ಬೆಂಗಳೂರಿನ NLSIUನಲ್ಲಿ ಭರ್ಜರಿ ಫೆಲೋಶಿಪ್ ಅವಕಾಶ; ₹2 ಲಕ್ಷದವರೆಗೆ ವೇತನ, ಇಂದೇ ಅರ್ಜಿ ಸಲ್ಲಿಸಿ!

NLSIU Research Fellowships 2027: ಕಾನೂನು, ಸಮಾಜ ವಿಜ್ಞಾನ, ಸಾರ್ವಜನಿಕ ನೀತಿ ಸೇರಿದಂತೆ ವಿವಿಧ ಕ್ಷೇತ್ರಗಳಲ್ಲಿ ಸಂಶೋಧನೆ ಮಾಡಲು ಬಯಸುವವರಿಗೆ ಬೆಂಗಳೂರಿನ ನ್ಯಾಷನಲ್ ಲಾ ಸ್ಕೂಲ್ ಆಫ್ ಇಂಡಿಯಾ ಯೂನಿವರ್ಸಿಟಿ (NLSIU) ಮಹತ್ವದ ಅವಕಾಶವೊಂದನ್ನ ನೀಡಿದೆ. 2027ರ ಜನವರಿ ಅವಧಿಗೆ ವಿವಿಧ ಸಂಶೋಧನಾ ಫೆಲೋಶಿಪ್‌ಗಳಿಗೆ ಅರ್ಜಿ ಆಹ್ವಾನಿಸಲಾಗಿದೆ. ಒಟ್ಟು 20 ಸ್ಥಾನಗಳು ಲಭ್ಯವಿದ್ದು, ಆಯ್ಕೆಯಾಗುವ ಅಭ್ಯರ್ಥಿಗಳಿಗೆ ತಿಂಗಳಿಗೆ ಗರಿಷ್ಠ ₹2 ಲಕ್ಷದವರೆಗೆ ಸಂಭಾವನೆ ಸಿಗಲಿದೆ.

NLSIU ಪ್ರಕಟಿಸಿರುವ ಮಾಹಿತಿಯ ಪ್ರಕಾರ, ಈ ಬಾರಿ ಮೂರು ಪ್ರಮುಖ ಫೆಲೋಶಿಪ್ ಕಾರ್ಯಕ್ರಮಗಳ ಅಡಿಯಲ್ಲಿ ಅರ್ಜಿಗಳನ್ನ ಆಹ್ವಾನಿಸಲಾಗಿದೆ. ಅವುಗಳೆಂದರೆ Graduate Research Fellowship, NLSIU Postdoctoral Fellowship ಮತ್ತು University Research Fellowship. ಕಾನೂನು, ಸಮಾಜ ವಿಜ್ಞಾನ, ಸಾರ್ವಜನಿಕ ನೀತಿ ಹಾಗೂ ಸಂಬಂಧಿತ ವಿಷಯಗಳಲ್ಲಿ ಸಂಶೋಧನೆ ನಡೆಸಲು ಆಸಕ್ತಿ ಹೊಂದಿರುವ ವಿವಿಧ ಹಂತದ ಸಂಶೋಧಕರಿಗೆ ಈ ಅವಕಾಶಗಳನ್ನ ನೀಡಲಾಗುತ್ತಿದೆ.

20 ಫೆಲೋಶಿಪ್ ಸ್ಥಾನಗಳು

ಈ ನೇಮಕಾತಿಯಲ್ಲಿ ಒಟ್ಟು 20 ಸ್ಥಾನಗಳಿವೆ. Graduate Research Fellowshipಗೆ 10 ಸ್ಥಾನಗಳು, NLSIU Postdoctoral Fellowshipಗೆ 5 ಸ್ಥಾನಗಳು ಹಾಗೂ University Research Fellowshipಗೆ 5 ಸ್ಥಾನಗಳು ಮೀಸಲಿಡಲಾಗಿದೆ. ಫೆಲೋಶಿಪ್‌ಗಳು ಗುತ್ತಿಗೆ ಆಧಾರದ ಮೇಲೆ ಇರಲಿದ್ದು, ಆಯ್ಕೆಯಾಗುವವರು ಬೆಂಗಳೂರಿನ NLSIU ಕ್ಯಾಂಪಸ್‌ನಲ್ಲಿ ಸಂಶೋಧನಾ ಚಟುವಟಿಕೆಗಳಲ್ಲಿ ತೊಡಗಿಸಿಕೊಳ್ಳಬೇಕಾಗುತ್ತದೆ.

NLSIU ಪ್ರಕಾರ, ಈ ಫೆಲೋಶಿಪ್ ಕಾರ್ಯಕ್ರಮದ ಉದ್ದೇಶ ಕಾನೂನು, ಸಮಾಜ ವಿಜ್ಞಾನ ಮತ್ತು ಸಾರ್ವಜನಿಕ ನೀತಿ ಕ್ಷೇತ್ರಗಳಲ್ಲಿ ಹೊಸ ಸಂಶೋಧನೆಗೆ ಉತ್ತೇಜನ ನೀಡುವುದು. ಹೊಸ ಸೈದ್ಧಾಂತಿಕ ದೃಷ್ಟಿಕೋನಗಳನ್ನ ಅಭಿವೃದ್ಧಿಪಡಿಸುವುದು, ಪ್ರಾಯೋಗಿಕ ಸಂಶೋಧನೆ ನಡೆಸುವುದು ಮತ್ತು ಸಂಶೋಧನೆ ಹಾಗೂ ನೀತಿ ರೂಪಿಸುವಿಕೆಯ ನಡುವಿನ ಸಂಪರ್ಕವನ್ನ ಬಲಪಡಿಸುವ ಕೆಲಸಗಳಿಗೆ ಒತ್ತು ನೀಡಲಾಗುತ್ತದೆ. ಅಂತರಶಿಸ್ತೀಯ ಸಂಶೋಧನೆಗೂ ಅವಕಾಶವಿದೆ.

Graduate Research Fellowship

ಇತ್ತೀಚೆಗೆ ಪದವಿ ಪಡೆದವರು ಹಾಗೂ ಯುವ ಸಂಶೋಧಕರಿಗೆ Graduate Research Fellowship ಪ್ರಮುಖ ಅವಕಾಶವಾಗಿದೆ. ಈ ಫೆಲೋಶಿಪ್‌ಗೆ ಕಾನೂನಿನಲ್ಲಿ ಪದವಿ ಅಥವಾ ಸಮಾಜ ವಿಜ್ಞಾನ, ಸಾರ್ವಜನಿಕ ನೀತಿ ಹಾಗೂ ಸಂಬಂಧಿತ ವಿಷಯಗಳಲ್ಲಿ ಸ್ನಾತಕೋತ್ತರ ಪದವಿ ಹೊಂದಿರುವವರು ಅರ್ಜಿ ಸಲ್ಲಿಸಬಹುದು. ಈ ವಿಭಾಗಕ್ಕೆ ಅರ್ಜಿ ಸಲ್ಲಿಸಲು ಕಡ್ಡಾಯವಾಗಿ ಕೆಲಸದ ಅನುಭವ ಹೊಂದಿರಬೇಕೆಂಬ ನಿಯಮವಿಲ್ಲ. ಮೂರು ವರ್ಷಗಳವರೆಗೆ post-qualification experience ಹೊಂದಿರುವ ಯುವ ಸಂಶೋಧಕರನ್ನ ಗುರಿಯಾಗಿಸಿಕೊಂಡಿರುವ ಈ ಕಾರ್ಯಕ್ರಮದಲ್ಲಿ ಸಂಶೋಧನಾ ಕೌಶಲ್ಯ ಬೆಳೆಸಿಕೊಳ್ಳಲು ಅವಕಾಶ ದೊರೆಯಲಿದೆ. ಆಯ್ಕೆಯಾಗುವವರಿಗೆ ಸಂಶೋಧನಾ ಕೇಂದ್ರಗಳು ಮತ್ತು ಯೋಜನೆಗಳೊಂದಿಗೆ ಕೆಲಸ ಮಾಡುವ ಅವಕಾಶ ಸಿಗಲಿದೆ. Graduate Research Fellowshipಗೆ ಆರಂಭಿಕ ಮಾಸಿಕ ಸಂಭಾವನೆ ₹50,000 ಆಗಿದೆ. ಫೆಲೋಶಿಪ್ ಅವಧಿ ಕನಿಷ್ಠ ಆರು ತಿಂಗಳು ಹಾಗೂ ಗರಿಷ್ಠ ಎರಡು ವರ್ಷಗಳವರೆಗೆ ಇರಬಹುದು.

Postdoctoral Fellowship

PhD ಪೂರ್ಣಗೊಳಿಸಿರುವ ಸಂಶೋಧಕರಿಗೂ NLSIU ಉತ್ತಮ ಅವಕಾಶ ನೀಡಿದೆ. ಕಳೆದ ಮೂರು ವರ್ಷಗಳಲ್ಲಿ ಕಾನೂನು, ಸಮಾಜ ವಿಜ್ಞಾನ, ಸಾರ್ವಜನಿಕ ನೀತಿ ಅಥವಾ ಸಂಬಂಧಿತ ವಿಷಯಗಳಲ್ಲಿ PhD ಪಡೆದಿರುವವರು Postdoctoral Fellowshipಗೆ ಅರ್ಜಿ ಸಲ್ಲಿಸಬಹುದು. ಅಧಿಸೂಚನೆಯ ದಿನಾಂಕದ ವೇಳೆಗೆ PhD ಥೀಸಿಸ್ ಸಲ್ಲಿಸಿರುವ ಅಭ್ಯರ್ಥಿಗಳಿಗೂ ಕೆಲವು ಷರತ್ತುಗಳೊಂದಿಗೆ ಅರ್ಜಿ ಸಲ್ಲಿಸಲು ಅವಕಾಶವಿದೆ. ಈ ಫೆಲೋಶಿಪ್ ಅಡಿಯಲ್ಲಿ ಒಟ್ಟು 5 ಸ್ಥಾನಗಳು ಲಭ್ಯವಿದ್ದು, ಆರಂಭಿಕ ಮಾಸಿಕ ಸಂಭಾವನೆ ₹1.20 ಲಕ್ಷ ಎಂದು NLSIU ತಿಳಿಸಿದೆ. ಫೆಲೋಶಿಪ್ ಅವಧಿ ಸಾಮಾನ್ಯವಾಗಿ ಒಂದರಿಂದ ಎರಡು ವರ್ಷಗಳವರೆಗೆ ಇರಲಿದೆ. ಈಗಾಗಲೇ ಮತ್ತೊಂದು ವಿಶ್ವವಿದ್ಯಾಲಯ ಅಥವಾ ಸಂಶೋಧನಾ ಸಂಸ್ಥೆಯಲ್ಲಿ Postdoctoral Fellowship ಮಾಡಿರುವ ಅಭ್ಯರ್ಥಿಗಳಿಗೆ ಈ ವಿಭಾಗದಲ್ಲಿ ಅರ್ಹತೆ ಇರುವುದಿಲ್ಲ.

University Research Fellowship

ಹಿರಿಯ ಸಂಶೋಧಕರು ಹಾಗೂ ಅನುಭವ ಹೊಂದಿರುವ ಶೈಕ್ಷಣಿಕ ಕ್ಷೇತ್ರದ ಅಭ್ಯರ್ಥಿಗಳಿಗಾಗಿ University Research Fellowship ನೀಡಲಾಗುತ್ತಿದೆ. ಈ ವಿಭಾಗಕ್ಕೆ ಮಾನ್ಯತೆ ಪಡೆದ PhD ಹೊಂದಿರುವುದರ ಜೊತೆಗೆ ಕನಿಷ್ಠ 10 ವರ್ಷಗಳ ಬೋಧನಾ ಅಥವಾ ಸಂಬಂಧಿತ ವೃತ್ತಿಪರ ಅನುಭವ ಹೊಂದಿರಬೇಕು. ಉತ್ತಮ ಸಂಶೋಧನಾ ಪ್ರಕಟಣೆಗಳ ದಾಖಲೆಯೂ ಅಗತ್ಯವಾಗಿದೆ. ಈ ವಿಭಾಗದಲ್ಲಿ 5 ಸ್ಥಾನಗಳಿದ್ದು, ಆರಂಭಿಕ ಮಾಸಿಕ ಸಂಭಾವನೆ ₹2 ಲಕ್ಷ. ಅಭ್ಯರ್ಥಿಯ ಶೈಕ್ಷಣಿಕ ಅರ್ಹತೆ, ಅನುಭವ ಮತ್ತು ಒಟ್ಟಾರೆ ಸೂಕ್ತತೆಯ ಆಧಾರದ ಮೇಲೆ ಅಂತಿಮ ಸಂಭಾವನೆ ನಿರ್ಧರಿಸಲಾಗುತ್ತದೆ ಎಂದು NLSIU ತಿಳಿಸಿದೆ.

ಯಾವ ವಿಷಯಗಳಲ್ಲಿ ಸಂಶೋಧನೆ ಮಾಡಬಹುದು?

ಕಾನೂನು ಮಾತ್ರವಲ್ಲದೆ ಸಮಾಜ ವಿಜ್ಞಾನ, ಸಾರ್ವಜನಿಕ ನೀತಿ ಹಾಗೂ ಸಂಬಂಧಿತ ಅಂತರಶಿಸ್ತೀಯ ಕ್ಷೇತ್ರಗಳಲ್ಲೂ ಸಂಶೋಧನೆ ಮಾಡಲು ಅವಕಾಶವಿದೆ. NLSIUನ ಉದ್ದೇಶ ಸಂಶೋಧನೆಯನ್ನ ಕೇವಲ ಶೈಕ್ಷಣಿಕ ವಲಯಕ್ಕೆ ಸೀಮಿತಗೊಳಿಸದೆ, ನೀತಿ ರೂಪಿಸುವಿಕೆ ಮತ್ತು ಸಂಸ್ಥೆಗಳ ಸುಧಾರಣೆಯೊಂದಿಗೆ ಸಂಪರ್ಕಿಸುವುದಾಗಿದೆ. ಆಯ್ಕೆಯಾಗುವ ಫೆಲೋಗಳು ಸಂಶೋಧನಾ ಕಾರ್ಯಗಳು, ಸಾಹಿತ್ಯ ಪರಿಶೀಲನೆ, ಸಂಶೋಧನಾ ಪ್ರಸ್ತಾವನೆಗಳ ತಯಾರಿ, ಕಾರ್ಯಾಗಾರಗಳು, ಸಮ್ಮೇಳನಗಳು ಮತ್ತು ವಿವಿಧ ಶೈಕ್ಷಣಿಕ ಚಟುವಟಿಕೆಗಳಲ್ಲಿ ಭಾಗವಹಿಸಬೇಕಾಗಬಹುದು.

ಅರ್ಜಿ ಸಲ್ಲಿಸಲು ಕೊನೆಯ ದಿನಾಂಕ ಯಾವುದು?

2027ರ ಜನವರಿ intakeಗಾಗಿ ಅರ್ಜಿ ಸಲ್ಲಿಸುವ ಪ್ರಕ್ರಿಯೆ ಈಗಾಗಲೇ ಆರಂಭವಾಗಿದೆ. ಅಭ್ಯರ್ಥಿಗಳು ಅಕ್ಟೋಬರ್ 30, 2026 ಸಂಜೆ 5 ಗಂಟೆಯೊಳಗೆ ಅರ್ಜಿ ಸಲ್ಲಿಸಬೇಕು. ಅರ್ಜಿಗಳನ್ನ ಸಂಬಂಧಿತ ಫೆಲೋಶಿಪ್‌ಗೆ ನೀಡಲಾಗಿರುವ Google Form ಮೂಲಕ ಸಲ್ಲಿಸಬೇಕು ಎಂದು NLSIU ತಿಳಿಸಿದೆ. ಅರ್ಜಿ ಸಲ್ಲಿಸುವ ಮೊದಲು ಅಭ್ಯರ್ಥಿಗಳು ತಾವು ಅರ್ಜಿ ಸಲ್ಲಿಸುತ್ತಿರುವ ಫೆಲೋಶಿಪ್‌ನ ಅರ್ಹತಾ ಮಾನದಂಡಗಳು, ಅಗತ್ಯ ದಾಖಲೆಗಳು ಮತ್ತು ಇತರ ಷರತ್ತುಗಳನ್ನ ಅಧಿಕೃತ NLSIU ಅಧಿಸೂಚನೆಯಲ್ಲಿ ಪರಿಶೀಲಿಸುವುದು ಅಗತ್ಯ. ಕಾನೂನು, ಸಮಾಜ ವಿಜ್ಞಾನ ಮತ್ತು ಸಾರ್ವಜನಿಕ ನೀತಿ ಕ್ಷೇತ್ರದಲ್ಲಿ ಸಂಶೋಧನಾ ವೃತ್ತಿ ರೂಪಿಸಿಕೊಳ್ಳಲು ಬಯಸುವವರಿಗೆ ಈ ಫೆಲೋಶಿಪ್ ಕಾರ್ಯಕ್ರಮವು ಮಹತ್ವದ ಶೈಕ್ಷಣಿಕ ಅವಕಾಶವಾಗಿದೆ. ಅರ್ಹ ಅಭ್ಯರ್ಥಿಗಳು ಕೊನೆಯ ದಿನಾಂಕದವರೆಗೆ ಕಾಯದೆ ಅರ್ಜಿ ಪ್ರಕ್ರಿಯೆ ಪೂರ್ಣಗೊಳಿಸುವುದು ಸೂಕ್ತ.