ಯೂರೋಪ್‌ ಪ್ರವಾಸಕ್ಕೆ ಹೋಗಲಿದ್ದಾರೆ ʻಬಿಗ್‌ ಬಾಸ್‌ 13ʼರ ಈ ಸ್ಪರ್ಧಿಗಳು..! ಲಿಸ್ಟ್‌ ಇಲ್ಲಿದೆ

Bigg Boss Kannada Season 13 updates : ‘ಬಿಗ್ ಬಾಸ್ ಕನ್ನಡ ಸೀಸನ್‌ 13’ ರಿಯಾಲಿಟಿ ಶೋ ದಿನದಿಂದ ದಿನಕ್ಕೆ ಕಾವು ಪಡೆದುಕೊಳ್ಳುತ್ತಿದ್ದು, ಸ್ಪರ್ಧಿಗಳ ನಡುವಿನ ಪೈಪೋಟಿ ತೀವ್ರಗೊಳ್ಳುತ್ತಿದೆ. ಇತ್ತೀಚೆಗೆ ಮನೆಮಂದಿಗೆ ನೀಡಲಾದ ವಿಶೇಷ ರಿಲೇ ಟಾಸ್ಕ್ ಭಾರಿ ಮನರಂಜನೆ ನೀಡಿದ್ದಲ್ಲದೆ, ಸ್ಪರ್ಧಿಗಳಲ್ಲಿ ಹೊಸ ಹುಮ್ಮಸ್ಸು ಮೂಡಿಸಿದೆ.

ಏನಿತ್ತು ಈ ವಿಶೇಷ ರಿಲೇ ಟಾಸ್ಕ್‌ನಲ್ಲಿ?
ವೇಗ, ಗ್ರಹಿಕೆ ಮತ್ತು ನೆನಪಿನ ಶಕ್ತಿಯನ್ನು ಪರೀಕ್ಷಿಸುವ ಉದ್ದೇಶದಿಂದ ಈ ಟಾಸ್ಕ್ ಅನ್ನು ವಿನ್ಯಾಸಗೊಳಿಸಲಾಗಿತ್ತು. ಆರಂಭಿಕ ಸ್ಥಾನದಲ್ಲಿದ್ದ ಮೊದಲ ಸ್ಪರ್ಧಿ ಪಾಸ್‌ಪೋರ್ಟ್ ಕಾರ್ಡ್ ತೆಗೆದುಕೊಂಡು, ಅದರಲ್ಲಿರುವ ದೇಶದ ಹೆಸರನ್ನು ಜೋರಾಗಿ ಓದಬೇಕಿತ್ತು. ನಂತರ ನೇರವಾಗಿ ಅಂತಿಮ ವಲಯಕ್ಕೆ ಓಡಿ, ಅಲ್ಲಿದ್ದ ಹಲವು ಚಿತ್ರಗಳಲ್ಲಿ ಆ ನಿರ್ದಿಷ್ಟ ದೇಶಕ್ಕೆ ಸಂಬಂಧಿಸಿದ ಸರಿಯಾದ ಚಿತ್ರವನ್ನು ಹುಡುಕಿ ಹಿಡಿದುಕೊಂಡು ಮತ್ತೆ ಆರಂಭಿಕ ಸ್ಥಾನಕ್ಕೆ ಓಡಿ ಬರಬೇಕಿತ್ತು. ಅಲ್ಲಿ ಮುಂದಿನ ಸ್ಪರ್ಧಿಗೆ ಪಾಸ್ ನೀಡುವ ಮೂಲಕ ರಿಲೇ ಮಾದರಿಯಲ್ಲಿ ಆಟ ಸಾಗಿತ್ತು. ಈ ಸಂಪೂರ್ಣ ಸವಾಲಿಗೆ ಒಟ್ಟು 5 ನಿಮಿಷಗಳ ಕಾಲಾವಕಾಶ ನೀಡಲಾಗಿದ್ದು, ನಿಗದಿತ ಸಮಯದಲ್ಲಿ ಅತಿ ಹೆಚ್ಚು ದೇಶಗಳನ್ನು ಸರಿಯಾದ ಚಿತ್ರಗಳೊಂದಿಗೆ ಜೋಡಿಸುವ ತಂಡವೇ ವಿಜೇತ ಎಂದು ಘೋಷಿಸುವ ನಿಯಮವಿತ್ತು.

ಕೈತಪ್ಪಿದ ‘ಎ’ ತಂಡದ ಗೆಲುವು
ಮನೆಯ ಕ್ಯಾಪ್ಟನ್ તાಂಡವ್ ಈ ಮಹತ್ವದ ಆಟದ ಉಸ್ತುವಾರಿಯನ್ನು ವಹಿಸಿಕೊಂಡು ನಿಯಮಗಳು ಸರಿಯಾಗಿ ಪಾಲನೆಯಾಗುವಂತೆ ನೋಡಿಕೊಂಡರು. ಗಾನವಿ, ಪ್ರಶಾಂತ್, ಆಸಿಯಾ, ಯಶಸ್‌, ಸಂಗೀತಾ, ಕಿರಣ್‌ ಶಾಸ್ತ್ರಿ ಹಾಗೂ ಮಂಜ ಅವರನ್ನೊಳಗೊಂಡ ‘ಎ’ ತಂಡವು ಅತ್ಯುತ್ತಮವಾಗಿ ಪ್ರಯತ್ನಿಸಿತಾದರೂ, ಸಮಯ ನಿರ್ವಹಣೆ ಮತ್ತು ವೇಗದ ಕೊರತೆಯಿಂದಾಗಿ ಹಿನ್ನಡೆ ಅನುಭವಿಸಿತು.

‘ಬಿ’ ತಂಡದ ಮಿಂಚಿನ ಪ್ರದರ್ಶನ
ಮತ್ತೊಂದೆಡೆ ಕಾವ್ಯ, ಲಿಖಿತ್, ಗಗನ್, ಸೌಂದರ್ಯ, ಜಗ್ಗ ಮಮ್ಮಿ, ಸೋನಿಕಾ ಮತ್ತು ಧನುಷ್ ಅವರಿದ್ದ ‘ಬಿ’ ತಂಡ ಅತ್ಯಂತ ಚುರುಕಾಗಿ ಆಟವಾಡಿತು. ತಂಡದ ಪ್ರತಿಯೊಬ್ಬ ಸದಸ್ಯರೂ ಸಮಯ ವ್ಯರ್ಥ ಮಾಡದೆ ಅತ್ಯಂತ ವೇಗವಾಗಿ ಕಾರ್ಡ್‌ಗಳನ್ನು ಓದಿ, ಸರಿಯಾದ ಚಿತ್ರಗಳನ್ನು ಗುರುತಿಸಿ ಹಿಂತಿರುಗಿದರು. ಈ ತಂಡವು ಕೇವಲ 4 ನಿಮಿಷ 20 ಸೆಕೆಂಡುಗಳಲ್ಲಿ 5 ಸರಿಯಾದ ಉತ್ತರಗಳನ್ನು ನೀಡುವ ಮೂಲಕ ಅದ್ಭುತವಾಗಿ ಸವಾಲನ್ನು ಪೂರ್ಣಗೊಳಿಸಿತು.

ಬಂಪರ್ ಬಹುಮಾನವಾಗಿ ಯುರೋಪ್ ಟ್ರಿಪ್!
ಸಮಯಪ್ರಜ್ಞೆ ಹಾಗೂ ಅದ್ಭುತ ಸಮನ್ವಯತೆಯಿಂದ ‘ಎ’ ತಂಡವನ್ನು ಸೋಲಿಸಿ ಗೆದ್ದುಬೀಗಿದ ‘ಬಿ’ ತಂಡದ ಸ್ಪರ್ಧಿಗಳು ಯುರೋಪ್ ಪ್ರವಾಸದ ಆಕರ್ಷಕ ವೋಚರ್ ಅನ್ನು ತಮ್ಮದಾಗಿಸಿಕೊಂಡಿದ್ದಾರೆ. ಇದರೊಂದಿಗೆ ಆಟವನ್ನು ಯಶಸ್ವಿಯಾಗಿ ನಡೆಸಿಕೊಟ್ಟ ಕ್ಯಾಪ್ಟನ್ ತಾಂಡವ್ ಕೂಡ ಈ ಬಂಪರ್ ಬಹುಮಾನಕ್ಕೆ ಅರ್ಹರಾಗಿದ್ದಾರೆ.