ್ಲಿದೆ ಮತ್ತು ಅದಕ್ಕೆ ತಕ್ಷಣ ಆದ್ಯತೆಯ ಮಾರ್ಗ ಹಾಗೂ ನೆರವು ಬೇಕು ಎಂದರ್ಥ.

ಫ್ಲೈದುಬೈ ದುರಂತದ ಮೆಲುಕು : ಇನ್ನೊಂದೆಡೆ, ಸೆಪ್ಟೆಂಬರ್ 30 ರಂದು ಟೆಲ್ ಅವೀವ್‌ಗೆ ಹೊರಟಿದ್ದ ಫ್ಲೈದುಬೈ (FZ1073) ವಿಮಾನದಲ್ಲಂತೂ ಸಿನಿಮಾ ಮಾದರಿಯ ಹೈಡ್ರಾಮಾ ನಡೆದಿದೆ. ವಿಮಾನದಲ್ಲಿದ್ದ ಸಹ-ಪೈಲಟ್, ಕ್ರ್ಯಾಶ್ ಕೊಡಲಿಯಿಂದ ಕ್ಯಾಪ್ಟನ್ ಸ್ಮಿತ್ ಮಚ್ಚರ್ ಅವರ ಮೇಲೆಯೇ ಭೀಕರವಾಗಿ ದಾಳಿ ನಡೆಸಿ ವಿಮಾನವನ್ನು ಹೈಜಾಕ್ ಮಾಡಲು ಯತ್ನಿಸಿದ್ದಾನೆ. ಆದರೆ, ಕಾಕ್‌ಪಿಟ್ ಬಾಗಿಲು ತೆರೆದ ತಕ್ಷಣವೇ ಜಾಗರೂಕರಾದ ಪ್ರಯಾಣಿಕರು, ಓಮನ್ ಮೂಲದ ಆ ದಾಳಿಕೋರನನ್ನು ಹಿಡಿದು ಹತ್ತಿಕ್ಕುವಲ್ಲಿ ಯಶಸ್ವಿಯಾಗಿದ್ದಾರೆ.

ಈ ಗೊಂದಲದ ನಡುವೆ ಬೋಯಿಂಗ್ 737-8 ವಿಮಾನವು ಕೇವಲ 2 ನಿಮಿಷಗಳಲ್ಲಿ 17,400 ಅಡಿ ಕೆಳಗೆ ದುಮುಕಿ ಪ್ರಯಾಣಿಕರನ್ನು ಬೆಚ್ಚಿಬೀಳಿಸಿದೆ. ಮಕ್ಕಳು ಸೇರಿ ಒಟ್ಟು 174 ಪ್ರಯಾಣಿಕರಿದ್ದ ಈ ವಿಮಾನವನ್ನು ಕೊನೆಗೆ ಸೌದಿ ಅರೇಬಿಯಾದ ತಬುಕ್‌ನಲ್ಲಿರುವ ಪ್ರಿನ್ಸ್ ಸುಲ್ತಾನ್ ಬಿನ್ ಅಬ್ದೆಲ್ ಅಜೀಜ್ ವಿಮಾನ ನಿಲ್ದಾಣಕ್ಕೆ ತುರ್ತಾಗಿ ತಿರುಗಿಸಿ ಸುರಕ್ಷಿತವಾಗಿ ಇಳಿಸಲಾಯಿತು. ಧೈರ್ಯದಿಂದ ಪರಿಸ್ಥಿತಿ ನಿಭಾಯಿಸಿದ ಕ್ಯಾಪ್ಟನ್ ಅವರನ್ನು ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು, ಭಾರತದ ಪ್ರಧಾನಿ ನರೇಂದ್ರ ಮೋದಿ ಹಾಗೂ ಅಮೆರಿಕದ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮೆಚ್ಚಿ "ನಿಜವಾದ ನಾಯಕ" ಎಂದು ಶ್ಲಾಘಿಸಿದ್ದಾರೆ.