ಯುಜಿ ನೀಟ್: ವೈದ್ಯಕೀಯ, ದಂತ ವೈದ್ಯಕೀಯ ಕೋರ್ಸ್‌ಗಳ ಪ್ರವೇಶಕ್ಕೆ ಸ್ಟ್ರೇ ವೇಕೆನ್ಸಿ ಸುತ್ತಿನ ವೇಳಾಪಟ್ಟಿ ಪ್ರಕಟ

ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ (KEA) ಶುಕ್ರವಾರ ವೈದ್ಯಕೀಯ ಮತ್ತು ದಂತ ವೈದ್ಯಕೀಯ ಕೋರ್ಸ್‌ಗಳ ಪ್ರವೇಶದ ಖಾಲಿ ಹುದ್ದೆಗಳ ಸೀಟು ಹಂಚಿಕೆ ವೇಳಾಪಟ್ಟಿ ಪ್ರಕಟಿಸಿದೆ. ಅಭ್ಯರ್ಥಿಗಳು ಅಕ್ಟೋಬರ್‌ 13 ರಿಂದ 16ರವರೆಗೆ ಹೊಸ ಅರ್ಜಿಗಳನ್ನು ಸಲ್ಲಿಸಲು ಅವಕಾಶವಿರುತ್ತದೆ.

ಯಾರು ಅರ್ಜಿ ಸಲ್ಲಿಸಬಹುದು?
ಕೆಇಎ ಪ್ರಕಟಿಸಿರುವ ವೈದ್ಯಕೀಯ, ದಂತ ವೈದ್ಯಕೀಯ ಕೋರ್ಸ್‌ಗಳ ಪ್ರವೇಶಕ್ಕೆ ಪ್ರಸಕ್ತ ವರ್ಷದ ಯುಜಿ ನೀಟ್‌ನಲ್ಲಿ ಅರ್ಹತೆ ಪಡೆದು, ಇದುವರೆಗೆ ಕೆಇಎಯಲ್ಲಿ ನೋಂದಣಿ ಮಾಡದ ಅಭ್ಯರ್ಥಿಗಳಿಗೂ ಸಹ ಹೊಸದಾಗಿ ಅರ್ಜಿ ಸಲ್ಲಿಸಲು ಅವಕಾಶವಿದೆ ಎಂದು ಪ್ರಾಧಿಕಾರದ ಕಾರ್ಯನಿರ್ವಾಹಕ ನಿರ್ದೇಶಕ ಎಚ್.‌ ಪ್ರಸನ್ನ ತಿಳಿಸಿದ್ದಾರೆ.

ಈ ಕುರಿತಂತೆ ಮಾಹಿತಿ ನೀಡಿರುವ ಕೆಇಎ ಕಾರ್ಯನಿರ್ವಾಹಕ ನಿರ್ದೇಶಕ ಎಚ್. ಪ್ರಸನ್ನ ಅವರು, ಅಕ್ಟೋಬರ್ 16 ರಿಂದ 19 ರವರೆಗೆ ಹೊಸ ಆಯ್ಕೆ ನಮೂದನ್ನು ಅನುಮತಿಸಲಾಗುತ್ತದೆ. ಆಯ್ಕೆಗಳನ್ನು ನಮೂದಿಸುವ ಮೊದಲು ಎಚ್ಚರಿಕೆ ಠೇವಣಿಯನ್ನು ಪಾವತಿಸುವುದು ಕಡ್ಡಾಯವಾಗಿದೆ. ಅರ್ಹ ಅಭ್ಯರ್ಥಿಗಳು ಅರ್ಜಿ ಶುಲ್ಕವನ್ನು ಪಾವತಿಸಿ, ಪರಿಶೀಲನಾ ಚೀಟಿಯನ್ನು ಡೌನ್ಲೋಡ್ ಮಾಡಿ, ಎಚ್ಚರಿಕೆ ಠೇವಣಿಯನ್ನು ಪಾವತಿಸಿ ನಂತರ ತಮ್ಮ ಆಯ್ಕೆಗಳನ್ನು ನಮೂದಿಸಲು ಸಲಹೆ ನೀಡಿದರು.

ಕಾಷನ್ ಡೆಪಾಸಿಟ್‌ಗೆ ಅನುಗುಣವಾಗಿ ಸೀಟು ಆಯ್ಕೆ: 
* ₹1,00,000 ಕಾಶನ್ ಠೇವಣಿ ಪಾವತಿಸುವ ಅಭ್ಯರ್ಥಿಗಳು ಸರ್ಕಾರಿ ವೈದ್ಯಕೀಯ ಸೀಟುಗಳು ಮತ್ತು ಎಲ್ಲಾ ವರ್ಗದ ದಂತ ಸೀಟುಗಳಿಗೆ ಆಯ್ಕೆಗಳನ್ನು ನಮೂದಿಸಲು ಅರ್ಹರಾಗಿರುತ್ತಾರೆ. 
* ₹12,00,117 ಕಾಶನ್ ಠೇವಣಿ ಪಾವತಿಸುವ ಅಭ್ಯರ್ಥಿಗಳು 'ಜಿ' (ಸರ್ಕಾರಿ) ಮತ್ತು 'ಪಿ' (ಖಾಸಗಿ) ಸೀಟುಗಳಿಗೆ ಆಯ್ಕೆಗಳನ್ನು ನಮೂದಿಸಲು ಅರ್ಹರಾಗಿರುತ್ತಾರೆ. 
* ₹25 ಲಕ್ಷ ಕಾಶನ್ ಠೇವಣಿ ಪಾವತಿಸುವ ಅಭ್ಯರ್ಥಿಗಳು ಎಲ್ಲಾ ವರ್ಗದ ಸೀಟುಗಳಿಗೆ ಆಯ್ಕೆಗಳನ್ನು ನಮೂದಿಸಲು ಅರ್ಹರಾಗಿರುತ್ತಾರೆ ಎಂದು ಕಾರ್ಯನಿರ್ವಾಹಕ ನಿರ್ದೇಶಕರು ತಿಳಿಸಿದ್ದಾರೆ.
* ಸೀಟು ಹಂಚಿಕೆಯಾದ ಬಳಿಕ ಕಾಲೇಜಿಗೆ ವರದಿ ಮಾಡಿಕೊಳ್ಳದಿದ್ದರೆ ಕಾಷನ್ ಡೆಪಾಸಿಟ್ ಮುಟ್ಟುಗೋಲು ಮಾಡಿಕೊಳ್ಳಲಾಗುವುದು. ನಿಯಮಾನುಸಾರ ದಂಡವನ್ನೂ ಪಾವತಿಸಬೇಕಾಗುತ್ತದೆ ಎಂದು ಕೆಇಎ ಕಾರ್ಯನಿರ್ವಾಹಕ ನಿರ್ದೇಶಕರು ಎಚ್ಚರಿಕೆ ನೀಡಿದ್ದಾರೆ.

ಯುಜಿ ನೀಟ್ ಸ್ಟ್ರೇ ವೇಕೆನ್ಸಿ ಸುತ್ತಿಗೆ ಯಾರೆಲ್ಲ ಅರ್ಹರು?
* ಇದುವರೆಗೆ ಕೆಇಎ ಮೂಲಕ ಯಾವುದೇ ಸೀಟು ಹಂಚಿಕೆ ಪಡೆಯದ ಅಭ್ಯರ್ಥಿಗಳು ಭಾಗವಹಿಸಬಹುದು
* ದಂತ ವೈದ್ಯಕೀಯ ಸೀಟು ಪಡೆದಿದ್ದು, ವೈದ್ಯಕೀಯ ಸೀಟಿಗೆ ಪ್ರವೇಶ ಪಡೆಯಲು ಬಯಸುವವರಿಗೂ ಅವಕಾಶ

ಇದರಲ್ಲಿ ಯಾರು ಅರ್ಜಿ ಸಲ್ಲಿಸುವಂತಿಲ್ಲ?
ಈಗಾಗಲೇ ಡೀಮ್ಡ್ ವಿಶ್ವವಿದ್ಯಾಲಯ, ಅಖಿಲ ಭಾರತ ಕೋಟಾ ಅಥವಾ ಇತರ ರಾಜ್ಯಗಳ ಮೂಲಕ ಮೊದಲ ಮೂರು ರೌಂಡ್ಸ್‌ನಲ್ಲಿ ಸೀಟ್‌ ಹಂಚಿಕೆ ಪಡೆದಿರುವವರಿಗೆ ಈ ಸುತ್ತಿಗೆ ಅರ್ಜಿ ಸಲ್ಲಿಸಲು ಅವಕಾಶ ಇರುವುದಿಲ್ಲ.  

ಆಪ್ಷನ್ಸ್ ದಾಖಲಿಸುವ ಮುನ್ನ ಶುಲ್ಕ ಪರಿಶೀಲಿಸಿ:
* ಉಳಿಕೆ ಸೀಟುಗಳು ಮತ್ತು ಅವುಗಳ ಶುಲ್ಕದ ವಿವರಗಳನ್ನು ಕೆಇಎ ವೆಬ್‌ಸೈಟ್‌ನಲ್ಲಿ ಪ್ರಕಟಿಸಲಾಗಿದೆ
* ಸೀಟುಗಳ ಲಭ್ಯತೆ ಮತ್ತು ಶುಲ್ಕ ಪರಿಶೀಲಿಸಿಯೇ ಆಪ್ಷನ್ಸ್ ದಾಖಲಿಸಲು ಸೂಚನೆ
* ಈಗಾಗಲೇ ಇತರ ಕೋರ್ಸ್‌ಗಳಿಗೆ ಪ್ರವೇಶ ಪಡೆದು ವ್ಯಾಸಂಗ ಮಾಡುತ್ತಿರುವವರು ಪೋಷಕರೊಂದಿಗೆ ಚರ್ಚಿಸಿ ನಿರ್ಧಾರ ಕೈಗೊಳ್ಳುವಂತೆ ಎಚ್. ಪ್ರಸನ್ನ ಸಲಹೆ.