ವೆರಿ ವೆರಿ ಶಾಕಿಂಗ್.. ಕಾದು ಕೆಂಡವಾಗೋಯ್ತು ಭೂಮಿ.. ಲಕ್ಷ ಲಕ್ಷ ಸಾವು..!

ಚಳಿಗಾಲ ಬಂದರೆ ಸಾಕು 'ಅಬ್ಬಾ... ಸೆಖೆಯಿಂದ ಮುಕ್ತಿ ಸಿಕ್ಕಿತು' ಎಂದು ಉಸಿರು ಚೆಲ್ಲುವ ದಿನಗಳು ಇನ್ಮುಂದೆ ಗತಕಾಲವಾಗಲಿವೆಯಾ? ಹೀಗೊಂದು ಕಟು ಸತ್ಯ ಮತ್ತು ಬೆಚ್ಚಿ ಬೀಳಿಸುವ ವರದಿ ಈಗ ಇಡೀ ಜಗತ್ತನ್ನೇ ಆತಂಕಕ್ಕೆ ತಳ್ಳಿದೆ. ಚಳಿಯ ದಿನಗಳಲ್ಲೂ ಇಡೀ ಭೂಮಂಡಲ ಕಾದು ಕೆಂಡವಾಗಲಿದ್ದು, ಲಕ್ಷಾಂತರ ಜನರ ಜೀವಕ್ಕೆ ಕಂಟಕ ಎದುರಾಗಲಿದೆ ಎಂದು ಅಮೆರಿಕದ 'ಚಿಕ್ಯಾಗೊ ವಿಶ್ವವಿದ್ಯಾಲಯ'ದ 'ಕ್ಲೈಮೇಟ್ ಇಂಪ್ಯಾಕ್ಟ್ ಲ್ಯಾಬ್' ಹೆದರಿಸುವಂತಹ ಭವಿಷ್ಯ ನುಡಿದಿದೆ.

ಸಾಮಾನ್ಯವಾಗಿ ಚಳಿಗಾಲ ಎಂದರೆ ತಂಪಾದ ಗಾಳಿ, ಮುಂಜಾನೆಯ ಮಂಜು ನೆನಪಿಗೆ ಬರುತ್ತದೆ. ಆದರೆ, ಈ ಬಾರಿ ‘ಸೂಪರ್ ಎಲ್ ನಿನೋ’ ಪ್ರಭಾವದಿಂದಾಗಿ ವಾತಾವರಣದ ತಾಪಮಾನವು ವಾಡಿಕೆಗಿಂತ ಬರೋಬ್ಬರಿ 1.2 ಡಿಗ್ರಿ ಸೆಲ್ಸಿಯಸ್‌ನಷ್ಟು ಹೆಚ್ಚಾಗಲಿದೆ. ಇದರ ಪರಿಣಾಮವಾಗಿ ಜಗತ್ತಿನಾದ್ಯಂತ ಅತಿಯಾದ ಬಿಸಿಲಿನ ದಿನಗಳ ಪ್ರಮಾಣದಲ್ಲಿ ಶೇಕಡಾ 44 ರಷ್ಟು ಏರಿಕೆಯಾಗಲಿದೆ. ಸೆಪ್ಟೆಂಬರ್ 2026 ರಿಂದ ಫೆಬ್ರವರಿ 2027 ರವರೆಗಿನ ಕೇವಲ 6 ತಿಂಗಳ ಅವಧಿಯಲ್ಲಿ, ಬಿಸಿಲಿನ ಬೇಗೆ ತಾಳಲಾರದೆ ಜಗತ್ತಿನಾದ್ಯಂತ ಬರೋಬ್ಬರಿ 4.51 ಲಕ್ಷಕ್ಕೂ ಹೆಚ್ಚು ಹೆಚ್ಚುವರಿ ಸಾವುಗಳು ಸಂಭವಿಸಬಹುದು ಎಂದು ರಿಸರ್ಚ್ ರಿಪೋರ್ಟ್ ಎಚ್ಚರಿಸಿದೆ.

ಈ ಭೀಕರ ಹವಾಮಾನ ವೈಪರೀತ್ಯದಿಂದ ಭಾರತವೂ ಹೊರತಾಗಿಲ್ಲ. ನಮ್ಮ ದೇಶದಲ್ಲೂ ಈ ಬಿಸಿಲಿನ ತಾಪಮಾನಕ್ಕೆ ಅಂದಾಜು 15,800 ಜನರು ಪ್ರಾಣ ಕಳೆದುಕೊಳ್ಳುವ ಭೀತಿ ಎದುರಾಗಿದೆ. ಅದರಲ್ಲೂ ವಿಶೇಷವಾಗಿ ಅಪ್ಪಟ ಚಳಿಗಾಲದ ಅವಧಿಯಾದ ಡಿಸೆಂಬರ್ ಮತ್ತು ಫೆಬ್ರವರಿ ನಡುವೆಯೇ ಸುಮಾರು 7,400 ಜನರು ಬಿಸಿಲಿಗೆ ಬಲಿಯಾಗಬಹುದು ಎಂದು ಅಂದಾಜಿಸಲಾಗಿದೆ.

ಅಧಿಕ ಸಾವು ಸಂಭವಿಸಬಹುದಾದ ಪ್ರಮುಖ ದೇಶಗಳು:

ನೈಜೀರಿಯಾ: 31,400 ಸಾವುಗಳು
ಇಂಡೋನೇಷ್ಯಾ: 19,300 ಸಾವುಗಳು
ಸುಡಾನ್: 17,500 ಸಾವುಗಳು
ಭಾರತ: 15,800 ಸಾವುಗಳು
ಬ್ರೆಜಿಲ್: 13,300 ಸಾವುಗಳು

ಅಗತ್ಯ ಕ್ರಮ ಕೈಗೊಳ್ಳದಿದ್ದರೆ ಗಂಡಾಂತರ ನಿಶ್ಚಿತ!

ಪ್ರಕೃತಿಯ ಈ ಏರುಪೇರಿನಿಂದಾಗಿ ಮುಂಬರುವ ದಿನಗಳಲ್ಲಿ ಆರೋಗ್ಯ ತುರ್ತು ಪರಿಸ್ಥಿತಿ ಉಂಟಾಗುವ ಸಾಧ್ಯತೆಯಿದೆ. ಹವಾಮಾನ ಇಲಾಖೆ ಹಾಗೂ ಸರ್ಕಾರಗಳು ಈಗಿನಿಂದಲೇ ಎಚ್ಚೆತ್ತುಕೊಂಡು, ಮುನ್ನೆಚ್ಚರಿಕಾ ಕ್ರಮಗಳನ್ನು ಕೈಗೊಳ್ಳದಿದ್ದರೆ ದೊಡ್ಡ ಮಟ್ಟದ ಗಂಡಾಂತರವನ್ನು ಎದುರಿಸಬೇಕಾಗುತ್ತದೆ.