ಅಂಬಾನಿ ಹತ್ತಿರವೂ ಇಲ್ಲ ಇಷ್ಟೊಂದು ದುಬಾರಿ ವಾಚ್..! ಅನನ್ಯ ಪಾಂಡೆ ಕೈ ಗಡಿಯಾರದ ಬೆಲೆ ಗೊತ್ತೆ?
ಬಾಲಿವುಡ್‌ನ ಯುವ ನಟಿ ಅನನ್ಯಾ ಪಾಂಡೆ ತಮ್ಮ ಅದ್ಭುತ ನಟನೆಯಷ್ಟೇ ಅಲ್ಲದೆ, ತಮ್ಮ ವಿಶಿಷ್ಟ ಫ್ಯಾಷನ್ ಸೆನ್ಸ್ ಹಾಗೂ ಸ್ಟೈಲಿಶ್ ಲುಕ್ ಮೂಲಕ ಸದಾ ಸುದ್ದಿಯಲ್ಲಿರುತ್ತಾರೆ. ಇತ್ತೀಚೆಗೆ ಅನನ್ಯಾ ಧರಿಸಿದ್ದ ಕೋಟ್ಯಂತರ ರೂ. ಮೌಲ್ಯದ ಐಷಾರಮಿ ಕೈಗಡಿಯಾರದ ಬೆಲೆ ಎಲ್ಲರ ಹುಬ್ಬೇರಿಸುವಂತೆ ಮಾಡಿದ್ದು, ಸದ್ಯ ಈ ಕುರಿತ ಸುದ್ದಿ ಸಾಮಾಜಿಕ ಮಾಧ್ಯಮದಲ್ಲಿ ಭಾರಿ ವೈರಲ್ ಆಗುತ್ತಿದೆ.
Ananya Pandey watch : ಅಂಬಾನಿ ಕುಟುಂಬದ ಐಷಾರಾಮಿತನ ಮತ್ತು ಅವರ ದುಬಾರಿ ಉಡುಪುಗಳು, ವಾಚ್‌ಗಳು ಆಗಾಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆಗೆ ಗ್ರಾಸವಾಗುತ್ತಿರುತ್ತವೆ. ಅನಂತ್ ಅಂಬಾನಿ ಸೇರಿದಂತೆ ಪ್ರತಿಯೊಬ್ಬರೂ ಧರಿಸುವ ಕೋಟ್ಯಂತರ ರೂ. ಬೆಲೆಯ ವಾಚ್‌ಗಳು ಎಲ್ಲರ ಹುಬ್ಬೇರಿಸುವಂತೆ ಮಾಡುತ್ತವೆ. ಆದರೆ, ಈಗ ಇಂತಹದ್ದೇ ಒಂದು ಐಷಾರಮಿ ಕೈಗಡಿಯಾರದ ಮೂಲಕ ಯುವ ನಟಿ ಅನನ್ಯಾ ಪಾಂಡೆ ಎಲ್ಲರ ಗಮನ ಸೆಳೆದಿದ್ದಾರೆ.
ಹೌದು, ಬಾಲಿವುಡ್‌ನ ಸ್ಟೈಲಿಶ್ ನಟಿ ಅನನ್ಯಾ ಪಾಂಡೆ ಸದ್ಯ ಬರೋಬ್ಬರಿ 1.32 ಕೋಟಿ ರೂ. ಮೌಲ್ಯದ ವಜ್ರದ ಕೈಗಡಿಯಾರವನ್ನು ಧರಿಸಿ ಸುದ್ದಿಯಲ್ಲಿದ್ದಾರೆ. ಪ್ರಸಿದ್ಧ ಫ್ಯಾಷನ್ ಡಿಸೈನರ್ ಗೌರವ್ ಗುಪ್ತಾ ವಿನ್ಯಾಸಗೊಳಿಸಿದ ಅತ್ಯಾಕರ್ಷಕ ಗೌನ್‌ನಲ್ಲಿ ಮಿಂಚಿರುವ ಅನನ್ಯಾ ಪಾಂಡೆ, ತಮ್ಮ ಈ ಹೊಸ ಲುಕ್‌ಗೆ ತಕ್ಕಂತೆ ಅತ್ಯಂತ ದುಬಾರಿ ವಾಚ್ ಧರಿಸಿ ಕಂಗೊಳಿಸಿದ್ದಾರೆ.
ಈ ಸುಂದರವಾದ ಫೋಟೋಗಳು ಮತ್ತು ವೀಡಿಯೊಗಳನ್ನು ಸ್ವತಃ ನಟಿಯೇ ತಮ್ಮ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದು, ಸದ್ಯ ಈ ಸ್ಟೈಲಿಶ್ ಲುಕ್ ಮತ್ತು ಗಡಿಯಾರ ಸಾಮಾಜಿಕ ಮಾಧ್ಯಮದಲ್ಲಿ ಭಾರಿ ವೈರಲ್ ಆಗುತ್ತಿದೆ. ನಟಿ ಅನನ್ಯಾ ಪಾಂಡೆ ಧರಿಸಿರುವ ಈ ಐಷಾರಮಿ ಗಡಿಯಾರವು ಸಾಮಾನ್ಯವಾದುದಲ್ಲ. ಇದು ಖ್ಯಾತ ಬ್ರ್ಯಾಂಡ್‌ನ 'ಪಿಯಾಗೆಟ್ ಲೈಮ್‌ಲೈಟ್ ಗಾಲಾ ಪ್ರೆಷಿಯಸ್ ಎಡಿಷನ್' (ರೆಫ್. G0A47183) ವಾಚ್ ಆಗಿದೆ. ಭಾರತೀಯ ಮಾರುಕಟ್ಟೆಯಲ್ಲಿ ಇದರ ಅಂದಾಜು ಬೆಲೆ ಬರೋಬ್ಬರಿ 1.32 ಕೋಟಿ ರೂ.ಗಳು. ಈ ಗಡಿಯಾರವು ಅತ್ಯುತ್ತಮ ಕರಕುಶಲತೆ ಮತ್ತು ರತ್ನಗಳ ಅಂದವಾದ ಸಂಗಮವಾಗಿದೆ.
ಈ ಗಡಿಯಾರವು 32 ಎಂಎಂ ಕೇಸ್ ಹಾಗೂ 18 ಕ್ಯಾರೆಟ್ ಶುದ್ಧ ಚಿನ್ನದಿಂದ ಮಾಡಲ್ಪಟ್ಟಿದೆ. ಇದರ ತಯಾರಿಕೆಯಲ್ಲಿ ಬ್ರೈಟ್ ಕಟ್ ಹೊಂದಿರುವ 20 ಅದ್ಭುತ ವಜ್ರಗಳನ್ನು ಬಳಸಲಾಗಿದೆ. ಇಷ್ಟೇ ಅಲ್ಲದೆ, 4.01 ಕ್ಯಾರೆಟ್‌ಗಳ 22 ವಿವಿಧ ಕಟ್ ರತ್ನಗಳನ್ನು ಇದರ ಅಂದವನ್ನು ಹೆಚ್ಚಿಸಲು ಬಳಸಲಾಗಿದೆ. ಚಿನ್ನ ಮತ್ತು ವಜ್ರಗಳ ಅತಿಯಾದ ಬಳಕೆಯಿಂದಾಗಿ ಇದು ಅತ್ಯಂತ ದುಬಾರಿಯಾಗಿದೆ. ವಿಶೇಷವೆಂದರೆ, ಇದು ಕಸ್ಟಮೈಸ್ ಮಾಡಲಾದ (Customized) ಗಡಿಯಾರವಾಗಿದೆ. ಅಂದರೆ ಖರೀದಿದಾರರ ವೈಯಕ್ತಿಕ ಅಭಿರುಚಿ ಮತ್ತು ಶೈಲಿಗೆ ತಕ್ಕಂತೆ ಇದನ್ನು ವಿನ್ಯಾಸಗೊಳಿಸಿ ತಯಾರಿಸಲಾಗುತ್ತದೆ.
ಬಾಲಿವುಡ್‌ನಲ್ಲಿ ಸೆಲೆಬ್ರಿಟಿಗಳು ಕೋಟ್ಯಂತರ ರೂಪಾಯಿ ಮೌಲ್ಯದ ದುಬಾರಿ ವಾಚ್‌ಗಳನ್ನು ಧರಿಸುವುದು ಹೊಸ ವಿಷಯವೇನಲ್ಲ. ಬಾಲಿವುಡ್ ಬಾದ್‌ಷಾ ಶಾರುಖ್ ಖಾನ್, ರಣವೀರ್ ಸಿಂಗ್ ಸೇರಿದಂತೆ ಹಲವು ಪ್ರಮುಖ ನಟ-ನಟಿಯರು ವಿಶ್ವದ ಅತ್ಯಂತ ದುಬಾರಿ ಮತ್ತು ಅಪರೂಪದ ಬ್ರ್ಯಾಂಡ್‌ಗಳ ವಾಚ್‌ಗಳನ್ನು ಕಲೆಕ್ಷನ್ ಮಾಡಿದ್ದಾರೆ ಮತ್ತು ಆಗಾಗ್ಗೆ ಸಾರ್ವಜನಿಕವಾಗಿ ಧರಿಸಿ ಕಾಣಿಸಿಕೊಳ್ಳುತ್ತಾರೆ. ಈಗ ಈ ಸಾಲಿಗೆ ಯುವ ನಟಿ ಅನನ್ಯಾ ಪಾಂಡೆ ಕೂಡ ಸೇರಿಕೊಂಡಿದ್ದಾರೆ.
2019ರಲ್ಲಿ ಬಿಡುಗಡೆಯಾದ 'ಸ್ಟೂಡೆಂಟ್ ಆಫ್ ದಿ ಇಯರ್ 2' ಚಿತ್ರದ ಮೂಲಕ ಬಾಲಿವುಡ್‌ಗೆ ಕಾಲಿಟ್ಟ ಅನನ್ಯಾ ಪಾಂಡೆ, ತಮ್ಮ ಮೊದಲ ಚಿತ್ರಕ್ಕೇ ಅತ್ಯುತ್ತಮ ಮಹಿಳಾ ಚೊಚ್ಚಲ ಪ್ರಶಸ್ತಿಯನ್ನು ಪಡೆದುಕೊಂಡರು. ಬಳಿಕ 'ಡ್ರೀಮ್ ಗರ್ಲ್ 2' ಸೇರಿದಂತೆ ಹಲವು ಯಶಸ್ವಿ ಮತ್ತು ಜನಪ್ರಿಯ ಚಿತ್ರಗಳಲ್ಲಿ ನಟಿಸಿ ಪ್ರೇಕ್ಷಕರ ಮನಗೆದ್ದಿದ್ದಾರೆ. ಸದ್ಯ ಸಿನಿಮಾಗಳ ಜೊತೆಗೆ ತಮ್ಮ ಅದ್ಭುತ ಫ್ಯಾಷನ್ ಸೆನ್ಸ್ ಹಾಗೂ ಕೋಟಿ ಮೌಲ್ಯದ ವಾಚ್‌ನಿಂದಾಗಿ ಅನನ್ಯಾ ಪಾಂಡೆ ಮತ್ತೊಮ್ಮೆ ಹಾಟ್ ಟಾಪಿಕ್ ಆಗಿ ಬದಲಾಗಿದ್ದಾರೆ.
